អន្តរជាតិ
ប៉ូលិសស្រីលង្កា ចាប់ខ្លួនសមាជិកសភាបក្សកាន់អំណាច២រូបពីការញុះញង់ឱ្យមានហិង្សា
× ប៉ូលិសស្រីលង្កា បានចាប់ខ្លួនសមាជិកសភាមកពីបក្សកាន់អំណាច២រូបពីបទចោទញុះញង់ឱ្យមានអំពើហិង្សាកាលពីសប្តាហ៍មុន។ នេះបើតាមមន្រ្តីម្នាក់ស្រីលង្កានៅថ្ងៃទី១៨ ខែឧសភា។ បាតុកម្មពេលនោះ បង្កឱ្យមនុស្សស្លាប់៩នាក់។
អគ្គរដ្ឋអាជ្ញាស្រីលង្កានៅថ្ងៃទី១៦ ខែឧសភា បានបង្គាប់នាយកដ្ឋានស៊ើបអង្កេតឧក្រិដ្ឋកម្មឱ្យចាប់ខ្លួនបុគ្គល ២២ នាក់ដោយរួមមានអតីតរដ្ឋមន្រ្តី និងសមាជិកសភាជុំវិញការញុះញង់ឱ្យមានហិង្សាលើក្រុមអ្នកតវ៉ាប្រឆាំងរដ្ឋាភិបាលដោយសន្តិវិធីកាលពីថ្ងៃទី៩ ខែឧសភា។ ជាលទ្ធផលនៃការស៊ើបអង្កេត សមាជិកសភាពីររូបរបស់បក្សកាន់អំណាចស្រីលង្កា លោក Sanath Nishantha និង លោក Milan Jayathilake ត្រូវបានចាប់ខ្លួននៅថ្ងៃទី១៧ ខែឧសភា ហើយបន្តឃុំខ្លួនដល់ថ្ងៃទី២៥ ខែឧសភា។
«វាមានព័ស្តុតាងដោយចំៗប្រឆាំងនឹងសមាជិកសភាទាំងពីររូប ហើយនោះជាមូលហេតុដែលពួកគេត្រូវបានចាប់ខ្លួន»។ ទីភ្នាក់ងារព័ត៌មាន AFP នៅថ្ងៃទី១៨ ខែឧសភាស្រង់សម្តីរបស់មន្រ្តីស្រីលង្កាបែបនេះ។
លោក Sanath Nishantha និង Milan Jayathilake ស្ថិតក្នុងចំណោមអ្នកនយោបាយ ២២ នាក់ទៀតរួមមានអតីតនាយករដ្ឋមន្ត្រី ម៉ាហ៊ិនដា រ៉ាចាប៉ាក់សា និងកូនប្រុសលោក ដែលត្រូវបានដកហូតលិខិតឆ្លងដែនកាលពីសប្តាហ៍មុន ក្រោយប្រឈមនឹងបទចោទខាងលើ។
កាលពីនៅថ្ងៃទី៩ ខែឧសភា ក្រុមអ្នកគាំទ្របក្សកាន់អំណាចរាប់ពាន់នាក់បានជួបជុំនៅរដ្ឋធានីកូឡុំបូ ហើយវាយប្រហារក្រុមអ្នកតវ៉ាប្រឆាំងរដ្ឋាភិបាលដោយសន្តិវិធី។ ការប៉ះទង្គិចគ្នានេះបណ្តាលឱ្យមនុស្សយ៉ាងតិច២២៥នាក់បញ្ជូនទៅមន្ទីរពេទ្យ ខណៈ៩នាក់ស្លាប់។ មិនតែប៉ុណ្ណោះ ប៉ូលិសស្រីលង្កាបានចាប់ខ្លួនប្រជាជនប្រហែល៥០០នាក់ ដែលជាប់ពាក់ព័ន្ធនឹងអំពើហិង្សា និងការដុតបំផ្លាញផ្ទះអ្នកនយោបាយជាង៧០ខ្នង។
ទន្ទឹមនេះ ប្រមុខសិទ្ធិមនុស្សអង្គការសហប្រជាជាតិ លោកស្រី Michelle Bachelet និងសហភាពអឺរ៉ុបនៅថ្ងៃទី១០ ខែឧសភា បានចេញសេចក្តីថ្លែងការណ៍ថ្កោលទោសចំពោះអំពើហិង្សាទាំងនេះ ហើយអំពាវនាវឱ្យអាជ្ញាធរស្រីលង្កាស៊ើបអង្កេត។
មកទល់ពេលនេះ ក្រុមអ្នកតវ៉ាប្រឆាំងរដ្ឋាភិបាលរាប់ពាន់នាក់នៅតែបន្តធ្វើកូដកម្មក្រៅការិយាល័យប្រធានាធិបតីស្រីលង្កា ហ្គោតាបាយ៉ា រ៉ាចាប៉ាក់សា ដោយទាមទារឱ្យលោកចុះចេញពីតំណែងមួយទៀត ស្របពេលលោក Ranil Wickremesignhe ត្រូវបានតែងតាំងជានាយករដ្ឋមន្រ្តីកាលពីសប្តាហ៍មុនជំនួសឱ្យបងរបស់លោក។ លោក Wickremesignhe នៅតែមិនទាន់អាចបង្កើតគណៈរដ្ឋមន្រ្តីពេញលេញបាន បើទោះជាទទួលបានការគាំទ្រពីបក្សប្រឆាំងធំៗពីរក្នុងការបង្កើតរដ្ឋាភិបាលរួបរួមដើម្បីទាញប្រទេសចេញពីវិបត្តិសេដ្ឋកិច្ចក៏ដោយ៕
© រក្សាសិទ្ធិដោយ thmeythmey.com