អន្តរជាតិ
កូរ៉េខាងជើងអះអាងថា មានលទ្ធផលល្អក្នុងការប្រយុទ្ធនឹងជំងឺកូវីដ-១៩ ទោះករណីសង្ស័យកើនឡើង
× កូរ៉េខាងជើងនៅថ្ងៃទី២០ ខែ ឧសភា អះអាងថា ខ្លួនទទួលបានលទ្ធផលល្អប្រសើរក្នុងការទប់ស្កាត់ការរីករាលដាលជំងឺកូវីដ-១៩ ជាមួយនឹងការចាត់វិធានការយ៉ាងលឿន និងការណែនាំរបស់ប្រមុខដឹកនាំកំពូល គីម ជុងអ៊ុន ។ ប៉ុន្តែស្របពេលជាមួយគ្នានេះករណីក្ដៅខ្លួនសរុបបន្តកើនឡើងលើសពី២លានករណីឯណោះ ដែលជាសញ្ញាបង្ហាញពីភាពធ្ងន់ធ្ងរនៃការឆ្លងជំងឺនេះនៅរដ្ឋកុម្មុយនីស្តឯកោមួយនេះ។
នៅកូរ៉េខាងជើង ស្ថានភាពជំងឺកូវីដ-១៩ ហាក់មិនទាន់ធូរស្រាលនោះឡើយមួយសប្ដាហ៍ក្រោយការប្រកាសជាផ្លូវការផ្ទុះករណីឆ្លងក្នុងប្រទេស ដោយករណីអ្នកក្ដៅខ្លួនសរុបមានរហូតដល់២លានករណីទៅហើយ។ សហគមន៍អន្តរជាតិ បានព្រួយបារម្ភពីផលប៉ះពាល់ដល់ប្រជាជនប្រទេសមួយនេះ ពិសេសក្រុមងាយរងគ្រោះ។ អាម៉េរិក និងកូរ៉េខាងត្បូង ក៏បានបោះដៃផ្ដល់ជំនួយដែរ តែកូរ៉េខាងជើងមិនអើពើ។
ទោះករណីក្ដៅខ្លួនដែលស្ថិតក្រោមការសង្ស័យជាករណីវិជ្ជមាននៅមានកម្រិតខ្ពស់ក្ដី ទីភ្នាក់ងារព័ត៌មានរដ្ឋកូរ៉េខាងជើង KCNA នៅថ្ងៃទី២០ ខែឧសភា រាយការណ៍ថា វិធានការទប់ស្កាត់ជំងឺកូវីដ-១៩ ទទួលបានលទ្ធផលល្អប្រសើរ។
«លទ្ធផលល្អត្រូវបានរាយការណ៍ជាបន្តបន្ទាប់ក្នុងការប្រយុទ្ធប្រឆាំងនឹងការរីករាលដាល ដែលកំពុងបន្តមាន»។ KCNA បានអះអាងបែបនេះរួចក៏បន្ថែមថា ទោះបីជាស្ថិតក្រោមស្ថាន ភាពរឹតត្បិតជាអតិបរមាក៏ដោយ ការធ្វើកសិកម្មនៅតែបន្ត ហើយរោងចក្រក៏កំពុងដំណើរការ ហើយកូរ៉េខាងជើងក៏គ្រោងរៀបចំពិធីបុណ្យសពសម្រាប់អតីតឧត្តមសេនីយ៍ម្នាក់ផង។ ឯផលិតកម្មតាមរោងចក្រផ្សេងៗ ត្រូវបានបន្តដោយមិនមានការផ្អាកដំណើរការឡើយដើម្បីគាំទ្រវិស័យឯទៀត។
ក្នុងរបាយការណ៍របស់ KCNA ដដែលនោះ នៅថ្ងៃទី១៩ ខែឧសភា ករណីក្ដៅខ្លួនថ្មីមាន ២៦ ម៉ឺននាក់ និងអ្នកស្លាប់មាន២នាក់។ សរុបករណីក្ដៅខ្លួនមាន ២,២៤លានករណី ខណៈអ្នកស្លាប់មាន៦៥នាក់។ ដូចរាល់ដង កូរ៉េខាងជើងនៅតែមិនបានរាយការណ៍ពីចំនួនអ្នកឆ្លងជំងឺកូវីដ-១៩ ឡើយ។ នៅថ្ងៃទី១៨ ខែឧសភា ខណៈករណីឆ្លងបានធ្លាក់ចុះនៅទីក្រុងព្យុងយ៉ាង កូរ៉េខាងជើង ក៏អះអាងថា ករណីឆ្លងជំងឺនេះ កំពុងឈានទៅរកអំណោយផល ឬប្រសើរជាងមុន ។
ប៉ុន្តែមន្ត្រីកូរ៉េខាងត្បូង អះអាងថា កូរ៉េខាងជើងមិនអាចសន្និដ្ឋានបែបនេះឡើយ ខណៈដែលកូរ៉េខាងជើងមិនទាន់បែងចែកឱ្យច្បាស់ពីករណីអ្នកក្ដៅខ្លួន និងករណីអ្នកឆ្លងជំងឺកូវីដ-១៩ នៅឡើយ។ អ្នកស្រាវជ្រាវនៅវិទ្យាស្ថាន 38 North ដែលតាមដានស្ថានការណ៍កូរ៉េខាងជើង លោក Martyn Williams អះអាងថា ករណីគ្រុនក្តៅដែលត្រូវបានរាយការណ៍ដោយរដ្ឋាភិបាលកូរ៉េខាងជើង ធ្លាក់ចុះនៅទីក្រុងព្យុងយ៉ាងមែន ប៉ុន្តែបានកើនឡើងនៅតាមខេត្តជនបទ៕
© រក្សាសិទ្ធិដោយ thmeythmey.com