អន្តរជាតិ
ចិនថា មិនទាន់មានតម្រុយពីមូលហេតុធ្លាក់យន្តហោះឡើយ ខណៈប្រអប់ខ្មៅខូចខាតធ្ងន់ធ្ងរ ក្រុមសង្រ្គោះ កំពុងរុករកប្រអប់ខ្មៅយន្តហោះ Boeing របស់អាកាសចរណ៍ China Eastern ។ រូបថត Xinhua
× អាជ្ញាធរអាកាសចរណ៍ស៊ីវិលរបស់ចិននៅថ្ងៃទី២០ ខែមេសា ប្រកាសថា ប្រអប់ខ្មៅពីររបស់យន្តហោះ Boeing 737-800 របស់អាកាសចរណ៍ China Eastern ដែលបានធ្លាក់កាលពីខែមីនា មានសភាពខូតខាតធ្ងន់ធ្ងរ។ បច្ចុប្បន្ននេះ ក្រុមការងារ កំពុងជុសជុលនិងវិភាគទិន្នន័យដើម្បីកំណត់រកមូលហេតុនៃការធ្លាក់។
កាលពីថ្ងៃទី២១ខែមីនា ជើងហោះហើររបស់អាកាសចរណ៍ China Eastern ដែលបានធ្វើដំណើរពីក្រុងឃុនមីងទៅកាន់គ័ងចូវ ត្រូវបានធ្លាក់ដាំក្បាលចុះមកដីនៅតំបន់ភ្នំក្នុងខេត្តគ័ងស៊ី ដែលបណ្តាលឱ្យមនុស្សលើយន្តហោះទាំងអស់ប្រមាណ១៣២នាក់ បានបាត់បង់ជីវិត។ ឧបទ្ទវហេតុធ្លាក់យន្តហោះនេះ ជាការធ្លាក់លើកដំបូងហើយនៅចិនបើគិតចាប់តាំងពីឆ្នាំ២០១០ មក។
ក្នុងរបាយការណ៍សង្ខេបបឋមលើការធ្លាក់យន្តហោះចេញនៅថ្ងៃទី២០ខែមីនា រដ្ឋបាលអាកាសចរណ៍ស៊ីវិលចិន (CAAC) មិនបានបញ្ចូលព័ត៌មាន ឬទិន្នន័យណាមួយពីប្រអប់ថតសំឡេង និងផ្ទុកទិន្នន័យក្នុងបន្ទប់អ្នកបើកបរយន្តហោះឡើយ។ បើតាម CAAC ប្រអប់ខ្មៅពីរដែលផ្ទុកព័ត៌មានក្នុងយន្តហោះនោះ រងការខូតខាតខ្លាំងដោយសារប៉ះទង្គិចធ្ងន់ធ្ងរ។ ប៉ុន្តែការស្រង់ទិន្នន័យឡើងវិញ និងការវិភាគ កំពុងតែដំណើរការ។
«វាមានបញ្ហាលំបាកជាច្រើនក្នុងការស៊ើបអង្កេតគ្រោះថ្នាក់នេះ ហើយឥឡូវនេះ ព័ស្តុតាងដែលយើងមាន នៅមានកម្រិតនៅឡើយ។» លោក លី យ៉ុង អនុប្រធានការិយាល័យសុវត្ថិភាពអាកាសចរណ៍របស់ CAAC បានថ្លែងបែបនេះក្នុងបទសម្ភាសជាមួយទីភ្នាក់ងារព័ត៌មាន Xinhua ។
ជារឿយៗ គ្រោះថ្នាក់នៃការធ្លាក់យន្តហោះ អាចកើតមកពីបញ្ហាបច្ចេកទេស និងសកម្មភាពបង្កឡើងដោយមនុស្ស។ ត្រង់នេះ CAAC អះអាងថា ក្រុមអាកាសយានិកនៅលើយន្តហោះសុទ្ធតែមានគុណសម្បត្តិគ្រប់គ្រាន់ ឯយន្តហោះក៏ត្រូវបានត្រួតពិនិត្យត្រឹមត្រូវ អាកាសធាតុក៏ល្អ និងមិនមានសារធាតុផ្ទុះនៅលើយន្តហោះឡើយ។
អាជ្ញធរអាកាសចរណ៍ លើកឡើងទៀតថា ខ្លួនបានបញ្ចប់របាយការណ៍បឋមហើយ ដែលតាមច្បាប់អន្តរជាតិត្រូវបញ្ចូនទៅកាន់ទីភ្នាក់ងារអាកាសចរណ៍របស់អង្គការសហប្រជាជាតិ (ICAO) ក្នុងរយៈពេល៣០ថ្ងៃ។ ចំណែក របាយការណ៍សន្និដ្ឋានចុងក្រោយ អាចចំណាយពេលមួយឆ្នាំ ឬច្រើនជាងនេះដើម្បីបញ្ចប់។
សូមបញ្ជាក់ថា បន្ទាប់ពីគ្រោះថ្នាក់ធ្លាក់យន្តហោះកាលពីខែមីនាមក អាកាសចរណ៍ China Easternបានផ្អាកយន្តហោះប្រភេទ Boeing 737-800 របស់ខ្លួនទាំងអស់ប្រមាណ២២៣គ្រឿងពីការហោះហើរ ប៉ុន្តែ ត្រូវបានបើកឱ្យដំណើរការឡើងវិញតាំងថ្ងៃទី១៧ ខែមេសាមក៕
© រក្សាសិទ្ធិដោយ thmeythmey.com