អង្គការសម្ព័ន្ធមិត្តសត្វព្រៃ ធ្វើការនៅក្នុងប្រទេសកម្ពុជាយូរឆ្នាំហើយ ក្នុងនោះមានគម្រោងច្រើនដែលត្រូវបង្កើតឡើង ដើម្បីធ្វើយ៉ាងណាជួយស្ដារ និងធ្វើឱ្យជីវភាពកាន់តែប្រសើរ។ សកម្មភាពនោះ រួមបញ្ជូលទាំងការការពារព្រៃនៅតំបន់ជួរភ្នំក្រវាញ, គម្រោងថែរក្សា និងសង្គ្រោះសត្វព្រៃជុំវិញប្រទេសកម្ពុជា។
 

លោក និក ម៉ាក នាយកសង្រ្គោះ និងថែរក្សាសត្វព្រៃរបស់អង្គការសម្ព័ន្ធមិត្តសត្វព្រៃ បានលើកឡើងថា បច្ចុប្បន្នការងារការពារ សង្គ្រោះ និងបង្កាត់ពូជសត្វប្រភេទកម្រ ក្រុមការងាររបស់លោកនៅបន្តធ្វើធម្មតាជាប្រចាំ។ ជាមួយគ្នានេះ ដំណើរការមួយចំនួនធ្វើឡើងដោយរលូន និងមានខ្លះទៀតកំពុងជួបបញ្ហាប្រឈម ទាក់ទងកង្វះការចូលរួមពីមជ្ឈដ្ឋាននៅជុំវិញ។


 ទន្សោងក្នុងព្រៃសហគមន៍ការពារព្រៃឈើប្រាំបីមុម រូបភាពដោយ លោកទ្រី ស៉ីថេង

បើតាមលោក និក អង្គការរបស់លោកមានគម្រោងចំនួន​៣ដែលធ្វើការជាមួយសត្វព្រៃ។ ទីមួយ គម្រោងសង្គ្រោះសត្វព្រៃពីការប្រហាររបស់ព្រាន និងការជួញដូររបស់ឈ្មួញ, ទី២ មើលថែរក្សា ​និងជួយសត្វដែលមិនអាចដោះលែងចូលព្រៃវិញ និងទី៣ ការដោះលែងសត្វដែលសង្គ្រោះបានចូលទៅព្រៃធម្មជាតិ។
 

«​ការងារថែរក្សា​ និងសង្គ្រោះសត្វព្រៃជុំវិញប្រទេសកម្ពុជាមិនសម្រេចឡើយ ប្រសិនគ្មានឆន្ទៈ។  ទីណា មានសត្វត្រូវការជំនួយ យើងត្រូវទៅជួយមិនថាផ្លូវជិត ឬ​ឆ្ងាយ។ ការការពារជីវិតពួកវា ជារឿងចម្បងសម្រាប់ពួកយើង»។ លោក និក ពន្យល់បែបនេះនៅពេលអង្គុយជាប់មាត់ទឹក ក្នុងសួនសត្វភ្នំតាម៉ៅ ដោយលោកបន្ថែមថា រយៈពេលជាង១០ឆ្នាំចុងក្រោយការងារជាមួយសត្វព្រៃនៅតាមតំបន់មួយចំនួន ត្រូវបានការពារដោយពលរដ្ឋ​ និងសហគមន៍នៅតាមតំបន់នានា រួមជាមួយអង្គការ និងស្ថាប័នដៃគូ។ ក្រៅពីនេះ ទាក់ទងគម្រោងដោះលែង ក្រុមការងារបស់អង្គការបាន សហការនិងបានដោះលែងសត្វចូលព្រៃអង្គរ ព្រៃធម្មជាតិនៅខេត្តកោះកុង  ខេត្តកំពង់ស្ពឺ ពោធិ៍សាត់ និងខេត្តមួយចំនួនទៀត។
 

ជាង១០ឆ្នាំនេះ សត្វមិនក្រោមមួយម៉ឺនក្បាលនោះទេ ដែលត្រូវបានសង្គ្រោះ និងលេងចូលព្រៃធម្មជាតិ ព្រមទាំងបានបង្កើតកូនជាច្រើននៅក្នុងតំបន់ទាំងនោះ។ នាយកសង្រ្គោះ និងថែរក្សាសត្វព្រៃរូបនេះ បានលើកឡើងថា ទោះជាការងារដំណើរការរលូនច្រើនជាងបរាជ័យ ប៉ុន្ដែសម្រាប់សកម្មភាពនៃការអភិរក្ស និងសង្គ្រោះនៅតែប្រឈមបញ្ហា និងរាំងស្ទះដំណើរការមួយចំនួននៅឡើយ។ បញ្ហាដែលនៅជារនាំងសម្រាប់កិច្ចការពារកន្លងមកមានដូចជា តំបន់ខ្លះអន្ទាក់នៅជាបញ្ហាសម្រាប់ជីវិតសត្វនៅតាមព្រៃ ព្រោះខ្វះការចូលរួមពីពលរដ្ឋ ឬអាជ្ញាធរពាក់ព័ន្ធ ដែលជាសរសៃដ៏សំខាន់នៃកិច្ចការពារ រួមជាមួយការចូលរួម ដើម្បីឱ្យជីវិតពួកវានៅគង់រង្សក្នុងព្រៃធម្មជាតិ។​


 លោក និក ម៉ាក នាយកសង្រ្គោះ និងថែរក្សាសត្វព្រៃរបស់អង្គ​ការសម្ព័ន្ធមិត្តសត្វព្រៃ រូបភាពដោយ លោកទ្រី ស៉ីថេង

យ៉ាងណាមិញ លោក និក បានអះអាងថា អ្វីគួរឱ្យកត់សម្គាល់ប៉ុន្មានឆ្នាំចុងក្រោយនៅគម្រោងនៃការអភិរក្ស បង្កាត់ពូជ ព្រមជាមួយការដោះលែងសត្វព្រៃ អង្គការសម្ព័ន្ធមិត្តសត្វព្រៃ ជោគជ័យខ្លាំងនៅក្នុងព្រៃធម្មជាតិភ្នំតាម៉ៅ។ លោក និក បញ្ជាក់ច្បាស់ៗថា ​សត្វនៅព្រៃភ្នំតាម៉ៅកើតឡើងខ្លាំង នៅរយៈពេល១០ឆ្នាំនេះ ដោយវត្តមានសត្វព្រៃជាច្រើនប្រភេទកូនចៅពាស់ពេញព្រៃ ក្រោយក្រុមការងារបានលែងត្រលប់  បន្ទាប់ពីសង្គ្រោះពីតំបន់នានានៅក្នុងប្រទេសកម្ពុជា។ 
 

ទន្ទឹមជាការប្រឹងប្រែងលើកិច្ចការងារការពារ និងអភិរក្សសត្វព្រៃនៅក្នុងប្រទេសកម្ពុជា លោក និក សង្កេតឃើញថា វត្តមានសត្វព្រៃមួយចំនួននៅតាមតំបន់ការពារក្នុងសហគមន៍អាចរក្សាបាននូវសុវត្ថិភាព នឹងមានការកើនឡើងខ្លះៗ។ ជាក់ស្ដែង សត្វទន្សោងនៅសហគមន៍ព្រៃឈើប្រាំបីមុម ក្នុងខេត្តកំពង់ស្ពឺមានការកើនឡើង ចំណែកឯសត្វផ្សេងៗដោះលែងចូលព្រៃ ដូចជានៅក្នុងព្រៃអង្គរ ព្រៃខេត្តកោះកុង ចាប់ផ្តើមកើនដូចគ្នា៕