កែវ រំចង់ កំពុងហ្វឹកហាត់ដើម្បីសុខភាព និងពង្រឹងសមត្ថភាព និងបច្ចេកទេសឡើងវិញសិន ក្រោយពីរូបគេផ្អាកប្រកួត ហើយទទួលទានរបបអាហារ ដែលនាំឲ្យឡើងគីឡូធ្ងន់ជាងមុន។ «សុំសម្រាកផឹកប៊ីយ៉ែរ ចំនួន១ខែ បងប្អូនហាមហៅផឹក សុំហាត់កីឡាខ្លះ សុំអាធ្យាស្រ័យទុកជាមុនផងបងប្អូន» ។ រំចង់ បានបង្ហោះសារបែបនេះ ។
 

តាមរយៈផ្ដល់បទសម្ភាសជាមួយសារពត៌មានថ្មីៗ កែវ រំចង់ បានបញ្ជាក់ថា ការសម្រាកពីប្រកួតនេះ មិនមានន័យថា ខ្លួនបានបញ្ចប់អាជីព ជាអ្នកប្រដាល់នោះទេ តែខ្លួនត្រូវការពេលវេលាសម្រាប់ធ្វើរឿងផ្ទាល់ខ្លួនខ្លះ ។ «ខ្ញុំ និងវិលត្រឡប់មកប្រកួតវិញនៅឆ្នាំក្រោយ» ។ អ្នកប្រដាល់បាត់ដំបងរូបនេះ បាននិយាយដូច្នេះ ។
 

ចំពោះគម្រោងវិលត្រឡប់មកសង្វៀននៅឆ្នាំក្រោយ កីឡាករខេត្តបាត់ដំបងរូបនេះ មិនទាន់អាចប្រាប់បានទេ ថា ខ្លួនប្រកួតតែអន្ដរជាតិ ឬមួយថ្នាក់ជាតិឡើយ។
 

គួរបញ្ជាក់ថា កែវ រំចង់ បានសម្រាកពីប្រកួតប្រហែល២ឆ្នាំ ក្រោយពីរូបគេបានឈ្នះខ្សែក្រវ៉ាត់អន្ដរជាតិ ពីប្រទេសបារាំង ក្នុងប្រភេទទម្ងន់៦៣ និង៦៧គីឡូក្រាម ។ កីឡាកររូបនេះ ក៏មានជ័យលាភីជាច្រើនដែរ សម្រាប់ការប្រកួតក្នុងប្រទេស ដូចជាជើងឯកប្រចាំទូរទស្សន៍បាយន៍ ។ សម្រាប់ការប្រកួតចុងក្រោយ រូបគេបានយកឈ្នះលើ វង្ស ណយ ដោយពិន្ទុ ក្នុងការប្រកួតខារ៉ាបាវគុនខ្មែរ ។