វិស័យប្រេង ដែលនៅក្រៅទណ្ឌកម្មរបស់អាម៉េរិកលើរុស្ស៊ីយូរមកហើយ ត្រូវបានប្រធានាធិបតី ចូ បៃឌិន ប្រកាសបិទដូចគ្នា។ នៅថ្ងៃទី៨ ខែមីនា លោក បៃឌិន ប្រកាសហាមនាំចូលប្រេងឆៅពីរុស្ស៊ី ដែលជាផ្នែកមួយនៃទណ្ឌកម្មប្រឆាំងវិស័យថាមពលរបស់រុស្ស៊ី ដែលជាប្រភពចំណូលដ៏ធំមួយសម្រាប់រដ្ឋបាលប្រធានាធិបតី វ៉ា្លឌីមៀ ពូទីន ។

 

ថ្លែងពីសេតវិមាន លោក បៃឌិន អះអាងថា ប្រេងរបស់រុស្ស៊ី នឹងមិនត្រូវទទួលបាននៅកំពង់ផែអាម៉េរិកទៀតឡើយ ហើយប្រជាជនអាម៉េរិកនឹងបង្អាក់ម៉ាស៊ីនសង្រ្គាមរបស់លោក ពូទីន ។ ប្រមុខរដ្ឋអាម៉េរិកបញ្ជាក់ ការសម្រេចចិត្តនេះ ធ្វើឡើងក្រោយការជជែកជាមួយសម្ព័ន្ធមិត្ត។ 

 

តាមពិតទៅ ការដាក់ទណ្ឌកម្មលើវិស័យប្រេងនេះ ស្ថិតក្នុងការពិចារណរបស់អាម៉េរិកតាំងពីដំបូង ប៉ុន្តែសម្ព័ន្ធមិត្តអាម៉េរិកនៅអឺរ៉ុប មិនទាន់ចុះសម្រុងគ្នា ព្រោះសុទ្ធតែពឹងពាក់ថាមពលនាំចូលពីអឺរ៉ុបទាំងប្រេង ទាំងហ្គាស។ ជាមួយការដាក់ទណ្ឌកម្មតែឯងពេលនេះ ទីក្រុងវ៉ាស៊ីនតោន ទំនងជាចង់ផ្ដល់មេរៀនខ្លាំងថែមទៀតដល់ទីក្រុងមូស្គូ តែរក្សាសន្តិសុខថាមពលឱ្យអឺរ៉ុបបន្តទៀត។

 

អាម៉េរិក មិនពឹងផ្អែកខ្លាំងលើប្រេងរុស្ស៊ីឡើយ ហើយក៏មានប្រភពផ្គត់ផ្គង់ទូលាយជាមួយអឺរ៉ុបដែរ។ មុនប្រកាសហាមឃាត់នេះ អាម៉េរិក ក៏ងាករកប្រទេសផលិតប្រេងធំៗមានអារ៉ាប៊ីសាអូឌីតជាដើមដើម្បីបង្កើនការផ្គង់ផ្គង់។ អាម៉េរិកក៏បោះដៃទៅរកវ៉េណេស៊ុយអេឡាដែលរងទណ្ឌកម្មងើបមុខមិនចង់រួចថែមទៀត សំដៅរកប្រភពប្រេងជំនួសប្រេងរុស្ស៊ី៕