ភ្នំពេញ៖ ត្រឹមតែរយៈពេល៤ថ្ងៃប៉ុណ្ណោះ នៃការបង្រៀនផាត់មុខ បែបពិសេស (Special Effect) ដល់យុវជនខ្មែរចំនួន៨រូប អ្នកនាង ឌូ ពុធមូលីតា ទទួលបានលទ្ធផលយ៉ាងគាប់ចិត្ត។ គាត់ចិត្ត ក៏ព្រោះតែសិស្សទាំង៨រូប ធ្វើបានយ៉ាងល្អលើសពីការរំពឹងទុក របស់អ្នកនាង។
ក្នុងដំណើរពីអាមេរិក មកលេងគ្រួសារ និងចូលរួមពិធីមង្គលការរបស់ប្អូន នៅប្រទេសកម្ពុជា អ្នកនាង ឌូ ពុធមូលីតា បានចំណាយពេល៤ថ្ងៃ ដើម្បីចែករំលែកចំណេះដឹងផាត់មុខបែបពិសេស( Special Effect) ពី Hollywood ដល់អ្នកផាត់មុខបែបស្អាតនៅកម្ពុជា។ ៤ថ្ងៃនេះ អ្នកនាង មូលីតា អះអាងថា សិស្សរបស់អ្នកនាងទាំង៨នាក់ ពិតជាធ្វើបានល្អ លើសពីការរំពឹងទុករបស់អ្នកនាង។
សូមទស្សនាវីដេអូសម្ភាសខាងក្រោមនេះ៖
ស្ថិតក្នុងកម្មវិធីបិទបញ្ចប់វគ្គផាត់មុខបែបពិសេស អ្នកនាង ឌូ ពុធមូលីតា អះអាង៖«មកលើកនេះ ខ្ញុំឆ្លៀតមែនទែន មកបង្រៀនពួកគាត់ ព្រោះនេះជាបំណងរបស់ខ្ញុំតាំងពីយូរមកហើយ ដែលថាពេលដែលខ្ញុំមានឱកាស ខ្ញុំនឹងចែករំលែកចំណេះទាំងនេះទៅកាន់កូនខ្មែរ។ ដើម្បីឱ្យឧស្សាហកម្មភាពយន្តក្នុងប្រទេសយើងកាន់តែរីកចម្រើន។ រយៈពេលខ្លីមែនទែន ប៉ុន្តែពួកគាត់អាចធ្វើបានល្អខ្លាំង ខ្ញុំពិតជារំភើបចិត្ត។ ខ្ញុំរៀនរាប់ឆ្នាំ តែគាត់រៀន៤ថ្ងៃ គាត់អាចធ្វើបាន។ កូនខ្មែរយើងមិនធម្មតាទេ ឱ្យតែមានសម្ភារគ្រប់គ្រាន់ ពួកគាត់អាចធ្វើបានទាំងអស់»។
អ្នកនាង ឌូ ពុធមូលីតា ទទួលកម្រងផ្កាពីសិស្ស ក្នុងថ្ងៃបិទវគ្គផាត់មុខ Special Effect
ចំណែកលោក វ៉ាត វ៉ាន់ គឺជាអ្នកផាត់មុខបែបស្អាតមួយរូប គឺជាសិស្សផ្នែកផាត់មុខបែបពិសេស របស់អ្នកនាង ឌូ ពុធមូលីតា។ ស្នាដៃក្រោយបញ្ចប់វគ្គសិក្សារយៈពេល៤ថ្ងៃ វ៉ាន់ បង្កើតបានជាតួអង្គមួយ ដែលមានមុខដូចសត្វឆ្មាបន្តិច ដូចសត្វខ្លាបន្តិច ដូចសត្វតោបន្តិច ហើយមានស្នែងវែងដូចសត្វអ្វីមួយផ្សេងទៀត។ ស្នាដៃដែលបង្កើតឡើង ត្រូវបាន វ៉ាន់ ផ្សារភ្ជាប់ជាមួយសាច់រឿងយ៉ាងច្បាស់។
តួអង្គដែល វ៉ាន់ បង្កើតឡើង មានរឿងរ៉ាវនៅពីក្រោយយ៉ាងចាប់អារម្មណ៍។ ដំបូងឡើយមានគូស្វាមីភរិយាមួយគូស្រឡាញ់គ្នាយ៉ាងខ្លាំង។ ពួកគេបានស្បត់សច្ចានឹងគ្នាថា ពួកគេនឹងមិនបែកគ្នាឡើយ។ ប៉ុន្តែបើថ្ងៃណាមួយ ពួកគេត្រូវបែកគ្នាមែន ហើយបើនរណាម្នាក់ ទៅស្រឡាញ់អ្នកផ្សេង នោះកូនដែលនឹងកើតមក នឹងត្រូវមានរូបរាងអាក្រក់ខុសពីមនុស្សធម្មតា។
លោក វ៉ាត វ៉ាន់ បង់កក្រមា
នៅទីបំផុតគូស្នេហ៍មួយគូនោះ បានបែកគ្នា។ ភាគីខាងស្រី បានទៅស្រឡាញ់បុរសម្នាក់ទៀត។ មិនយូរប៉ុន្មានពួកគេបង្កើតបានកូនស្រីម្នាក់ ប៉ុន្តែកូនស្រីនោះ មានរូបរាងមិនដូចមនុស្សធម្មតា គឺសដូចដែលបានរៀបរាប់ខាងលើមកនោះ។
«យើងឃើញទឹកមុខរបស់គាត់ ហាក់ដូចជាមានកង្វល់ខ្លាំងណាស់ គឺមកពីគាត់មានរូបរាងមិនដូចមនុស្សធម្មតា។ ហើយរឿងទាំងនោះ គឺបណ្ដាលមកពីពាក្យសម្បថរបស់ម្ដាយឪពុករបស់គាត់»។ នេះជាការពន្យល់របស់លោក វ៉ាត វ៉ាន់។
មិនខុសគ្នាឡើយ អ្នកនាង កែវ ណាវី ដែលជាអ្នកនិពន្ធឯករាជមួយរូប ក៏បានបង្កើតសាច់រឿងរបស់ខ្លួន ដើម្បីបង្កើតស្នាដៃផាត់មុខដ៏អស្ចារ្យផងដែរ។ រឿងរបស់ ណាវី ផ្ដើមចេញពីអំបូរសត្វតោភ្លើង ដែលត្រូវបានគេតាមប្រមាញ់ ព្រោះមនុស្សមានជំនឿថា ការបានផឹកឈាមរបស់សត្វមួយប្រភេទនេះ នឹងធ្វើឱ្យពួកគេមានជីវិតអមៈ។ ព្រោះតែការយាយីពីមនុស្ស សត្វតោភ្លើង ដែលសល់តែមួយក្បាល នៅលើផែនដី បានបង្ខំចិត្ត រត់ចេញពីដែនដីរបស់ខ្លួន ដើម្បីរក្សាជីវិត។
អ្នកនាង កែវ ណាវី កាន់លិខិតបញ្ជាក់ការសិក្សា
ប៉ុន្តែការរត់គេចនេះ បានធ្វើឱ្យសត្វតោភ្លើងត្រូវជាប់បណ្ដាសា ដែលត្រូវមានខ្លួនជាមនុស្ស តែមុខដូចជាសត្វតោទៅវិញ។ រៀងរាល់ថ្ងៃពេញបូណ៌មី តោភ្លើងនេះប្រែក្លាយជាសត្វតោពេញលក្ខណៈ ហើយទៅចាប់មនុស្សហត់ឈាម បូជាក្រោមពន្លឺព្រះចន្ទពេញវង់ ដើម្បីឱ្យគេមានរូបរាងជាមនុស្សពេញលក្ខណៈ។
អ្នកនិពន្ធឯករាជ ណាវី បន្ថែម៖«ប្រហែលជាគេគិតថា អ្នកនិពន្ធនឹងអ្នកផាត់មុខ មិនជាប់ទាក់ទងគ្នាទេ ប៉ុន្តែតាមពិតគឺជាប់។ បើអ្នកនិពន្ធមិនបានយល់ដឹង ពីបុគ្គលិកលក្ខណៈរបស់តួច្បាស់ ក៏ពិបាកនឹងស្រមៃឱ្យចេញជារឿងដែរ។ ការផាត់មុខ ក៏អ្នកនិពន្ធត្រូវតែដឹងដែរ ដើម្បីយើងអាចស្រមៃចេញរូបភាពដែលខ្លួនចង់បាន។ ទាំងអារម្មណ៍ ទាំងសម្លៀកបំពាក់ ទាំងស្បែកជើង និយាយរួម ស្ទើរតែគ្រប់ផ្នែក អ្នកនិពន្ធត្រូវតែមានចំណេះដឹងទាំងអស់ បើមិនបានច្រើន ក៏បានខ្លះៗដែរ ដើម្បីឱ្យការងារចេញលទ្ធផលបានល្អ»។
វិលមកអ្នក ពុធមូលីតា វិញ អ្នកនាងថា នេះគឺជាលើកទីមួយដែលខ្លួនបង្រៀនផាត់មុខបែបពិសេរសដោយផ្ទាល់ទៅកាន់សិស្ស។ ហើយទៅថ្ងៃមុខ អ្នកនាងនៅតែបន្តបង្រៀន និងចែករំលែកទៅកាន់កូនខ្មែរផ្សេងៗទៀត។
និយាយប្រកបដោយស្នាមញញឹម អ្នកនាង មូលីតា បន្ថែម៖«ពីមុខខ្ញុំធ្លាប់បង្រៀនដែរ តែបែបផាត់មុខស្អាតធម្មតា។ ក៏មានដែរបង្រៀនតាមអនឡាញ ប៉ុន្តែបង្រៀនផាត់បែបពិសេស ហើយបង្រៀនផ្ទាល់ នេះគឺជាលើកទីមួយ។ ខ្ញុំនឹងបង្រៀនបន្តទៀត ខ្ញុំមិនលាក់ចំណេះទេ ព្រោះដើម្បីវិស័យកុននៅប្រទេសយើងរីកចម្រើនដូចប្រទេសគេដែរ»។
ស្នាដៃរបស់សិក្ខាកាម
សូមបញ្ជាក់ថា នៅកម្ពុជា អ្នកមានជំនាញផាត់មុខបែបពិសេស ( Special Effect) ពុំសូវមានច្រើនឡើយ។ ដែលមានច្រើននោះ គឺអ្នកផាត់មុខបែបស្អាត ឬបែបធម្មជាតិ។ ទោះជាយ៉ាងណា ក្រោយពីបង្រៀនសិស្សបាន៨រូបក្នុងវគ្គខ្លីនេះ អ្នកនាង ឌូ ពុធមូលីតា សង្ឃឹមថា សិស្សរបស់ខ្លួនទាំងអស់ នឹងយកចំណេះនេះ ទៅចែករំលែកបន្តទៀត ដើម្បីឱ្យមានអ្នកចេះជំនាញនេះកាន់តែច្រើន ក្នុងប្រទេសកម្ពុជា៕