អន្តរជាតិ
លោក ហ្សេលេនស្គី ថា អ៊ីស្រាអែលជាកន្លែងល្អក្នុងការចរចាជាមួយរុស្ស៊ី ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី ។ រូបថត AFP
× ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី នៅថ្ងៃទី ២០ខែមីនា លើកឡើងថា អ៊ីស្រាអែលកំពុងប្រឹងប្រែងយ៉ាងសកម្មដើម្បីរៀបចំកិច្ចចរចាសន្តិភាពកម្រិតកំពូលរវាងមេដឹកនាំអ៊ុយក្រែន និងរុស្ស៊ី។ លោក ហ្សេលេនស្គី ក៏បានស្នើថា ជំនួបកម្រិតមេដឹកនាំប្រទេសទាំងពីរគួរតែធ្វើឡើងនៅក្រុងហ្ស៊េរុយសាឡិម ដោយលោកចាត់ទុកជាទីកន្លែងល្អមួយ។
ឈានចូលជិតមួយខែបន្ទាប់ពីរុស្ស៊ីបានឈ្លានពានអ៊ុយក្រែន ភាគីទាំងពីរនៅតែបន្ត ប្រឈមមុខដាក់គ្នា ហើយកិច្ចចរចារវាងអ្នកតំណាងប៉ុន្មានលើកមកនេះក៏មិនបានជំរុញឱ្យមានបទឈប់បាញ់គ្នានោះឡើយ។ ថ្លែងក្នុងវីដេអូនៅថ្ងៃទី២០ ខែមីនា ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី បានលើកឡើងដល់ការប្រឹងប្រែងរបស់អ៊ីស្រាអែលបានខិតខំដើរតួកណ្ដាលដើម្បីភ្ជាប់កិច្ចចរចារវាងទីក្រុងកៀវ និងទីក្រុងមូស្គូ។
ក្នុងវីដេអូដែលចេញក្រោយការថ្លែងសុន្ទរកថាទៅសភាអ៊ីស្រាអែលតាមប្រព័ន្ធអនឡាញ លោក ហ្សេលេនស្គី ក៏បានអះអាងថា លោកដឹងពីបំណងរបស់អ៊ីស្រាអែលក្នុងការជួយជ្រោមជ្រែងរឿងនេះគឺដើម្បីការពារផលប្រយោជន៍ និងសុវត្ថិភាពប្រជាជនរបស់ពួកគេ។
«នាយករដ្ឋមន្ត្រីអ៊ីស្រាអែល Naftali Bennett កំពុងព្យាយាមរកវិធីសាស្ត្រនៃការចរចាគ្នា ហើយយើងពិតជាអរគុណខ្លាំងណាស់ចំពោះការខិតខំប្រឹងប្រែងរបស់លោក»។ ប្រមុខរដ្ឋអ៊ុយក្រែន បានលើកឡើងបែបនេះ រួចបន្តថា ដូច្នេះមិនយូរមិនឆាប់ភាគីជម្លោះនឹងចាប់ផ្តើមមានកិច្ចពិភាក្សាដែលប្រហែលនឹងធ្វើនៅទីក្រុងហ្ស៊េរុយសាឡិម។ មេដឹកនាំ អ៊ុយក្រែនរូបនេះបានហៅទីក្រុងហ្ស៊េរុយសាឡិកថាជាទីកន្លែងដ៏ត្រឹមត្រូវក្នុងការស្វែងរក សន្តិភាព ប្រសិនជាកិច្ចចរចាអាចបន្តដើរទៅមុខ។ ប៉ុន្តែលោកមិនបាននិយាយដល់ឋានៈដ៏ចម្រូងចម្រាសរបស់ទីក្រុងនេះ។
អំឡុងការថ្លែងសុន្ទរកថាទៅសភាអ៊ីស្រាអែល លោក ហ្សេលេនស្គី បានជំរុញអ៊ីស្រាអែលផ្ដល់ប្រព័ន្ធការពារមីស៊ីលដល់អ៊ុយក្រែន ដែលនឹងអាចការពារប្រជាជនពីការវាយប្រហារពីសំណាក់រុស្ស៊ីផងដែរ។
សូមបញ្ជាក់ថា លោក Bennett ធ្លាប់បានជួបពិភាក្សាជាមួយមេដឹកនាំរុស្ស៊ី និងអ៊ុយក្រែន ហើយជំរុញឱ្យភាគីទាំងពីចូលតុចរចា។ ប្រមុខរដ្ឋាភិបាលអ៊ីស្រាអែល ក៏ធ្លាប់ទៅជួបប្រធានាធិបតីរុស្ស៊ី វ្ល៉ាឌីមៀ ពូទីន នៅទីក្រុងមូស្គូ ដើម្បីជជែកពីបញ្ហាអ៊ុយក្រែនេះដែរ៕
Tag:
អ៊ុយក្រែន
អ៊ីស្រាអែល
រុស្ស៊ី
© រក្សាសិទ្ធិដោយ thmeythmey.com