បន្ទាប់ពីរុស្ស៊ីឈ្លានពាននៅចុងខែកុម្ភៈ អ៊ុយក្រែនបានស្នើសុំបណ្តាប្រទេសលោកខាងលិចឱ្យផ្តល់យន្តហោះចម្បាំងប្រភេទ MiG-29 ដែលផលិតក្នុងសម័យសហភាពសូវៀត ដោយសារតែអ្នកបើកបរយន្តហោះអ៊ុយក្រែន អាចបើកបរយន្តហោះចម្បាំងប្រភេទនេះបាន។ ក្នុងកិច្ចសម្ភាសជាមួយអ្នកសារព័ត៌មាននៅថ្ងៃទី១៩ ខែមេសា លោក John Kirby អ្នកនាំពាក្យក្រសួងការពារជាតិអាម៉េរិក បានអះអាងថា កម្លាំងទ័ពអ៊ុយក្រែនពេលនេះ មានយន្តហោះចម្បាំងច្រើនជាងពីរសប្តាហ៍មុន។ 

 

«ពួកគេ(អ៊ុយក្រែន) បានទទួលយន្តហោះចម្បាំង ​និងគ្រឿងបរិក្ខារយន្តហោះចម្បាំងបន្ថែម ដើម្បីជួយឱ្យអ៊ុយក្រែនមានយន្តហោះចម្បាំងកាន់តែច្រើននៅក្នុងដែនអាកាស»។ លោក Kirby បានសង្កត់ធ្ងន់បែបនេះ ប៉ុន្តែលោកមិនបានបញ្ជាក់ពីប្រភេទយន្តហោះចម្បាំង និងប្រទេសដែលផ្តល់យន្តហោះចម្បាំងឱ្យឡើយ ដោយគ្រាន់តែបង្ហើបយន្តហោះចម្បាំងទាំងនោះផលិតក្នុងសម័យសហភាពសូវៀតប៉ុណ្ណោះ។ 

 

ទន្ទឹមនេះ មន្រ្តីអាម៉េរិករូបនេះ បានបន្តថា ក្រុងវ៉ាស៊ីនតោន មិនបានផ្តល់យន្តហោះចម្បាំងទៅក្រុងកៀវទាំងមូលឡើយ ប៉ុន្តែមានគ្រឿងបរិក្ខារខ្លះប៉ុណ្ណោះ។ 

 

នៅដើមខែមីនាកន្លងមក អាម៉េរិក​ ក៏បានពិភាក្សាការផ្ទេរយន្តហោះចម្បាំងជាមួយប៉ូឡូញឱ្យអ៊ុយក្រែនដែរ ប៉ុន្តែក្រោយមកត្រូវបានលុបចោលវិញ ដោយសារបារម្ភពីការពាក់ព័ន្ធរបស់សម្ព័ន្ធយោធាណាតូទៅក្នុងសង្រ្គាមនៅអ៊ុយក្រែន។ 

 

សូមបញ្ជាក់ថា ការប្រកាសពីការទទួលបានយន្តហោះចម្បាំងរបស់អ៊ុយក្រែន ធ្វើឡើងតែមួយសប្តាហ៍ប៉ុណ្ណោះ បន្ទាប់ពីប្រធានាធិបតីអាម៉េរិក បានបញ្ចេញកញ្ចប់ជំនួយយោធា​ក្នុងទំហំទឹកប្រាក់ ៨០០លានដុល្លារឱ្យអ៊ុយក្រែន៕