រដ្ឋធានីប៉េកាំង ក្លាយជាចំណុចមួយទៀតក្នុងការប្រយុទ្ធការរាលដាលជំងឺកូវីដ-១៩ នៅទឹកដីចិន ខណៈដែលយុទ្ធនាការនៅទីក្រុងធំៗដូចជាសៀងហៃមិនទាន់បញ្ចប់នៅឡើយ។ ក្នុងរដ្ឋធានីប៉េកាំងនៅ​ថ្ងៃទី​២៦ ខែមេសា អាជ្ញាធរសុខាភិបាលចិន បានរាយការណ៍ថា ក្នុងថ្ងៃទី២៥ ខែមេសា ករណីឆ្លងថ្មី​ក្នុង​សហគមន៍មាន៣៣ករណីដែលក្នុងនោះ​៣២នាក់បានចេញរោគសញ្ញា ចំណែកឯម្នាក់ទៀត​មិនបាន​ចេញរោគសញ្ញា​នោះឡើយ។

 

ក្រុងប៉េកាំង បានចាប់ផ្ដើមធ្វើតេស្តរកជំងឺកូវីដ-១៩ សម្រាប់ប្រជាជននៅខណ្ឌ Chaoyang ចាប់​នៅ​ថ្ងៃទី២៥ ខែមេសា។ បន្ទាប់មក អាជ្ញាធរទីក្រុងប៉េកាំង បានសម្រេចធ្វើតេស្តលើខណ្ឌចំនួន១១ផ្សេង​ទៀតដែលគ្របដណ្ដប់លើប្រជាជនប្រមាណជាង២០លាននាក់។
 

«ដើម្បីទប់ស្កាត់ហានិភ័យនៃការរីករាលដាលនៃជំងឺរាតត្បាតយ៉ាងម៉ឺងម៉ាត់ និងរក្សាសុខភាពរបស់​ប្រជាពលរដ្ឋប្រកបដោយប្រសិទ្ធភាព ពួកយើងបានសម្រេចពង្រីកវិសាលភាពនៃការតេស្ត​រកជំងឺ​តាម​តំបន់ផ្សេងៗទៀតដោយផ្អែកលើមូលដ្ឋាននៃការធ្វើតេស្តដែលបានធ្វើឡើងនៅក្នុង Chaoyang​»។ ​អ្នក​នាំ​ពាក្យ​រដ្ឋាភិបាល​ក្រុង​ប៉េកាំង​បានបញ្ជាក់បែបនេះនៅយប់ថ្ងៃទី២៥ ខែមេសា។
 

ក្រោមចំណាត់ការនេះ ការធ្វើតេស្តម៉ាស៊ីន PCR ចំនួនបីជុំនឹងត្រូវធ្វើឡើងពីថ្ងៃទី២៦​ ដល់ថ្ងៃទី៣០ ខែមេសា​នៅក្នុងខណ្ឌ Dongcheng, Xicheng, Haidian, Fengtai, Shijingshan, Fangshan, Tongzhou, Shunyi, Changping, Daxing, រួមទាំងតំបន់អភិវឌ្ឍន៍សេដ្ឋកិច្ច-បច្ចេកវិទ្យា​ទីក្រុង៕