ក្រុមនៅក្របខណ្ឌកំពូលអង់គ្លេស Premier League ទាំងពីរនឹងជួបប្រកួតគ្នានាថ្ងៃទី១៥ ខែកក្កដា ឆ្នាំ ២០២២ នាកីឡដ្ឋាន Nation Stadium ប្រទេសសិង្ហបុរី ក្នុងការប្រកួតពានរង្វាន់មិត្តភាពមុខបើករដូវកាល Standard Chartered Singapore Trophy 2022។ នេះបើតាមអ្នករៀបចំកម្មវិធីប្រកួតបាននិយាយ។ 
 

តម្លៃសំបុត្រសម្រាប់ការប្រកួតមួយសន្លឹក ចាប់ផ្តើមពី១៤៩ដុល្លាសិង្ហបុរី (ជិត១១០​ដុល្លារអាម៉េរិក) នឹងត្រូវលក់តាមប្រព័ន្ធអនឡាញ ហើយសំបុត្រសម្រាប់ចូលទស្សនាការហ្វឹកហាត់តម្លៃប្រមាណ ២៨,៥ដុល្លារ។
 

«Pre-Season គឺជាពេលវេលាសម្រាប់កីឡាករយើង ត្រៀមសម្រាប់រដូវកាលបន្ទាប់។ វាពិតជាសំខាន់ខ្លាំងក្នុងការត្រៀមខ្លួនឱ្យបានគ្រប់គ្រាន់ ហើយវាក៏ជាឱកាសដ៏ល្អសម្រាប់យើង ក្នុងការជួបជុំអ្នកគាំទ្រជុំវិញពិភពលោក»។នេះបើតាមប្រធានផ្នែកពាណិជ្ជកម្ម Liverpool លោក Ben Latty។
 

កាលពីឆ្នាំ ២០១១ Liverpool ក៏ធ្លាប់បានធ្វើដំណើរមកប្រទេសនៅតំបន់អាស៊ីអាគ្នេយ៍មួយនេះ ដើម្បីហ្វឹកហាត់សម្រាប់ត្រៀមប្រកួតរដូវកាលថ្មី ២០១១-១២ ក្នុងក្របខណ្ឌ Premier League។ 
 

បន្ទាប់ពីជំនួបជាមួយនឹងក្រុម Crystal Palace បញ្ចប់នាប្រទេសសិង្ហបុរី ក្រុមហង្សក្រហមក៏នឹងត្រូវបន្តដំណើរទៅប្រកួតនៅប្រទេសថៃ នាទីក្រុងបាងកក ដោយត្រូវជួបតទល់ជាមួយក្រុមបិសាចក្រហម Manchester United ដែលជាការប្រកួតត្រៀមរដូវកាលថ្មីខាងមុខ។
 

លើសពីនេះនាយកក្លិប Crystal Palace ក៏បានបញ្ជាក់ថា លោកក៏សម្លឹងឃើញផ្លូវវែងឆ្ងាយ ហើយសប្បាយចិត្តសម្រាប់ការប្រកួតទល់នឹងក្រុម Liverpool នៅប្រទេសសិង្ហបុរី៕