ក្រុមមេឃខៀវដែលដឹកនាំដោយលោក Pep Guardiola និងហង្សក្រហមរបស់លោក Jurgen Klopp នឹងត្រូវជួបតទល់គ្នានៅខែមេសាខាងមុខនេះ ក្នុងវគ្គពាក់កណ្តាលផ្តាច់ព្រ័ត្រនៃពានរង្វាន់ដ៏ចាស់បំផុតមួយរបស់អង់គ្លេស ។
 

អ្នកគាំទ្ររបស់ក្រុម Manchester City និង Liverpool ដែលជាដៃគូរប្រកួតប្រជែងទាំងក្នុង Premier League និងក្នុង Champions league បានជំរុញឱ្យការប្រកួតផ្លាស់ប្តូរទីតាំងប្រកួត ដោយសារតែកង្វល់បញ្ហាដឹកជញ្ជូន។
 

ក្រោយស្វែងយល់ពីកង្វល់របស់អ្នកគាំទ្រក្រុមទាំងពីរ លោក Andy Burnham អភិបាលក្រុង Manchester និង លោក Steve Rotheram បានធ្វើសេចក្តីថ្លែងការណ៍រួមស្នើទៅកាន់ FA ទាក់ទងទៅនឹងបញ្ហាដែលនៅចំពោះមុខ។
 

«ចាប់តាំងពីឆ្នាំមុនមក យើងបានឮពីពាក្យស្លោកបាល់ទាត់គ្មានអ្នកគាំទ្រគឺគ្មានអ្វីទាំងអស់ (Football without fans is nothing) រហូតមក។ បញ្ហាដែលតែងកើតមានគឺបញ្ហាការធ្វើដំណើរ។ យើងជឿជាក់ថាដំណោះស្រាយគឺប្តូរទីកន្លែងប្រកួតទៅកាន់កីឡដ្ឋានដែលស្ថិតនៅក្នុងតំបន់ហើយមានលទ្ធភាពគ្រប់គ្រាន់សម្រាប់ការប្រកួត»។ នេះបើសេចក្តីថ្លែងការណ៍រួមចេញថ្ងៃទី២២ ខែមីនា។
 

ជំនួបរបស់ Man City និង Liverpool នៅវគ្គពាក់កណ្តាលផ្តាច់ព្រ័ត្រ FA Cup គឺជាជំនួបលើកទីពីររវាងក្រុមទាំងពីរក្នុងសប្តាហ៍តែមួយដោយ ត្រូវជួបគ្នាក្នុងក្របខណ្ឌ Premier league ផងដែរ៕