ចាប់តាំងពីសង្រ្គាមអ៊ុយក្រែនផ្ទុះឡើង អាម៉េរិក រួមទាំងសម្ព័ន្ធមិត្ត បានប្រកាសផ្តល់ជំនួយយោធា និងសេដ្ឋកិច្ចក្នុងទំហំជាច្រើនពាន់លានដុល្លារ ទៅឱ្យអ៊ុយក្រែនជាបន្តបន្ទាប់ ដើម្បីជួយប្រទេសនៅអឺរ៉ុបខាងកើតមួយនេះទប់ទល់នឹងការវាយប្រហាររបស់រុស្ស៊ី ក៏ដូចជាជួយប្រជាជនស៊ីវិល ដែលរងគ្រោះដោយសារសង្រ្គាម។ ជាថ្មីម្តងទៀត អាម៉េរិក បានសម្រេចផ្តល់កញ្ចប់ជំនួយយោធា និងសេដ្ឋកិច្ច ក្នុងទំហំ ១,៣ពាន់លានដុល្លារ ដោយជំនួយយោធាមានចំនួន ៨០០លានដុល្លារ និងជំនួយសេដ្ឋកិច្ចដោយផ្ទាល់ទៅអ៊ុយក្រែនមានតម្លៃ ៥០០លានដុល្លារ។ 

 

តាមរយៈជំនួយចុងក្រោយនេះ ប្រធានាធិបតីអាម៉េរិក លោក ចូ បៃឌិន បានអះអាងថា វានឹងជួយរក្សាស្ថិរភាពអ៊ុយក្រែន គាំទ្រសហគមន៍អ៊ុយក្រែន ដែលត្រូវបានបំផ្លាញដោយរុស្ស៊ី និងផ្តល់ថ្លៃពលកម្មដល់កម្មករ ដែលបន្តផ្តល់សេវាទៅប្រជាជនអ៊ុយក្រែន បើទោះប្រទេសកំពុងស្ថិតក្នុងសង្រ្គាមក៏ដោយ។ ទន្ទឹមនេះ លោកបៃឌិន បានយល់ឃើញថា សង្រ្គាមនៅអ៊ុយក្រែន កំពុងស្ថិត​ក្នុងដំណាក់កាលសំខាន់។ 

 

«យើង ពេលនេះ កំពុងនៅក្នុងដំណាក់កាលសំខាន់ ដែលពួកគេ (រុស្ស៊ី)កំពុងកំណត់ដំណាក់កាលថ្មីសម្រាប់សង្រ្កាមមួយនេះ»។ លោកបៃឌិន បានសង្កត់ធ្ងន់បែបនេះពីសេតវិមាន ដោយបន្ថែមថា ក្រុងវ៉ាស៊ីនតោន និងសម្ព័ន្ធមិត្ត នឹងចាត់វិធានការឱ្យរហ័ស ដើម្បីផ្តល់ជំនួយអាវុធ និងសម្ភារផ្សេងទៀតទៅអ៊ុយក្រែន។ 

 

កញ្ចប់ជំនួយយោធាទំហំជាង ៨០០លានដុល្លារនោះ មានបញ្ចូល​ កាំភ្លើងធំធន់ធ្ងន់, កាំភ្លើងធំ ប្រភេទ howitzer, គ្រាប់កាំភ្លើង និងដ្រូនPhoenix Ghost ជាដើម។ យុទ្ធោបករណ៍ទាំងនេះ មិនខុសគ្នាពីអ្វីដែលអាម៉េរិកប្រកាសក្នុងកញ្ចប់ជំនួយ៨០០លានដុល្លារដែលប្រកាសកាលពីសប្ដាហ៍មុនដែរ។

 

ជាមួយគ្នានេះ លោក បៃឌិន បានបន្តថា លោកនឹងស្នើសុំជំនួយបន្ថែមទៅសភានៅសប្តាហ៍ក្រោយ ខណៈចំនួននៃជំនួយនោះ កំពុងតែពិភាក្សា។ ស្របគ្នានេះ លោកស្រី ណាន់ស៊ី ផេឡូស៊ី ប្រធានសភាតំណាង បានប្រាប់អ្នកសារព័ត៌មានថា សភាតំណាងនឹងពិចារណាលើជំនួយបន្ថែមឱ្យបានឆាប់ត្រឹមសប្តាហ៍ក្រោយ។ 

 

ការប្រកាសរបស់ប្រធានាធិបតីអាម៉េរិកខាងលើ ធ្វើឡើងបន្ទាប់ពីជំនួបជួបផ្ទាល់ជាមួយនាយករដ្ឋមន្រ្តីអ៊ុយក្រែន លោក Denys Shmyhal នៅក្រុងវ៉ាស៊ីនតោន។ បន្ទាប់ពីការប្រកាសរបស់អាម៉េរិក លោក  វ៉ូឡូឌីមៀ ហ្សេលេនស្គី ប្រធានាធិបតីអ៊ុយក្រែន បានសរសេរលើបណ្តាញសង្គម Twitter អរគុណអាម៉េរិក ដោយបានចាត់ទុកជំនួយជាច្រើនលានដុល្លារនោះ​ ជួយការពារប្រជាធិបតេយ្យ និងសេរីភាពរបស់អ៊ុយក្រែន។ 

 

ការបញ្ចេញជំនួយលើកចុងក្រោយរបស់អាម៉េរិកនេះ ធ្វើឡើងស្របពេលរុស្ស៊ីបានផ្តោតការវាយប្រហាររបស់ខ្លួននៅតំបន់ដុនបាសភាគខាងកើតអ៊ុយក្រែនវិញម្តង និងចំពេលរុស្ស៊ីប្រកាសគ្រប់គ្រងក្រុង Mariupol ជាផ្លូវការ។ 

 

ទាក់ទិននឹងការគ្រប់គ្រងក្រុងសំខាន់នេះ លោក ហ្សេលេនស្គី បានលើកឡើងថា ស្ថានភាពនៅក្រុង Mariupol មិនមានការផ្លាស់ប្តូរអ្វីឡើយ។ បើតាមប្រធានាធិបតីអ៊ុយក្រែន កន្លងមក កងទ័ពរុស្ស៊ី បានគ្រប់គ្រងក្រុង Mariupol បានមួយភាគធំហើយ ខណៈយោធាអ៊ុយក្រែន នៅតែបន្តគ្រប់គ្រងមួយផ្នែកនៃទីក្រុង៕