បើនិយាយពីតួនាទីរដ្ឋមន្ត្រីការបរទេសដែលជាតួនាទីខ្ពស់ និងសំខាន់មួយក្នុងជួររដ្ឋាភិបាលក្នុងតំបន់អាស៊ីអាគ្នេយ៍ លោកស្រី រ៉េតណូ ម៉ាស៊ូឌី (Retno Marsudi) របស់ឥណ្ឌូណេស៊ី ជាស្រ្តីតែមួយគត់ក្នុងចំណោមរដ្ឋមន្រ្តីទាំង១០។ ពិសេសជាងនេះ លោកស្រីក៏ជាស្ត្រីទីមួយដែលកាន់តំណែងជាប្រមុខការទូតឥណ្ឌូណេស៊ីទៀតផង។
តើលោកស្រី រ៉េតណូ ម៉ាស៊ូឌី មានបទពិសោធជីវិតបែបណារហូតអាចកាន់តំណែងជារដ្ឋមន្រ្តីការបរទេសរបស់មហាអំណាចតំបន់ ហើយបានគាំទ្រតួនាទីស្ត្រីក្នុងសង្គមយ៉ាងដូចម្តេចខ្លះ?
កើតនៅក្នុងទីក្រុង Semarang ភាគកណ្ដាលនៃកោះជ្វាក្នុងឆ្នាំ១៩៦២ លោកស្រី ម៉ាស៊ូឌី បញ្ចប់ការសិក្សាមុខវិជ្ជាទំនាក់ទំនងអន្តរជាតិពីសកលវិទ្យាល័យ Gadjah Mada ក្នុងទីក្រុង Yogyakarta។ បន្ទាប់មកក្នុងឆ្នាំ១៩៨៥ លោកស្រីក៏បានបន្តការសិក្សាជំនាញច្បាប់សហភាពអឺរ៉ុបនៅសាកលវិទ្យាល័យ The Hague University of Applied Sciences របស់ហូឡង់។ ក្រៅពីនេះ លោកស្រីក៏សិក្សាមុខជំនាញការសិក្សាសិទ្ធិមនុស្សនៅសាកលវិទ្យាល័យអូស្លូនៅន័រវេសផងដែរ។
ក្រោយបញ្ចប់ការសិក្សានៅហូឡង់ លោកស្រី ម៉ាស៊ូឌី បានចូលបម្រើការងារជាមន្ត្រីលេខាធិការពាណិជ្ជកម្មសម្រាប់ឥណ្ឌូណេស៊ី មុនពេលត្រូវបានតែងតាំងជាអគ្គរដ្ឋទូតប្រចាំន័រវេស និងអ៊ីស្លង់ក្នុងឆ្នាំ ២០០៥។ បន្ទាប់មក លោកស្រី Marsudi ត្រូវបានកោះហៅត្រឡប់ទៅទីក្រុងហ្សាការតាវិញដើម្បីទទួលបន្ទុកចរចាកិច្ចព្រមព្រៀងពាណិជ្ជកម្មសម្រាប់ឥណ្ឌូណេស៊ី។
រដ្ឋមន្រ្តីការបរទេសឥណ្ឌូណេស៊ី រ៉េតណូ ម៉ាស៊ូឌី (ស្ដាំទី៣) ឈរថតរូបជាមួយប្រមុខការទូតអាស៊ានផ្សេងទៀត។ រូបថត Xinhua
មុខតំណែងចុងក្រោយមុនលោកស្រីក្លាយជារដ្ឋមន្ត្រីការបរទេសឥណ្ឌូណេស៊ីននោះគឺជា អគ្គរដ្ឋទូតឥណ្ឌូណេស៊ីប្រចាំហូឡង់។ ក្នុងអំឡុងពេលបំពេញការងារនៅទីក្រុងឡាអេ លោកស្រីបានធ្វើការជាច្រើនដើម្បីជំរុញពាណិជ្ជកម្មទ្វេភាគីជាមួយហូឡង់។
នេះទំនងជាកត្តាមួយដែលជំរុញឱ្យប្រធានាធិបតីឥណ្ឌូណេស៊ី ចូកូ វីដូដូ ចាប់អារម្មណ៍ និងសមត្ថភាពរបស់លោកស្រី និងបានតែងតាំងជារដ្ឋមន្ត្រីការបរទេសនៃប្រទេសសេដ្ឋកិច្ចធំមួយប្រចាំអាស៊ីអាគ្នេយ៍ក្នុងឆ្នាំ២០១៤។
ក្នុងនាមជារដ្ឋមន្ត្រីការបរទេសនៃប្រទេសប្រជុំកោះដែលមានបញ្ហាដែនសមុទ្រជាច្រើន លោកស្រី ម៉ាស៊ូឌី ត្រូវចំណាយពេលច្រើនពិភាក្សាជាមួយទីក្រុងកង់ប៉េរ៉ានិងទីក្រុងប៉េកាំងដែលជាដៃគូដ៏សំខាន់ទាំងសេដ្ឋកិច្ច និងពាណិជ្ជកម្ម។
ក្នុងជម្លោះសមុទ្រចិនខាងត្បូងដែលជាបញ្ហាចម្បងមួយនៅតំបន់អាស៊ីអាគ្នេយ៍ ហើយក៏ជាបញ្ហាមួយដែលអាស៊ាន និងឥណ្ឌូណេស៊ីត្រូវដោះស្រាយ លោកស្រី ម៉ាស៊ូឌី បានព្យាយាមផ្តល់អាទិភាពដល់ការឈរលើមូលដ្ឋានសន្តិភាព ដើម្បីរក្សាស្ថិរភាពក្នុងតំបន់ និងជំរុញឱ្យប្រទេសទាមទារដោះស្រាយជាមួយគ្នា។
លើសពីនេះ រដ្ឋមន្ត្រីការបរទេសរូបនេះបានជំរុញឱ្យស្ត្រីមានតួនាទីសំខាន់នៅក្នុងសង្គម និងផ្ដោតសំខាន់លើការពង្រឹងអំណាចស្ត្រីមិនត្រឹមតែក្នុងកម្រិតជាតិប៉ុណ្ណោះទេ តែក៏ពង្រីកទៅកម្រិតតំបន់ និងពិភពលោកផងដែរ។ ក្នុងកម្រិតតំបន់ លោកស្រីបានជំរុញឱ្យឥណ្ឌូណេស៊ីបើកវគ្គបណ្តុះបណ្តាលថ្នាក់តំបន់ស្តីពីស្ត្រី, សន្តិភាព និងសន្តិសុខ, បណ្តាញអាស៊ីអាគ្នេយ៍នៃអ្នកចរចាសន្តិភាពស្ត្រី និងអ្នកសម្រុះសម្រួលដើម្បីបង្កើនសមត្ថភាពរបស់ស្ត្រីក្នុងការដោះស្រាយជម្លោះ និងការសម្របសម្រួល។
«ស្ត្រីគឺជាភ្នាក់ងារសន្តិភាព។ ការចូលរួមរបស់ស្ត្រីមានន័យថា មានមនុស្សធម៌ក្នុងដំណើរការចរចា»។ នេះជាការលើកឡើងរបស់លោកស្រី ម៉ាស៊ូឌី កន្លងមក។
គួរបញ្ជាក់ថា ការលើកកម្ពស់សមភាពយេនឌ័រ (PUG) និងបញ្ហាស្ត្រី សន្តិភាព និងសន្តិសុខ (WPS) ជាអាទិភាពមួយចំនួននៃគោលនយោបាយការបរទេសរបស់ឥណ្ឌូណេស៊ី។ គំនិតផ្តួចផ្តើម និងកម្មវិធីផ្សេងៗត្រូវបានផ្សព្វផ្សាយដោយក្រសួងការបរទេសឥណ្ឌូណេស៊ីទៀតផង៕