«ហ្វាំងឡាំង និងស៊ុយអែត នឹងធ្វើឱ្យណាតូកាន់តែខ្លាំង។» ប្រធានាធិបតីអាម៉េរិក ចូ បៃឌិន​ និយាយបែបនេះក្នុងសុន្ទរកថានៅសួនច្បារ Rose Garden ក្នុងសេតវិមាន ដែលឈរដោយប្រធានាធិបតីហ្វាំងឡង់ សាវលី នីនីស្តូ និងនាយករដ្ឋមន្រ្តីស៊ុយអែត ម៉ាកដាឡេណា អាន់ឌើសុន។ ​លោក បៃឌិន​ ចាត់ទុកការចូលរួមរបស់ប្រទេសទាំងពីរក្នុងប្លុកយោធានេះ ជាមូលដ្ឋានគ្រឹះនៃសន្តិសុខអាម៉េរិក។  

 

បើតាមលោក បៃឌិន ស៊ុយអែត និងហ្វាំងឡង់ គោរពតាមលក្ខខណ្ឌរបស់ណាតូ ហើយរដ្ឋបាលលោក ក៏កំពុងដាក់ឯកសារដើម្បីសុំសច្ចាប័នពីសភាលើបេក្ខភាពប្រទេសទាំងពីរ នៅពេលសមាជិកណាតូផ្ដល់ភ្លើងបៃតងរួចរាល់។ តាមច្បាប់ណាតូ បេក្ខភាពណាមួយ ត្រូវទទួលការគាំទ្រពីប្រទេសសមាជិកទាំង៣០ ។

 

យ៉ាងណាមិញ តួកគី ក៏បានចេញមុខជំទាស់ការបញ្ចូលប្រទេសអឺរ៉ុបខាងជើងទាំងពីរ ពិសេសបេក្ខភាពរបស់ស៊ុយអែតក្រោមហេតុផលរដ្ឋាភិបាលស្តុកខុលគាំទ្របក្សពលករឃើដដែលតួកគីចាត់ទុកជាអង្គការភេរវកម្ម។ ក្រុងអង់ការ៉ា ក៏ចង់ឱ្យប្រទេសទាំងពីរលើកបម្រាមលក់អាវុធផងដែរ។ ក្នុងសារវីដេអូបង្ហោះនៅថ្ងៃទី១៩ ខែឧសភា លោកប្រធានាធិបតី តៃយីប អ៊ែរដូហ្កាន់ អះអាងថា តួកគីប្រាប់សម្ព័ន្ធមិត្តរួចពីជំហរជំទាស់របស់ខ្លួន។

 

ចំពោះមុខលោក បៃឌិន លោកប្រធានាធិបតី នីនីស្តូ និយាយថា ហ្វាំងឡង់បើកចំហដល់ការជជែកពីក្ដីបារម្ភរបស់តួកគី ហើយប្ដេជ្ញាផ្ដល់ការការពារសន្តិសុខដល់តួកគីដូចដែលតួកគីផ្ដល់ការធានាដល់សមាជិកណាតូឯទៀតដែរ។ ទាក់ទងសំណុំរឿងបក្សពលករឃើដ លោក នីនីស្តូ អះអាងថា​ ហ្វាំងឡង់មិនលែងសើចចំពោះរឿងភេរវកម្មនេះ។