ក្លិបអង្គរថាយហ្គឺរប្រាប់ពីមូលហេតុដែលឈានដល់បញ្ចប់កិច្ចសន្យារបស់កីឡាករ ស្រាំង ទិត្យឈី

កីឡាជាតិ

ជាតិ

ក្លិបអង្គរថាយហ្គឺរប្រាប់ពីមូលហេតុដែលឈានដល់បញ្ចប់កិច្ចសន្យារបស់កីឡាករ ស្រាំង ទិត្យឈី

19, Apr 2022 , 5:04 pm

រូបភាព

រូបអតីតខ្សែការពារ ស្រាំង ទិត្យឈី រូបពីក្លិប អង្គរថាយហ្គឺរ

ដោយ: គឹម មករា

ក្លិបអង្គរថាយហ្គឺរ កាលពីថ្ងៃទី១៩ ខែមេសា បានចេញសេចក្តីថ្លែងការណ៍ពាក់ព័ន្ធនឹងករណីកីឡាករ ស្រាំង ទិត្យឈី ដែលត្រូវ បានបញ្ចប់កិច្ចសន្យា។ លិខិតនេះ ធ្វើឡើងមួយថ្ងៃ បន្ទាប់ពីខ្សែការពារអាយុ២៤ឆ្នាំ បានសរសេរនៅ លើបណ្តាញសង្គមដើម្បី ស្នើទៅសហព័ន្ធកីឡាបាល់ទាត់ (FFC) ជួយអន្តរាគមន៍ករណីក្លិបមិនគោរពកិច្ចសន្យាខ្លួន។ ប្រធានក្លិបអង្គរថាយហ្គឺរ បានលើកឡើងពីការទៅហ្វឹកហាត់យឺតយ៉ាវ និងការឈប់សម្រាកដោយគ្មានហេតុផល ហើយថា នេះជាទង្វើដដែលៗរបស់ កីឡាករ ស្រាំង ទិត្យឈី។

នៅលើគណនីហ្វេសប៊ុករបស់ខ្លួន ស្រាំង ទិត្យឈី បានរៀបរាប់ថា គេត្រូវបានប្រាក់៣ខែនៃកិច្ចសន្យា២ឆ្នាំ ប៉ុន្តែតាមពិត ទទួលបានត្រឹមតែ៥ភាគរយប៉ុណ្ណោះនៃកិច្ចសន្យា។ ដោយមិនបានរៀបរាប់លម្អិត ខ្សែការពាររូបនេះ បានចាត់ទុកការសម្រេចរបស់ក្លិបអង្គរថាយហ្គឺរថា ដូចជាការបំផ្លាញអនាគតបាល់ទាត់ខ្លួន។ គេបានទទូចសុំ FFC ជួយអន្តរាគមន៍ និងស្នើឲ្យអ្នកគាំទ្រចែករំលែកព័ត៌មានរបស់ខ្លួន។

ជាការឆ្លើយតប ម្ចាស់ក្លិបជនជាតិជប៉ុន លោក Akhiro Kato បានចេញសេចក្តីថ្លែងការណ៍ដើម្បីរៀបរាប់ទាក់ទងនឹងការ សម្រេចរបស់ក្លិប។ លោកបានពន្យល់ថា កន្លងមក ក្លិបបានណែនាំជារឿយៗចំពោះការទៅហ្វឹកហាត់យឺតយ៉ាវ និងការឈប់សម្រាកដោយគ្មានហេតុផលច្បាស់លាស់ ដែលចាត់ទុកថា ជាការមិនគោរពវិន័យ ប៉ុន្តែទង្វើបែបនេះ នៅតែបន្តកើតឡើងដដែលៗចំពោះ ស្រាំង ទិត្យឈី។

បើតាម លោក Akhiro Kato ក្នុងកិច្ចសន្យារវាងក្លិប និងកីឡាករ ក្លិបមានសិទ្ធិលុបចោលកិច្ចសន្យាដោយគ្មានសំណង ប្រសិន បើអាកប្បកិរិយារបស់កីឡាករ មិនសមរម្យចំពោះក្លិប ឬបន្ទាប់ពីទទួលបានការព្រមានជាលើកចុងក្រោយ។ ប្រធានក្លិប រូបនេះ បានបញ្ជាក់ថា ក្លិបបានព្យាយាមចរចាជាច្រើនដង និងយល់ព្រមបន្តកិច្ចសន្យា បើ ទិត្យឈី ទទួលស្គាល់កំហុស ប៉ុន្តែគេមិនកែប្រែនោះឡើយ ទើបឈានដល់ការបញ្ចប់កិច្ចសន្យាដោយគ្មានប្រាក់សំណងដូចដែលមានចែងក្នុងកិច្ចសន្យា។

លោកបានអះអាងថា ក្លិបមិនប្រកាសជាសាធារណៈទាក់ទងនឹងការសម្រេចកន្លងមករបស់ខ្លួន គឺដោយសារតែក្លិបមានគោលបំណងរក្សាកិត្តិយសជូនកីឡាករ និងមិនចង់បង្ករផលលំបាកសម្រាប់គេក្នុងការស្វែងរកក្លិបថ្មី ប៉ុន្តែបានផ្លាស់ប្តូរជំហររបស់ខ្លួន ក្រោយ ទិត្យឈី បង្ហោះសារនៅលើបណ្តាញសង្គមហ្វេសប៊ុក ដែលអាចធ្វើឲ្យអ្នកគាំទ្រមានការយល់ច្រលំទៅលើក្លិប។

«ក្លិបនឹងនៅតែបន្តខិតខំពង្រឹងគោលជំហរ ជាក្លិបអាជីព ហើយក៏ព្យាយាមក្នុងការណែនាំដល់កីឡាករក្លិបថាអ្វីដែលហៅថា បាល់ទាត់អាជីពនៃលីគកំពូលកម្ពុជា ដើម្បីឲ្យវិស័យបាល់ទាត់របស់ជាតិយើងកាន់់តែដើរទៅមុខបន្តទៀត»។ នេះបើតាមការបញ្ជាក់ក្នុងសេចក្តីថ្លែងការណ៍របស់ក្លិបដែលមានមូលដ្ឋាននៅខេត្តសៀមរាប។

ក្រោយអានសេចក្តីប្រកាសព័ត៌មានរបស់ក្លិប ស្រាំង ទិត្យឈី បានប្រតិកម្មតបវិញថា ខ្លួនមិនដែលបាន ឃើញលិខិតព្រមាន ចុងក្រោយនោះឡើយ។ គេបានសរសេរយ៉ាងដូច្នេះថា៖ «សុំមើលលិខិតព្រមានលោកប្រធាន បន្តិចមក ហើយសុំមើលការចរចារបស់លោកប្រធាន និង GM ក្លិបបន្តិចមក»។ កីឡាកររូបនេះ បានបញ្ជាក់ថា ទាំងប្រធានក្លិប និងអគ្គលេខាធិការ និយាយតែការងាររួមតាមអនឡាញ។

ស្រាំង ទិត្យឈី ជាអតីតកីឡាករយុវជនពីខេត្តស្ទឹងត្រែង មុននឹងចូលរួមជាមួយអង្គរថាយហ្គឺរ កាលពីចុងឆ្នាំ២០២០។ គេធ្លាប់ឆ្លងកាត់លេងឲ្យក្លិបមួយចំនួន ដូចជាភ្នំពេញក្រោន បឹងកេត អគ្គិសនីកម្ពុជា និងវិសាខា។ កាលពីឆ្នាំ២០១៧ គេក៏ធ្លាប់លេងក្នុងលក្ខខណ្ឌខ្ចីជើងនៅ Cambodian Tiger (ឈ្មោះដើមរបស់អង្គរថាយហ្គឺរ) ផងដែរ៕