អន្តរជាតិ
នយោបាយអន្តរជាតិ
រុស្ស៊ី ប្រកាសបណ្តេញមន្រ្តីទូតបណ្តាប្រទេសអឺរ៉ុបសរុប ៨៥នាក់ចេញពីប្រទេស រដ្ឋមន្រ្តីការបរទេសរុស្ស៊ី លោក ស៊ែហ្គេយ៍ ឡាវរ៉ូវ។ រូបភាព៖ AFP
× រុស្ស៊ី នៅថ្ងៃទី១៨ ខែឧសភា បានប្រកាសបណ្តេញមន្រ្តីទូតជាច្រើននាក់មកពីប្រទេសបារាំង អ៊ីតាលី និងអេស្ប៉ាញ ដើម្បីសងសឹក ចំពោះចំណាត់ការរបស់អឺរ៉ុប ដែលបានបណ្តេញមន្រ្តីទូតរុស្ស៊ីជាច្រើននាក់ នាកន្លងមកជុំវិញប្រតិបត្តិការពិសេសនៅអ៊ុយក្រែន។
ក្រសួងការបរទេសរុស្ស៊ី នៅក្នុងសេចក្តីថ្លែងការណ៍មួយ បានប្រកាសថា ខ្លួនបានបណ្តេញបុគ្គលិកចំនួន៣៤នាក់ ចេញពីស្ថានទូតបារាំងនៅក្នុងទឹកដីរុស្ស៊ី ដោយទុកពេល២សប្តាហ៍។
ការប្រកាសនេះបានធ្វើឡើង ក្រោយពីក្រុងម៉ូស្គូ បានកោះហៅឯកអគ្គរដ្ឋទូតបារាំងប្រចាំរុស្ស៊ីលោក Pierre Levy និងប្រាប់ពី ទង្វើរបស់បារាំងលើការបណ្តេញមន្រ្តីទូតរុស្ស៊ីចំនួន ៤៥នាក់។ រុស្ស៊ី បានចាត់ទុកការសម្រេចរបស់បារាំងនោះជាបង្កហេតុ និងគ្មានមូលហេតុត្រឹមត្រូវ។
បន្ថែមពីនេះ ក្រសួងការបរទេសរុស្ស៊ី ក៏បានប្រកាសបណ្តេញបុគ្គលិកទូតរបស់អេស្ប៉ាញចំនួន២៧នាក់ និងស្ថានអគ្គកុងស៊ុលប្រចាំនៅទីក្រុង Saint Petersburg ចេញដែរ ដោយទុកពេល ៧ថ្ងៃ។ ក្រសួងការបរទេសរុស្ស៊ី ក៏បានប្រាប់អគ្គរដ្ឋទូតអេស្ប៉ាញលោក Marcos Gomez Martinezថា ការបណ្តេញអ្នកការទូតរុស្ស៊ីចេញពីក្រុង Madrid នឹងជះផលអវិជ្ជមានដល់ទំនាក់ទំនងរុស្ស៊ី និងអេស្ប៉ញ។ កន្លងមក អេស្ប៉ាញ បានបណ្តេញមន្រ្តី និងបុគ្គលិកទូតរបស់រុស្ស៊ីចំនួន២៥នាក់ចេញពីប្រទេសខ្លួន ក្រោមហេតុផលការពារផលប្រយោជន៍ និងសន្តិសុខជាតិ។
ទន្ទឹមនេះ នៅថ្ងៃដដែល អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានបញ្ជាក់ប្រាប់ទីភ្នាក់ងារសារព័ត៌មានរុស្ស៊ីថា អ្នកការទូតអ៊ីតាលី ២៤នាក់ ក៏ត្រូវបានបណ្តេញចេញដែរ។
ពាក់ព័ន្ធនឹងការបណ្តេញមន្រ្តីការទូតជាច្រើននាក់នេះ ក្រសួងការបរទេសនៅក្រុងប៉ារីស បានថ្កោលទោសយ៉ាងខ្លាំងដោយអះអាងថា សកម្មភាពរបស់ក្រុងម៉ូស្គូ មិនមានមូលដ្ឋានស្របច្បាប់។ ក្រសួងការបរទេសខាងលើបានលើកឡើងទៀតថា មន្រ្តីការទូតបារាំងបានបំពេញកាតព្វកិច្ចយ៉ាងល្អ ក្រោមក្របខណ្ឌនៃអនុសញ្ញាក្រុងវីយែនស្តីពីទំនាក់ទំនងការទូតនិងកុងស៊ុល ខណៈដែលក្រុងប៉ារីសបានបណ្តេញបុគ្គលិកទូតរុស្ស៊ីកាលពីខែមេសានោះ គឺដោយសារសង្ស័យអ្នកទាំងនោះជាក្រុមចារកម្ម។
ឯនាយករដ្ឋមន្រ្តីអ៊ីតាលី លោក Mario Draghi បានរិះគន់ភាគីរុស្ស៊ីថា ជាសកម្មភាពវាយប្រហារលើប្រទេសខ្លួន។ចំណែកអេស្ប៉ាញបាននិយាយក្នុងសេចក្តីថ្លែងការណ៍មួយ ដោយបដិសេធលើការសម្រេចរបស់រុស្ស៊ី និងចោទរុស្ស៊ីមិនបានផ្អែកលើគោលការណ៍នៃផលប្រយោជន៍រួម។
ចាប់តាំងពីរុស្ស៊ីបើកការឈ្លានពានចូលអ៊ុយក្រែន អ៊ីតាលី បារាំង និងអេស្ប៉ាញ ស្ថិតក្នុងចំណោមប្រទេសអឺរ៉ុបដែលបានបណ្តេញមន្រ្តីរុស្ស៊ីជាង៣០០នាក់ ដោយបានចោទប្រកាន់អ្នកការទូតរុស្ស៊ីទាំងនោះលើការប្រព្រឹត្តិអំពើចារកម្មជាច្រើនករណី។ ប៉ុន្តែក្រុងម៉ូស្គូ បានបដិសេធ៕
Tag:
រុស្ស៊ី
បារាំង
អេស្ប៉ាញ
អ៊ីតាលី
© រក្សាសិទ្ធិដោយ thmeythmey.com