អន្តរជាតិ
មន្រ្តីអាម៉េរិក នឹងទៅកោះសូឡូម៉ុន ស្របពេលបារម្ភពីកិច្ចព្រមព្រៀងសន្តិសុខជាមួយចិន នាយករដ្ឋមន្ត្រីកោះសូឡូម៉ុន Manasseh Sogavare ។ រូបថត AFP
× មន្រ្តីការទូតជាន់ខ្ពស់ នឹងទៅទស្សនកិច្ចនៅកោះសូឡូម៉ុន ចំពេលអាម៉េរិក និងសម្ព័ន្ធមិត្តរបស់ខ្លួននៅតំបន់ប៉ាស៊ីហ្វិកបង្ហាញក្ដីពីកិច្ចព្រមព្រៀងសន្តិសុខរវាងកោះសូឡូម៉ុន និងចិន។ យ៉ាងណាមិញ ប្រទេសកោះនេះ ហាក់មិនអើពើសំឡេងរបស់លោកខាងលិចឡើយ ខណៈចិនឯណោះប្រកាសថា កិច្ចព្រមព្រៀងចម្រូងចម្រាសនេះ ត្រូវបានចុះហត្ថលេខាទៅហើយ។
កិច្ចព្រមព្រៀងសហប្រតិបត្តិការផ្នែកសន្តិសុខរវាងកោះសូឡូម៉ុននិងចិន រងការប្រឆាំងយ៉ាងខ្លាំងពីសំណាក់អាម៉េរិក អូស្ត្រាលី និងនូវែលសេឡង់។ ក្រោមកិច្ចព្រមព្រៀងនេះ ចិនអាចបញ្ជូនប៉ូលិស យោធា និងកងកម្លាំងសន្តិសុខទៅជួយរក្សាសណ្ឋាប់ធ្នាប់សង្គម និងមូលហេតុផ្សេងទៀតនៅដែនកោះមួយនេះ។
កាលពីសប្តាហ៍មុន រដ្ឋមន្រ្តីទទួលបន្ទុកអភិវឌ្ឍអន្តរជាតិ និងប៉ាស៊ីហ្វិករបស់អូស្ត្រាលី Zed Seselja បានធ្វើដំណើរទៅកាន់រដ្ឋធានី Honiara ហើយស្នើឱ្យនាយករដ្ឋមន្រ្តីកោះសូឡូម៉ុន Manasseh Sogavare កុំចុះហត្ថលេខាលើកិច្ចព្រមព្រៀងសន្តិសុខជាមួយចិន។
ជាមួយគ្នានេះ នៅថ្ងៃទី១៨ខែមេសា សេតវិមានអាម៉េរិកក៏បានប្រកាសថា មន្រ្តីសម្របសម្រួលកិច្ចការឥណ្ឌូ-ប៉ាស៊ីហ្វិករបស់សេតវិមាន Kurt Campbell និងមន្រ្តីជាន់ខ្ពស់របស់ក្រសួងការបរទេសអាម៉េរិកប្រចាំតំបន់អាស៊ី នឹងធ្វើដំណើរទៅកាន់កោះសូឡូម៉ុននៅសប្តាហ៍នេះដើម្បីពិភាក្សាពីបញ្ហាឥទ្ធិពលរបស់ចិន និងការបើកស្ថានទូតអាម៉េរិកឡើងវិញ។ យ៉ាងណាមិញ ការប្រឹងប្រែងរបស់អាម៉េរិក និងសម្ព័ន្ធមិត្តរបស់ខ្លួន ទំនងរងបរាជ័យទៅហើយ។
នាសន្និសីទសារព័ត៌មានថ្ងៃទី១៩ ខែមេសា អ្នកនាំពាក្យក្រសួងការបរទេសចិន Wang Wenbin បញ្ជាក់ថា កិច្ចព្រមព្រៀងសន្តិសុខជាមួយកោះសូឡូម៉ុន ត្រូវបានចុះហត្ថលេខារួចហើយ។ ប៉ុន្តែលោកមិនបានបញ្ជាក់ពីព័ត៌មានលម្អិត និងកាលបរិច្ឆេទការចុះហត្ថលេខាឡើយ។
ចំណែកអាជ្ញាធរកោះសូឡូម៉ុនវិញ អះអាងថា ក្រសួងការបទេសចិន នឹងធ្វើដំណើរទៅកាន់ក្រុង Honiara នៅពាក់កណ្តាលខែឧសភា ដើម្បីចុះហត្ថលេខាលើកិច្ចព្រមព្រៀងពហុភាគីនិងកិច្ចសហប្រតិបត្តិការជាមួយរដ្ឋាភិបាលកោះសូឡូម៉ុន។ លោក Douglas Ete ប្រធានគណៈកម្មាធិការគណនេយ្យសាធារណៈនៃសភាកោះសូឡូម៉ុន ប្រាប់សភានៅថ្ងៃទី១៩ ខែមេសា ថា ដំណើរទស្សនកិច្ចរបស់ចិននៅខែក្រោយ គឺសំដៅលើការបង្កើនកិច្ចសហប្រតិបត្តិការលើវិស័យពាណិជ្ជកម្ម អប់រំ និងជលផលប៉ុណ្ណោះ៕
Tag:
អាម៉េរិក
ចិន
កោះសូឡូម៉ុន
© រក្សាសិទ្ធិដោយ thmeythmey.com