បួនថ្ងៃបន្ទាប់ពីរុស្ស៊ីបើកការវាយប្រហារ តុលាការព្រហ្មទណ្ឌអន្តរជាតិ (ICC) បានចាប់ផ្តើមស៊ើបអង្កេតលើឧក្រិដ្ឋកម្មសង្រ្គាម ដែលអាចត្រូវបានប្រព្រឹត្តនៅអ៊ុយក្រែន។ ដើម្បីពន្លឿនដំណើរការស៊ើបអង្កេត អគ្គរដ្ឋអាជ្ញា ICC លោក Karim Khan នៅថ្ងៃទី១៧ ខែឧសភា បានបញ្ជូនក្រុមអ្នកជំនាញ៤២ រូប រួមមានអ្នកស៊ើបអង្កេត អ្នកជំនាញផ្នែកកោសល្យវិច្ច័យ និងបុគ្គលិកជំនួយផ្សេងទៀតដើម្បីប្រមូលព័ស្តុតាង និងទិន្ន័យនៅអ៊ុយក្រែន។ 

 

«ក្រុមការងារ នឹងពន្លឿនការស៊ើបអង្កេតទៅលើឧក្រិដ្ឋកម្ម ដែលស្ថិតក្រោមយុត្តាធិការរបស់តុលាការព្រហ្មទណ្ឌអន្តរជាតិ និងផ្តល់ការគាំទ្រដល់អាជ្ញាធរជាតិអ៊ុយក្រែន»។ អគ្គរដ្ឋអាជ្ញា ICC លើកឡើងបែបនេះនៅក្នុងសេចក្តីថ្លែងការណ៍ចេញនៅថ្ងៃទី១៧ ខែឧសភា ដោយបញ្ជាក់ថា ការបញ្ជូនក្រុមការងារដ៏ច្រើនឱ្យស៊ើបអង្កេតក្នុងសំណុំរឿងតែមួយបែបនេះ គឺមិនធ្លាប់មានពីមុនទេ តាំងពីICC ត្រូវបានបង្កើតឡើង។  

 

បើតាមលោក Khan ក្រុមការងារខាងលើ នឹងជួយប្រមូលសក្ខីកម្មរបស់សាក្សី អត្តសញ្ញាណនៃសម្ភារធ្វើកោសល្យវិច្ច័យ ព្រមទាំងជួយធានាថា ព័ស្តុតាងដែលប្រមូលបានមកនឹងអាចយកទៅប្រើក្នុងដំណើរការនីតិវិធីនាថ្ងៃខាងមុខបាន។ ទន្ទឹមនេះ លោកក៏បានអរគុណដល់រដ្ឋាភិបាលហូឡង់ដែលបានបញ្ជូនអ្នកជំនាញ ដើម្បីជួយបេសកកម្មនេះផងដែរ ខណៈក្រុមការងារកំពុងធ្វើការជាមួយអ្នកជំនាញកោសល្យវិច្ឆ័យបារាំង ដែលកំពុងមានវត្តមាននៅអ៊ុយក្រែន។ 

 

ពាក់ព័ន្ធនឹងសំណុំរឿងនេះ លោក Khan កន្លងមក បាន​និយាយថា អ៊ុយក្រែនគឺជាកន្លែងឧក្រិដ្ឋកម្ម អំឡុងពេលលោកធ្វើទស្សនកិច្ចនៅក្រុង Bucha ក្នុងខែមេសា ដែលសាកសពយ៉ាងច្រើនត្រូវបានប្រទះឃើញនៅតាមផ្លូវ បន្ទាប់ពីរុស្ស៊ីដកទ័ពចេញនៅចុងខែមីនា។ អ៊ុយក្រែនបានចោទកងទ័ពរុស្ស៊ីថាសម្លាប់ជនស៊ីវិលទាំងនេះ ប៉ុន្តែរុស្ស៊ីបានច្រានចោល ហើយអះអាងថាព្រឹត្តិការណ៍នៅទីក្រុង Bucha ជារឿងប្រឌិដ្ឋ។

 

តាមរបាយការណ៍របស់ការិយាល័យស្នងការជាន់ខ្ពស់អង្គការសហប្រជាជាតិទទួលបន្ទុកសិទ្ធិមនុស្សនៅថ្ងៃទី១៧ ខែឧសភា ជនស៊ីវិលនៅអ៊ុយក្រែនរងគ្រោះជាង ៧ពាន់នាក់ ដោយមានអ្នកស្លាប់លើស ៣ពាន់នាក់ និងរបួសយ៉ាងតិច ៤ពាន់នាក់ ។ ទន្ទឹមនឹងនេះ យោងតាមឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន ប្រជាជនជាង ៦លាននាក់បានភៀសខ្លួនចេញពីប្រទេស ដែលប្រហែល ៩០ ភាគរយជាស្ត្រី និងកុមារ៕