អន្តរជាតិ
លោក ហ្សេលេនស្គី៖ ទ័ពអ៊ុយក្រែនរៀនចេះប្រើអាវុធបានលឿន ឱ្យតែបញ្ជូនមកឱ្យ សព្វាវុធអាម៉េរិក បញ្ជូនទៅដល់អ៊ុយក្រែន។ រូបថត AFP
× ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី បានច្រានចោលការព្រួយបារម្ភរបស់មន្ត្រីអាម៉េរិក និងសម្ព័ន្ធយោធាណាតូពាក់ព័ន្ធសមត្ថភាពរបស់កងទ័ពអ៊ុយក្រែនក្នុងការប្រើប្រាស់សព្វាវុធទំនើបៗ។ លោក ហ្សេលេនស្គី ប្រាប់ទូរទស្សន៍ CNN ក្នុងកិច្ចសម្ភាសមួយថា ទាហានអ៊ុយក្រែនអាចរៀនប្រើអាវុធទំនើបទាំងនោះបានលឿនដូចច្នេះប្រទេសទាំងនោះគ្រាន់តែបញ្ជូនអាវុធមកកាន់អ៊ុយក្រែនឱ្យទាន់ពេលត្រូវការ។
ដើម្បីទប់ទល់កងទ័ពរុស្ស៊ី អ៊ុយក្រែន បានស្នើឱ្យអាម៉េរិក និងបស្ចិមប្រទេសបញ្ជូនអាវុធទំនើបៗឱ្យខ្លួនដូចជារថក្រោះ កាំភ្លើងធំ និងយន្តហោះជាដើម។ អាម៉េរិក ក៏បានបញ្ជូនអាវុធជាច្រើនមុខឱ្យអ៊ុយក្រែនរួចដែរមានមីស៊ីលប្រឆាំងរថក្រោះជាអាទិ៍។ យ៉ាងណាមិញ មន្ត្រីអាម៉េរិក និងសម្ព័ន្ធយោធាណាតូធ្លាប់បារម្ភទាហានអ៊ុយក្រែនត្រូវចំណាយពេលយូរក្នុងការហ្វឹកហាត់ប្រើប្រាស់អាវុធទំនើបៗទាំងនោះ ឬអាវុធទាំងនោះធ្លាក់ក្នុងដៃរុស្ស៊ីអំឡុងពេលចែកចាយ។
ក្នុងបទសម្ភាសជាមួយអ្នកយកព័ត៌មានរបស់ទូរទស្សន៍ CNN កាលពីចុងសប្ដាហ៍មុន មេដឹកនាំអ៊ុយក្រែន វ៉ូឡូឌីមៀ ហ្សេលេនស្គី បានបដិសេធរាល់ការបារម្ភទាំងនេះ ទោះយោធាអ៊ុយក្រែនមិនធ្លាប់ប្រើ និងមិនធ្លាប់មានពីមុនមកក្ដី។
«ពួកយើងបានត្រៀមខ្លួនក្នុងការប្រើអាវុធប្រភេទណាក៏ដោយ ប៉ុន្តែវាត្រូវដឹកមកអ៊ុយក្រែនយ៉ាងឆាប់រហ័ស។ ពួកយើងមានសមត្ថភាពក្នុងការរៀនប្រើឧបករណ៍ថ្មីៗ ប៉ុន្តែវាត្រូវការមកកាន់តែលឿន»។ លោក ហ្សេលេនស្គី បានសង្កត់ធ្ងន់បែបនេះរួចបន្តថា ជំនួយយោធារបស់អាម៉េរិក និងប្រទេសផ្សេងៗរួមទាំងជំនួយយោធារបស់រដ្ឋបាលក្រុងវ៉ាស៊ីនតោន បៃឌិនថ្មីចំនួន៨០០លានដុល្លារបានជួយជ្រោមជ្រែងឱ្យអ៊ុយក្រែនតតាំងនឹងរុស្ស៊ី តែលោកក៏សង្ឃឹមទទួលបានជំនួយបន្ថែមទៀតដែលលឿនទាន់ពេល។
ប្រមុខរដ្ឋអ៊ុយក្រែនរូបនេះ ក៏បានបញ្ជាក់ថែមថា គ្រូបង្វឹកប្រើប្រាស់អាវុធទំនើបទាំងនោះបានរៀបចំខ្លួនរួចជាស្រេចក្នុងការបង្ហាត់កងទ័ព ដូចជាយន្តហោះចម្បាំងដែលកងកម្លាំងអាចរៀនក្នុងរយៈពេលតែពីរសប្ដាហ៍ប៉ុណ្ណោះ។ លើសពីនេះ យោធាអ៊ុយក្រែនមួយចំនួនអាចប្រើប្រាស់អាវុធទំនើបៗដូចជា ដ្រូន Kamikaze កាំងភ្លើងធំ Howitzers ឬប្រព័ន្ធបាញ់គ្រាប់រ៉ុក្កែតចម្រុះ (MLRS) ដែលស្មុគស្មាញដោយសារពួកគេធ្លាប់បានហ្វឹកហាត់ជាមួយកម្លាំងសម្ព័ន្ធយោធាណាតូពីមុនមក។
នៅថ្ងៃទី១៨ ខែមេសា មន្ត្រីការពារជាតិអាម៉េរិកបានលើកឡើងថា យោធាអាម៉េរិកនឹងបង្វឹកកងកម្លាំងអ៊ុយក្រែនក្នុងដើម្បីប្រើប្រាស់កាំភ្លើងធំ Howitzer នៅប៉ុន្មានថ្ងៃខាងមុខទៀត តែការហ្វឹកហាត់នេះនឹងធ្វើឡើងក្រៅទឹកដីអ៊ុយក្រែន។ អាម៉េរិក ក៏កំពុងរៀបចំផែនការបង្រៀនក្រុមអ្នកបង្វឹកអ៊ុយក្រែនអំពីរបៀបប្រើប្រាស់អាវុធថ្មីមួយចំនួនដូចជាប្រព័ន្ធរ៉ាដាដើម្បីឱ្យពួកគេបន្តបង្ហាត់កងកម្លាំងផ្សេងៗទៀត៕
© រក្សាសិទ្ធិដោយ thmeythmey.com