កិច្ចព្រមព្រៀងសន្តិសុខរវាងកោះសូឡូម៉ុន និងចិនដែលត្រូវបានចុះហត្ថលេខាកន្លងមក មិនទាន់ត្រូវបានបង្ហាញជាសាធារណៈតាមសំណើបណ្តាប្រទេសលោកខាងលិចឡើយ។ នាយករដ្ឋមន្រ្តីកោះសូឡូម៉ុន Manesseh Sogavare បានអះអាងម្តងហើយម្តងទៀតថា យោធាចិននឹងមិនត្រូវអនុញ្ញាតឱ្យតាំងមូលដ្ឋាននៅទឹកដីខ្លួនទេ ឯប៉ូលិសចិនដែលនឹងមានវត្តមាន នឹងឈរជើងដើម្បីការពារសន្តិសុខប៉ុណ្ណោះ ពីព្រោះកិច្ចព្រមព្រៀងស្រដៀងគ្នាជាមួយអូស្រ្តាលី នៅមិនទាន់គ្រប់គ្រាន់។

 

បន្ថែមពីការព្រួយបារម្ភជុំវិញមូលដ្ឋានយោធាចិនក្នុងតំបន់ប៉ាស៊ីហ្វិក សម្ព័ន្ធមិត្តលោកខាងលិចជាពិសេស អាម៉េរិក អូស្រ្តាលី និងនូវែលសេឡង់ព្រួយខ្លាចក្រែងប៉ូលិសចិនដែលបញ្ជូនទៅទីនោះប្រើវិធីដ៏ឃោរឃៅដូចដែលធ្លាប់ប្រើពីមុននៅក្រុងហុងកុងដើម្បីបង្រ្កាបការតវ៉ាប្រឆាំងរដ្ឋាភិបាល។ 

 

ក្នុងកិច្ចសម្ភាសជាមួយវិទ្យុអូស្រ្តាលី ABC នៅថ្ងៃទី២ ខែឧសភា លោក Robert Sisilo ស្នងការជាន់ខ្ពស់កោះសូឡូម៉ុនប្រចាំអូស្រ្តាលី លើកឡើងថា កោះសូឡូម៉ុនកំពុងបង្កើនសមត្ថភាពខ្លួន បន្ទាប់ពីប៉ូលិសក្នុងស្រុកមិនអាចបង្ក្រាបកុប្បកម្មប្រឆាំងរដ្ឋាភិបាលនៅតំបន់ជនជាតិចិនរស់នៅនៅរដ្ឋធានី Honiara កាលពីខែវិច្ឆិកា។ 

 

«យើងនឹងព្យាយាម និងប្រឹងឱ្យអស់ពីសមត្ថភាពដោះស្រាយជាមួយពួកគេដើម្បីធ្វើឱ្យប្រាកដថា អ្វីដែលកំពុងកើតឡើងនៅទីតាំងផ្សេងដូចជាហុងកុង មិនកើតឡើងក្នុងប្រទេសយើងឡើយ»។ លោក Sisilo លើកឡើងបែបនេះ បន្ទាប់ពីបញ្ជាក់ថា ក្រោមកិច្ចព្រមព្រៀង ប៉ូលិសយោធាចិនអាចនឹងត្រូវបានឱ្យឈរជើង ប៉ុន្តែនឹងធ្វើប្រតិបត្តិការក្រោមកងកម្លាំងប៉ូលិសជាតិកោះសូឡូម៉ុនដូចដែលប៉ូលិសអូស្រ្តាលីបានពង្រាយនៅទីនោះដែរ។

 

លើសពីនេះ មន្រ្តីការទូតជាន់ខ្ពស់រូបនេះ បកស្រាយថា កោះសូឡូម៉ុនមិនព្យាយាមចាកចេញពីអូស្រ្តាលីទេ ប៉ុន្តែកំពុងស្វះស្វែងរកកិច្ចសហប្រតិបត្តិការបន្ថែមជាមួយចិន។ 

 

ស្របពេលចិនព្យាយាមពង្រីកឥទ្ធិពលក្នុងតំបន់ប៉ាស៊ីហ្វិក អាម៉េរិកនៅថ្ងៃដដែលបានប្រកាសពីបំណងពង្រឹងទំនាក់ទំនងការទូត និងផ្នែកផ្សេងៗឡើងវិញជាមួយបណ្តាប្រទេសកោះប៉ាស៊ីហ្វិក ក្រោយមិនសូវអើពើអស់រយៈពេលជាច្រើនឆ្នាំ៕