ក្នុងរដូវកាល ២០២១-២២ នេះខ្សែប្រយុទ្ធ Lionel Messi ហាក់ទទួលរងសម្ពាធ ព្រមទាំងការអស់សង្ឃឹមក្នុងការលេងឱ្យក្រុម Paris Saint Germain ក្រោយចាកចេញពីក្លិប Barcelona ដោយក្លិបជួបបញ្ហាហរិញ្ញវត្ថុ។ PSG ក៏បានធ្លាក់ចេញពីពានរង្វាន់ UEFA Champions League ត្រឹមវគ្គ១៦ក្រុមក្រោមថ្វីជើង Real Madrid។
 

ក្លិប Barcelona ក៏ត្រូវបន្តស្ថិតក្រោមការរឹតត្បិតក្នុងការចំណាយលើការនាំចូលកីឡាករថ្មីនៅរដូវកាលក្រោយពីសំណាក់ក្របខ័ណ្ឌ La Liga ដ្បិតបញ្ហាហិរញ្ញវត្ថុនៅក្លិបមួយនេះនៅមិនទាន់ធូរស្បើយនៅឡើយ។ Barcelona ក៏នឹងត្រូវស្ថិតក្រោមការសន្សំប្រាក់យ៉ាងសន្ធឹកសន្ធាប់ដើម្បីរួចផុតពីការរងពិន័យពីលីគកំពូលអេស្ប៉ាញមួយនេះ។
 

«Messi គឺជាកីឡាករម្នាក់ដែលស្ថិតក្នុងប្រវត្តិសាស្រ្តរបស់ក្លិប គាត់ជាកីឡាករដ៏ល្អបំផុតក្នុងប្រវត្តិសាស្រ្តផងដែរ។ គាត់អាចនឹងត្រលប់មកកាន់ក្លិប ​Barcelona វិញ យើងនៅតែបើកទ្វារទទួលគាត់ជានិច្ច។» Xavi ឆ្លើយតបបែបនេះទៅកាន់អ្នកកាសែតដែលបានចោទសួរ។
 

ជំនួប El Clasico រវាងក្រុមម្ចាស់ផ្ទះ Real Madrid ទទួលក្រុម Barcelona នឹងត្រូវបើកការប្រកួតនាកីឡដ្ឋាន Santiago Bernabeu វេលាម៉ោង៣ (ម៉ោងនៅកម្ពុជា) រំលងអាធ្រាត្រឈានចូលថ្ងៃទី២១ ខែមីនា៕