អន្តរជាតិ
ក្រុមប្រទេសG20 បង្កើតឡើងដើម្បីដោះស្រាយវិបត្តិសេដ្ឋកិច្ចសកល និងពង្រឹងបទបញ្ញត្តិហិរញ្ញវត្ថុ កិច្ចប្រជុំថ្នាក់រដ្ឋមន្រ្តីហិរញ្ញវត្ថុនៃក្រុមប្រទេសមានសេដ្ឋកិច្ចជឿនលឿនទាំង ២០។ រូបភាព៖ G20
× បច្ចុប្បន្នកិច្ចប្រជុំក្រុមប្រទេសមានសេដ្ឋកិច្ចរីកចម្រើនទាំង២០(G20) កំពុងក្លាយជាប្រធានបទក្តៅគគុកនិងចម្រូងចម្រាសខ្លាំង ដោយសារវិបត្តិរុស្ស៊ី និងអ៊ុយក្រែន។ មេដឹកនាំបណ្តាប្រទេសមួយចំនួន បានជំរុញឱ្យក្រុមប្រទេសមួយនេះ ដករុស្ស៊ីចេញ ខណៈចិន បានបដិសេធសំណើនោះ។ មិនតែប៉ុណ្ណោះ ក្រុមប្រទេស G20 បានជួយផ្តល់វ៉ាក់សាំងបង្ការជំងឺកូវីដ-១៩ ផងដែរ ទៅបណ្តាប្រទេសក្រីក្រ ស្របពេលពិភពលោក កំពុងមានជំងឺឆ្លងសកល។
ក្រុមប្រទេសមានសេដ្ឋកិច្ចជឿនលឿនទាំង២០ (G20) ជាបណ្តុំនៃប្រទេសចំនួន ២០ ដែលមានសេដ្ឋកិច្ចរីកចម្រើនធំជាងគេលើពិភពលោក។ វាត្រូវបានបង្កើតឡើង នៅថ្ងៃទី២៥ ខែកញ្ញា ឆ្នាំ១៩៩០ ដើម្បីពិភាក្សាបញ្ហាសេដ្ឋកិច្ចសកល ដែលរងគ្រោះដោយវិបត្តិហិរញ្ញវត្ថុអាស៊ី។ បណ្តាសមាជិកនៃក្រុមប្រទេសនេះមានដូចជា អាហ្សង់ទីន អូស្រ្តាលី ប្រេស៊ីល កាណាដា ចិន បារាំង អាល្លឺម៉ង់ ឥណ្ឌា ឥណ្ឌូណេស៊ី អ៊ីតាលី ជប៉ុន កូរ៉េខាងត្បូង ម៉ិកស៊ិក រុស្ស៊ី អារ៉ាប៊ីសាអូឌីត អាហ្រ្វិកខាងត្បូង តួកគី អង់គ្លេស អាម៉េរិក និងសហភាពអឺរ៉ុប។
ក្រុមប្រទេសនេះដើមឡើយ ជាកិច្ចប្រជុំថ្នាក់រដ្ឋមន្រ្តីហិរញ្ញវត្ថុ និងទេសាភិបាលធនាគារកណ្តាលប៉ុណ្ណោះ ក្រោមកិច្ចពិភាក្សាលើគោលនយោបាយនានា ដែលអាចជួយដោះស្រាយវិបត្តិសេដ្ឋកិច្ច និងហិរញ្ញវត្ថុពិភពលោក។ ប៉ុន្តែចាប់តាំងពីឆ្នាំ ២០០៨ មក G20 ត្រូវបានរៀបចំឱ្យមានកិច្ចប្រជុំកំពូល ដោយមានវត្តមានមេដឹកនាំប្រទេសសមាជិក រដ្ឋមន្រ្តីហិរញ្ញវត្ថុ រដ្ឋមន្រ្តីការបរទេស និងមន្រ្តីជាន់ខ្ពស់ផ្សេងទៀត។ ក្នុងកិច្ចប្រជុំកំពូលនោះ ក៏មានការអញ្ជើញបណ្តាប្រទេសផ្សេងៗ អង្គការអន្តរជាតិ និងអង្គការមិនមែនរដ្ឋាភិបាល ចូលរួមជាភ្ញៀវផងដែរ ដោយអេស្ប៉ាញត្រូវបានអញ្ជើញជាភ្ញៀវអចិន្ត្រៃយ៍។
គោលបំណងរបស់ G20 ផ្តោតទៅលើ៣ចំណុចធំៗ ក្នុងនោះមានដូចជា សម្រួបសម្រួលគោលនយោបាយរវាងសមាជិកក្នុងក្រុម ដើម្បីសម្រេចបានស្ថិរភាពសេដ្ឋកិច្ចពិភពលោក និងកំណើនប្រកបដោយចីរភាព, ពង្រឹងបទបញ្ញត្តិហិរញ្ញវត្ថុដែលជួយកាត់បន្ថយហានិភ័យ និងបង្ការវិបត្តិហិរញ្ញវត្ថុនៅពេលអនាគត រួមទាំងបង្កើតប្រព័ន្ធហិរញ្ញវត្ថុអន្តរជាតិថ្មី។ ក្រៅពីបញ្ហាសេដ្ឋកិច្ច ក្រុមប្រទេសនេះ ក៏មានតួនាទីរកដំណោះស្រាយលើបញ្ហាបម្រែបម្រួលអាកាសធាតុ វិបត្តិសុខភាពសកល និងបញ្ហាផ្សេងទៀតផងដែរ។
ក្រុមប្រទេសមានសេដ្ឋកិច្ចរីកចម្រើនទាំង២០នេះ ដើរតួយ៉ាងសំខាន់ជាចលករជំរុញសេដ្ឋកិច្ចអន្តរជាតិ និងពាណិជ្ជកម្មដោយក្រុមប្រទេសនេះ តំណាងឱ្យ៨០ភាគរយនៃផលិតផលក្នុងស្រុកសរុប (GDP) របស់ពិភពលោក , ៧៥ភាគរយនៃពាណិជ្ជកម្មពិភពលោក និង៦០ភាគរយនៃចំនួនប្រជាជនសរុបលើពិភពលោក។
ប្រធានក្រុមប្រទេសមានសេដ្ឋកិច្ចរីកចម្រើនទាំង២០ តែងតែផ្លាស់ប្តូរវេនជារៀងរាល់ឆ្នាំដោយប្រទេសដែលកាន់តំណែងជាប្រធាន ត្រូវធ្វើការរួមជាមួយអ្នកកាន់តំណែងមុន និងអ្នកបន្តតំណាងដើម្បីរក្សានៅរបៀបវារៈ។ កិច្ចប្រជុំកំពូលរបស់ G20 តែងតែធ្វើឡើងរៀងរាល់មួយឆ្នាំម្តង ដោយនៅឆ្នាំ២០២២នេះ ឥណ្ឌូណេស៊ី កាន់តំណែងជាប្រធាន និងជាម្ចាស់ផ្ទះបើកកិច្ចប្រជុំដែលនឹងប្រារព្ធឡើងនាខែវិច្ឆិកាខាងមុខ ខណៈឆ្នាំ២០២៣ ឥណ្ឌានឹងធ្វើជាប្រធានប្តូរវេនម្តង៕
© រក្សាសិទ្ធិដោយ thmeythmey.com