កិច្ចព្រមព្រៀងសន្តិសុខ ​ដែលត្រូវបានប្រកាសដោយទីក្រុងប៉េកាំងនៅថ្ងៃទី១៩ ខែមេសា បានប្រឈមនឹងការរិះគន់យ៉ាងខ្លាំងពីអាម៉េរិក និងអូស្ត្រាលី ដោយប្រទេសទាំងពីរបារម្ភថា កិច្ចព្រមព្រៀងនេះ អាចធ្វើឱ្យចិនមានមូលដ្ឋានយោធានៅតំបន់ប៉ាស៊ីហ្វិកខាងត្បូង។

 

ទាក់ទិននឹងបញ្ហាខាងលើ នាយករដ្ឋមន្ត្រីកោះសូឡូម៉ុន លោក Manasseh Sogavare បាននិយាយការពារថា លោកបានយល់ច្បាស់ពីកិច្ចព្រមព្រៀងនេះ មុននឹងចុះហត្ថលេខា។ លើសពីនេះ លោក Sogavare បានប្រាប់សភាសូឡូម៉ុន​ថា វាគឺជាកិត្តិយសក្នុងការប្រកាសថា កិច្ចព្រមព្រៀងសន្តិសុខ ត្រូវបានចុះហត្ថលេខាដោយមន្ត្រីនៅទីក្រុង Honiara និងប៉េកាំង នៅប៉ុន្មានថ្ងៃមុន។

 

«ខ្ញុំធានាដល់ប្រជាជនកោះសូឡូម៉ុនថា យើងបានចុះកិច្ចព្រមព្រៀងជាមួយចិន ដោយយល់ច្បាស់ពីលទ្ធផល និងស្របតាមផលប្រយោជន៍ជាតិ»។ លោក Sogavare បានប្រាប់សភាបែបនេះ នៅថ្ងែទី ២០​ ខែមេសា។ មេដឹកនាំកោះសូឡូម៉ុន ក៏បានស្នើឱ្យប្រទេសអ្នកជិតខាង និងដៃគូទាំងអស់គោរពផលប្រយោជន៍ រួមទាំងអធិបតេយ្យភាពរបស់កោះសូឡូម៉ុនផង។

 

លោក Sogavare បាន​បដិសេធ​មិន​ប្រាប់​មេ​បក្ស​ប្រឆាំងក្នុងប្រទេសពីខ្លឹមសារលម្អិតនៃកិច្ចព្រមព្រៀង និងពេលវេលាជាក់លាក់ដែលកិច្ចព្រមព្រៀង នឹងត្រូវ​ផ្សព្វផ្សាយ​ជា​សាធារណៈឡើយ។ កន្លងមកសូឡូម៉ុន ធ្លាប់បានចុះកិច្ចព្រមព្រៀងសន្តិសុខទ្វេភាគីមួយជាមួយអូស្ត្រាលីក្នុងឆ្នាំ ២០១៧ ហើយចូលជាធរមាននៅឆ្នាំបន្ទាប់។

 

កន្លងមក សេចក្តីព្រាងនៃកិច្ចព្រមព្រៀងចិន កោះសូឡូម៉ូន បានធ្វើឱ្យមានការភ្ញាក់ផ្អើលពាសពេញតំបន់ នៅពេលដែលវាត្រូវបានលេចធ្លាយកាលពីខែមុន ជាពិសេសវិធានការដែលអនុញ្ញាតឱ្យចិនដាក់ពង្រាយកងទ័ពជើងទឹកចិននៅប្រទេសក្នុងតំបន់ប៉ាស៊ីហ្វិកនេះ ដែលមានចម្ងាយតិចជាង ២ ពាន់ គីឡូម៉ែត្រពីអូស្ត្រាលី។

 

ក្រោយការលេចធ្លាយនៃសេចក្តីព្រាងនៃកិច្ចព្រមព្រៀងនេះ អាម៉េរិក និងអូស្រ្តាលី បានបង្ហាញការព្រួយបារម្ភយ៉ាងខ្លាំង រួមទាំងបានបញ្ជូនមន្ត្រីទៅធ្វើទស្សនកិច្ច ដើម្បីព្យាយាមរារាំងកិច្ចព្រមព្រៀងនេះមិនឱ្យកើតឡើង តែបានទទួលបរាជ័យ។ កន្លងមក អាម៉េរិកធ្លាប់បានសន្យាថានឹងបើកស្ថានទូតរបស់ខ្លួនឡើងវិញនៅកោះ សាឡូម៉ូន ដែលត្រូវបានបិទតាំងពីឆ្នាំ ១៩៩៣​ មក៕