កាលពីសប្តាហ៍មុន ចិន និងកោះសូឡូម៉ុន បានប្រកាសពីការចុះហត្ថលេខាលើកិច្ចព្រមព្រៀងសន្តិសុខទ្វេភាគី។ រឿងនេះបង្កឱ្យអាម៉េរិក និងសម្ព័ន្ធមិត្តជាពិសេស ជប៉ុន អូស្រ្តាលី និងនូវែលសេឡង់ ព្រួយបារម្ភជុំវិញការពង្រីកឥទ្ធិពលយោធាចិនក្នុងតំបន់អាស៊ីប៉ាស៊ីហ្វិកខាងត្បូង។

 

ស្របពេលការព្រួយបារម្ភនេះ ជប៉ុននៅថ្ងៃទី២៥ ខែមេសា បានបញ្ជូនអនុរដ្ឋមន្រ្តីការបរទេស Kentaro Uesugi ទៅទស្សនកិច្ចនៅកោះសូឡូម៉ុនរយៈពេល៣​ ថ្ងៃ។ បើតាមរដ្ឋមន្រ្តីការបរទេសជប៉ុន Yoshimasa Hayashi នាយករដ្ឋមន្រ្តីកោះសូឡូម៉ុន Mannaseh Sogavare នៅថ្ងៃទី២៦ ខែមេសា ប្រាប់លោក Uesugi ថា កោះសូឡូម៉ុនមិនមានបំណងអនុញ្ញាតឱ្យចិនតាំងមូលដ្ឋានយោធានៅក្នុងប្រទេសទេ។ នេះបើតាមទីភ្នាក់ងារព័ត៌មាន Reuters ។ 

 

កន្លងមក ប្រមុខការទូតជប៉ុនជឿថា កិច្ចព្រមព្រៀងនេះអាចប៉ះពាល់ដល់សន្តិសុខនៃតំបន់អាស៊ីប៉ាស៊ីហ្វិកទាំងមូល ហើយថា ខ្លួនកំពុងមើលការវិវឌ្ឍដោយក្តីបារម្ភ បើទោះបីជាមេដឹកនាំកោះសូឡូម៉ុនអះអាងម្តងហើយម្តងទៀតថា ខ្លួននឹងមិនអនុញ្ញាតឱ្យមានមូលដ្ឋានយោធាចិនក្នុងតំបន់ ឬវត្តមានយោធាចិនរយៈពេលវែងក៏ដោយ។ 

 

អាម៉េរិក នៅថ្ងៃទី២២ ខែមេសា បានបញ្ជូនប្រតិភូអាម៉េរិកជាន់ខ្ពស់ទៅទស្សនកិច្ចនៅកោះសូឡូម៉ុនដែរ ហើយព្រមានថា ទីក្រុងវ៉ាស៊ីនតោននឹងចាត់វិធានការ ប្រសិនបើកិច្ចព្រមព្រៀងជាមួយចិននេះបង្កការគំរាមដល់ផលប្រយោជន៍អាម៉េរិក និងសម្ព័ន្ធមិត្ត៕