អាម៉េរិក ចក្រភពអង់គ្លេស និងអូស្ត្រាលីនៅថ្ងៃទី៥ ខែមេសា បានប្រកាសចាប់ផ្តើមកិច្ចសហការរួមគ្នាអភិវឌ្ឍអាវុធល្បឿនលឿនជាងសំឡេង និងការពង្រឹងសមត្ថភាពសង្គ្រាមអេឡិចត្រូនិក។ ប្រទេសទាំងបី ក៏នឹងបន្តពង្រឹងកិច្ចសហប្រតិបត្តិការស៊ីជម្រៅបន្ថែមទៀតដើម្បីបង្កើនសមត្ថភាពការពារ និងសន្តិសុខទៅវិញទៅមក។
បន្ថែមពីលើការសាងសង់នាវាមុជទឹកដើរដោយថាមពលនុយក្លេអ៊ែរសម្រាប់អូស្ត្រាលី សម្ព័ន្ធភាពត្រីភាគីមានអាម៉េរិក អូស្ត្រាលី អង់គ្លេស (AUKUS) ក៏ងាកមកចាប់ដៃគ្នាអភិវឌ្ឍមីស៊ីលលឿនជាងសំឡេងមួយទៀត។ ក្នុងសេចក្ដីថ្លែងការណ៍រួមនៅថ្ងៃទី៥ ខែមេសា ប្រទេសទាំងបី ចាត់ទុកការរួមគ្នាអភិវឌ្ឍមីស៊ីលល្បឿនលឿននេះ ជាការពង្រឹងកិច្ចសហប្រតិបត្តិការបន្ថែមលើវិស័យជាច្រើនបន្ថែមទៀត ដែលបានព្រមព្រៀងគ្នារួចហើយនៅពេលបង្កើតសម្ព័ន្ធភាពនេះកាលពីខែកញ្ញា ឆ្នាំមុន។
«ពួកយើងបានប្តេជ្ញាចិត្តនៅថ្ងៃនេះដើម្បីចាប់ផ្តើមកិច្ចសហប្រតិបត្តិការត្រីភាគីថ្មីលើមីស៊ីលល្បឿនលឿនជាងសំឡេង, ប្រព័ន្ធការពារមីស៊ីលល្បឿនលឿនជាងសំឡេង, សមត្ថភាពសង្គ្រាមអេឡិចត្រូនិច ក៏ដូចជាការពង្រីកការចែករំលែកព័ត៌មាន និងការធ្វើឱ្យកិច្ចសហប្រតិបត្តិការលើការបង្កើតថ្មីសម្រាប់វិស័យការពារជាតិប្រទេសទាំងបីកាន់តែស៊ីជម្រៅ»។ សេចក្ដីថ្លែងការណ៍រួមបានបញ្ជាក់បែបនេះ ដោយបង្ហាញពីកិច្ចការដែលត្រូវធ្វើរួមគ្នាមានការពង្រឹងសមត្ថភាពក្នុងផ្នែកអ៊ីនធឺណេត, បញ្ញាសិប្បនិមិត្ត, បច្ចេកវិទ្យាកង់ទិច និងសមត្ថភាពការពារក្រោមសមុទ្រ។
សេចក្ដីថ្លែងការណ៍ដដែលនោះ អះអាងថា នៅពេលដែលប្រទេសទាំងបីរីកចម្រើនលើសមត្ថភាពការពារ និងសន្តិសុខ សមភាគីទាំងបី នឹងស្វែងរកឱកាសដើម្បីផ្សារភ្ជាប់សម្ព័ន្ធភាពនេះជាមួយសម្ព័ន្ធមិត្ត និងដៃគូជិតស្និទ្ធឯទៀតផងដែរ។
យ៉ាងណាមិញ ក្រោយការចេញសេចក្ដីថ្លែងការណ៍ខាងលើ តំណាងទីក្រុងប៉េកាំងប្រចាំអង្គការសហប្រជាជាតិ ក៏ចេញមករិះគន់ភា្លមដែរ។ អំឡុងសន្និសីទកាសែតមួយនៅថ្ងៃដដែល លោក Zhang Jun ព្រមានថា កិច្ចសហប្រតិបត្តិការលើមីស៊ីលរបស់សម្ព័ន្ធភាព AUKUS អាចនឹងបង្កជាវិបត្តិដូចជម្លោះនៅអ៊ុយក្រែន។ បើតាលោក Zhang បើមិនចង់មានវិបត្តិដូចនៅអ៊ុយក្រែន សម្ព័ន្ធភាព AUKUS មិនគួរបន្តកិច្ចសហប្រតិបត្តិការនេះឡើយ។
លេចជារូបនេះក្នុងកញ្ញា ឆ្នាំ២០២១ សម្ព័ន្ធ AUKUS បានចាប់ផ្តើមកិច្ចព្រមព្រៀងសន្តិសុខរបស់ខ្លួនអូស្ត្រាលីដោយការសាងសង់នាវាមុជទឹកដើរដោយថាមពលនុយក្លេអ៊ែរ។ យ៉ាងណាមិញ កិច្ចព្រមព្រៀងនាវាមុជទឹកនេះ ក៏បង្កជាភាពតានតឹងរវាងអូស្ត្រាលី និងបារាំង ដោយសារតែទីក្រុងកង់បេរ៉ាបានលុបចោលកិច្ចព្រមព្រៀងសាងសង់នាវាមុជទឹកតម្លៃរាប់ពាន់លានដុល្លារជាមួយក្រុមហ៊ុនបារាំង។
ចំណែកមីស៊ីលល្បឿនលឿនជាងសំឡេងអាចផ្ទុកក្បាលគ្រាប់នុយក្លេអ៊ែរដូចមីស៊ីលបាលីស្ទិកផងដែរ តែមីស៊ីលទំនើបនេះ មានល្បឿនលឿនជាងសំឡេងរហូតដល់៥ដងឯណោះ។ មីស៊ីលនេះ អាចវាយប្រហារចំគោលដៅយ៉ាងរហ័ស ហើយមិនងាយត្រូវប្រព័ន្ធការពារមីស៊ីលចាប់បាននោះឡើយ។ ប្រទេសដែលមានបច្ចេកជឿនលឿនក្នុងការផលិតមីស៊ីលប្រភេទនេះ គឺរុស្ស៊ី ខណៈចិនក៏កំពុងបង្កើន សមត្ថភាពរបស់ខ្លួនផងដែរ៕