កម្ពុជាបានប្រមូលផ្ដុំកីឡាករជម្រើសជាតិ សម្រាប់ប្រកួត Futsal នៅប្រទេសថៃ ដែលនឹងប្រកួតនៅថ្ងៃទី២-១០ ខែមេសា ឆ្នាំ២០២២ នៅកីឡដ្ឋាន Huamark ទីក្រុងបាងកក ខណៈ ម្ចាស់ផ្ទះ មានការជឿជាក់ខ្លាំងចំពោះការការពារតំណែងជើងឯក ។

 

ការទទួលឈ្នះជើងឯក១៥ សម័យកាល ក្នុងចំណោមការប្រកួត១៦ សម័យកាល ធ្វើឲ្យគ្រូបង្វឹកថៃ លោក Carlos Cesar មានជំនឿជាខ្លាំងទៅលើកីឡាករខ្លួន ក្នុងការក្លាយជាជើងឯកមួយសម័យកាលទៀត ។ ការបង្ហាញនៅភាពជឿជាក់នេះ ដោយសារក្រុមខ្លួនបានប្រកួតឈ្នះ អ៊ីរ៉ង់ ដែលជាក្រុមខ្លាំងក្នុងតំបន់អាស៊ី ក្នុងលទ្ធផល ៣-០ ។ 
 

«យើង បានឃើញការពង្រឹង និងអភិវឌ្ឍន៍របស់ក្រុម ហើយសមាជិកក្រុមទាំងអស់ធ្វើបានល្អ ចំពោះការប្រកួត NSDF Futsal Invitation Championship Thailand 2022» ។ នេះជាការលើកឡើងរបស់លោក Carlos Cesar ដែលចាត់ទុកការប្រកួតនេះ ជាការកម្ដៅសាច់ដុំក្នុងដំណើរធ្វើជាម្ចាស់ផ្ទះ ប្រកួត AFF Futsal Championship 2022 ។ 
 

សម្រាប់ការប្រកួត AFF Futsal Championship ប្រទេសការពារដំណែងជើងឯក ថៃ ត្រូវប្រកួតជាមួយ ម៉ាឡេស៊ី ឥណ្ឌូនេស៊ី ព្រុយណេ និង កម្ពុជា នៅក្នុងពូល A ខណៈ ពូលB មាន វៀតណាម មីយ៉ាន់ម៉ា ទីម័រខាងកើត និងអូស្ត្រាលី ។
 

សម្រាប់កម្ពុជា ក៏បានប្រមូលកីឡាករជម្រើសជាតិ ២៥នាក់ មកពីក្លិបចំនួន៨ ដើម្បីហ្វឹកហាត់ត្រៀមប្រកួត AFF Futsal Championship នៅទីក្រុងបាងកក ។ ក្នុងចំណោម២៥នាក់នោះ ត្រូវហ្វឹកហាត់ នឹងជម្រុះបន្ដទៀត ដោយផ្អែកលើបច្ចេកទេស និងស្មារតីក្រុម ។ ការហ្វឹកហាតជម្រើសជាតិនេះ ធ្វើរហូតដល់ថ្ងៃទី៣០ ខែមីនា ។

 កីឡាករជម្រើសជាតិកម្ពុជារួមមាន ៖ 
 

● មកពីក្លិបបាលទាត់ ឱម៉ាល់ ៣រូប៖ នួន វាសនា, ញឹក ថាលីដា និង ឡាក់ ភីរុណ។ 

● ក្លិបបាល់ទាត់ ឃ្មុំ ១រូប៖ ហេង យុត្យា ។

● ក្លិបបាល់ទាត់ Alpha FT ៥ រូប៖ សារ៉ាយ ដានិទ្ធ, អោកចាន់ សេរីវង្ស, អេង វត្តត្រា, រស់ ស៊ីវត្តត្រា និង រស់ ស៊ីចំរើន ។

● ក្លិប Young Gun FT ២រូប៖ ភឿន ចាន់វាសនា, លន់ សុធីតារ័ត្ន 

● ក្លិប Avatar FC ២រូប៖ គឹម ប៊ុនរ៉ុង និង តាត់ ផាត់ឌី 

● ក្លិបនគរខ្មែរ ១រូប៖ ទី តូនី

● ក្លិប The Blue Warrior FC ៥រូប៖ គន្ធ លន់ដារ៉ូត, កែវ ជាតួ, កែវ សុចិត្រា, តុង ច័ន្ទមុនី និង អ៊ុល ច័ន្ទបូរ៉ា

● ក្លិប Tai Chi FT ៥រូប៖ ឌុក សុផាត, ធឿន បញ្ញា, សរ សុនស័ក្កសារ៉ាវុធ, ព្រំ ឌីយ៉ាម៉ង, ណុប ពិសិដ្ឋ

● ក្លិប C-Light FT ១រូប៖ កែ កុសលរតនា ៕