អន្តរជាតិ
រដ្ឋមន្ត្រីការពារជាតិអាហ្វហ្កានីស្ថានថា រដ្ឋបាលតាលីបង់នឹងមិនអត់ធ្មត់ចំពោះការឈ្លានពានឡើយ
× រដ្ឋមន្ត្រីការពារជាតិស្តីទីនៃរដ្ឋាភិបាលបណ្ដោះអាសន្នអាហ្វហ្កានីស្ថាន Mullah Mohammad Yaqoob នៅថ្ងៃទី ២៤ ខែមេសា បានប្រកាសថា រដ្ឋបាលតាលីបង់ នឹងមិនអត់ធ្មត់ចំពោះការឈ្លានពានណា មួយឡើយ។ ទោះមិនបញ្ចេញឈ្មោះ ប្រមុខការពារជាតិរដ្ឋាភិបាលតាលីបង់ ទំនងសំដៅដល់ប៉ាគីស្ថាន ខណៈដែលការវាយប្រហារឆ្លងព្រំដែនប្រទេសទាំងពីរកើនឡើង។
ការវាយប្រហារទៅវិញទៅមកនៅព្រំដែន កំពុងធ្វើឱ្យទំនាក់ទំនងរវាងប៉ាគីស្ថាន និងក្រុមតាលីបង់កំពុងដឹកនាំអាហ្វហ្កានីស្ថានធ្លាក់ចុះយ៉ាងខ្លាំង។ កាលពីថ្ងៃទី១៦ ខែមេសា ក្រសួងការបរទេសរដ្ឋាភិបាលបណ្ដោះអាសន្នអាហ្វហ្កានីស្ថាន បានកោះហៅតំណាង ប៉ាគីស្ថានដើម្បីតវ៉ានឹងការវាយប្រហារមួយដែលខ្លួនបានអះអាងថា ជាការវាយប្រហារដោយឧទ្ធម្ភាគចក្ររបស់យោធាប៉ាគីស្ថានដែលលបានសម្លាប់មនុស្សយ៉ាងហោច៤៧នាក់នៅខេត្ត Kunar និង Khost ។ ប៉ុន្តែប៉ាគីស្ថានមិនបានបញ្ជាក់ថា ខ្លួនជាអ្នកនៅពីក្រោយការវាយប្រហារមួយនេះឡើយ។
អំឡុងពិធីមួយរំឭកដល់ការស្លាប់ស្ថាបនិកក្រុមតាលីបង់ Mullah Mohammad Omar ក្នុងទីក្រុងកាប៊ុល រដ្ឋមន្ត្រីការពារជាតិស្តីទីអាហ្វហ្កានីស្ថាន Mohammad Yaqoob ប្រកាសថា អាហ្វហ្កានីស្ថានកំពុងជួបនឹងបញ្ហាពិភពលោកផង និងបញ្ហាជាមួយប្រទេសជិតខាងផង ហើយឧទាហរណ៍ច្បាស់មួយ គឺការឈ្លានពានដោយប៉ាគីស្ថានមកលើខេត្ត Kunar ជាដើម។ នេះបើតាមទីភ្នាក់ងារព័ត៌មាន Reuters ដែលស្រង់សម្ដីមន្រ្តីតាលីបង់។
«ពួកយើងមិនអាចទ្រាំទ្រនឹងការឈ្លានពានបានទេ។ ពួកយើងបានអត់ឱនចំពោះការវាយប្រហារមួយនោះ។ យើងអត់ឱនព្រោះផលប្រយោជន៍ជាតិ ប៉ុន្តែលើកក្រោយពួកយើងប្រហែលមិនអត់ឱនទៀតនោះទេ»។ លោក Yaqoob បានសង្កត់ធ្ងន់បែបនេះ ដោយសំដៅដល់ប៉ាគីស្ថាន
ទាក់ទងការអធិប្បាយនេះ អ្នកនាំពាក្យក្រសួងការបរទេសប៉ាគីស្ថាន នៅតែមិនបានទទួលស្គាល់ពីការវាយប្រហារដដែល តែបង្ហាញក្ដីសង្ឃឹមសម្រាប់ការចូលរួមយូរអង្វែងជាមួយអាហ្វហ្កានីស្ថានដើម្បីប្រឆាំងអំពើរភេរវកម្មវិញ។ បើតាមអ្នកនាំពាក្យដដែល ប៉ាគីស្ថាន និងអាហ្វហ្កានីស្ថាន ជាប្រទេស បងប្អូនគ្នា ហើយរដ្ឋាភិបាល និងប្រជាជននៃប្រទេសទាំងពីរចាត់ទុកអំពើភេរវកម្មជាការគំរាមធ្ងន់ធ្ងរ។ មន្ត្រីដដែលស្នើឱ្យប្រទេសទាំងពីររួមគ្នាប្រឆាំងអំពើភេរវកម្មឆ្លងព្រំដែន និងចាត់វិធានការប្រឆាំងក្រុមភេរវករក្នុងទឹកដីរៀងៗខ្លួន។
គួរបញ្ជាក់ថា តាំងពីក្រុមតាលីបង់ឡើងកាន់កាប់អំណាចកាលពីខែសីហាឆ្នាំ២០២១មក ការប្រឈមមុខដាក់គ្នា បានកើតឡើងជាច្រើនសានៅតាមបណ្តោយព្រំដែនប្រវែង ២,៦០០គីឡូម៉ែត្ររវាងអាហ្វហ្កានីស្ថាន និងប៉ាគីស្ថាន។ ខណៈការវាយប្រហារដោយក្រុមសកម្មប្រយុទ្ធកាន់តែកើនឡើងនៅតំបន់នោះ យោធាប៉ាគីស្ថានក៏បានបង្កើនប្រតិបត្តិការនៅតាមព្រំដែនអាហ្វហ្កានីស្ថានក្នុងរយៈពេលប៉ុន្មានខែថ្មីៗនេះផងដែរ៕
Tag:
អាហ្វហ្កានីស្ថាន
ប៉ាគីស្ថាន
© រក្សាសិទ្ធិដោយ thmeythmey.com