អន្តរជាតិ
អង្គការឧតុនិយមពិភពលោក៖ បម្រែបម្រួលអាកាស កើនដល់កម្រិតខ្ពស់ថ្មីមួយទៀតក្នុងឆ្នាំ២០២១ រូបថត Xinhua
× អង្គការឧតុនិយមពិភពលោក (WMO) បានចេញផ្សាយរបាយការណ៍ថ្មីមួយនៅថ្ងៃទី១៨ ខែឧសភា ដោយបង្ហាញពីសញ្ញាអាសន្នកំពុងកើតមាន ដែលចង្អុលបង្ហាញថា បញ្ហាប្រែបម្រួលអាកាសធាតុបានកើនដល់កំណត់ត្រាថ្មីមួយទៀតក្នុងឆ្នាំ២០២១។
នៅប៉ុន្មានឆ្នាំចុងក្រោយនេះ វិបត្តិអាកាសធាតុបានញាំញីដល់ជីវិតមនុស្ស សត្វ និងរុក្ខជាតិទាំងពួងជាមួយគ្រោះទឹកជំនន់ ការឡើងកម្តៅផែនដី និងគ្រោះរាំងស្ងួតនៅតាមតំបន់មួយចំនួន។ បើតាមអង្គការឧតុនិយមពិភពលោក (WMO) សញ្ញាអាសន្ន៤ចំណុចមាន កម្រិតឧស្ម័នផ្ទះកញ្ចក់ ការកើនឡើងកម្រិតទឹកសមុទ្រ ការឡើងកម្តៅនិងជាតិអាស៊ីតក្នុងទឹកសមុទ្រ បានឆ្លុះបង្ហាញពីហានិភ័យ និងកម្រិតអាសន្នខ្ពស់មួយទៀតក្នុងឆ្នាំ២០២១។
«អាកាសធាតុយើង កំពុងផ្លាស់ប្តូរនៅចំពោះមុខយើងហើយ។» ប្រធាន WMO លោក Petteri Taalas សង្កត់ធ្ងន់បែបនេះក្នុងរបាយការណ៍ស្ថានភាពអាកាសធាតុឆ្នាំ២០២១ សចេញថ្ងៃទី១៨ ខែឧសភា ដោយបន្តថា ឧស្ម័នផ្ទះកញ្ចក់ដ៏ច្រើនសម្បើមដែលបញ្ចេញដោយសកម្មភាពមនុស្ស នឹងបណ្តាលឱ្យផែនដីក្តៅយូរអង្វែងជាច្រើនជំនាន់ទៀត។ លោក អះអាងទៀតថា ការកើនឡើងកម្ពស់ទឹកសមុទ្រ កម្រិតអាស៊ីត និងកម្តៅក្នុងសមុទ្រ ក៏នឹងមានវត្តមានរាប់រយឆ្នាំទៀតដែរ បើសិនមនុស្សជាតិ មិនរកមធ្យោបាយបន្ថយកម្រិតកាបូនក្នុងបរិយាកាស។
បើតាម WMO កម្រិតកាបូនឌីអុកស៊ីត និងឧស្ម័នមេតានក្នុងបរិយាកាសនៅឆ្នាំ២០២១ បានកើនឡើងលើសពីកំណត់ត្រាមុនៗ។ របាយករណ៍ខាងលើក៏បានបញ្ជាក់ដែរថា រយៈពេល៧ឆ្នាំចាប់ពីឆ្នាំ២០១៥ ដល់ឆ្នាំ២០២១ សុទ្ធសឹងជាឆ្នាំដែលក្តៅបំផុតជាប្រវត្តិសាស្រ្ត។ បច្ចុប្បន្ន ពិភពលោក ឡើងកម្តៅ១,១អង្សាលើសពីកម្រិតមុនបដិវត្តន៍ឧស្សាហកម្ម ដែលកៀកនឹងកម្រិតកំណើនសីតុណ្ហភាពដែលបានកំណត់ដោយកិច្ចព្រមព្រៀងទីក្រុងប៉ារីសមិនឱ្យលើសពី១,៥អង្សា។
ចំណែក មហាសមុទ្រ ត្រូវបានកត់ត្រាថា បានឡើងកម្តៅលឿនគួរឱ្យកត់សម្គាល់ក្នុងរយៈពេល២០ឆ្នាំចុងក្រោយនេះ ដោយឈានដល់កម្រិតខ្ពស់ថ្មីមួយទៀតក្នុងឆ្នាំ២០២១ នេះដែរ។ មហាសមុទ្រឡើងកម្តៅដោយសារវាបានស្រូបយកចំហាយកម្តៅដែលប្រមូលផ្តុំនៅលើផែនដីប្រហែល៩០ភាគរយ និងឧស្ម័នកាបូនឌីអុកស៊ីតប្រហែល២៣ភាគរយ។
លើសពីនេះ កម្រិតជាតិអាស៊ីតក្នុងសមុទ្រ ក៏ត្រូវបានរាយការណ៍ថា ស្ថិតក្នុងកម្រិតខ្ពស់បំផុតក្នុងរយៈពេល២៦០០០ឆ្នាំចុងក្រោយនេះដែរ ដោយសារទឹកសមុទ្របានស្រូបយកកាបូនឌីអុកស៊ីតកាន់តែច្រើនពីបរិយាកាសហើយធ្វើប្រតិកម្មជាមួយសារធាតុនោះ។ ឯកម្រិតទឹកសមុទ្រវិញ ក៏បានកើនឡើង ៤,៥មីលីម៉ែត្រក្នុងទសវត្សន៍ចុងក្រោយនេះ។ កម្រិតទឹកសមុទ្រចន្លោះឆ្នាំ២០១៣ដល់ឆ្នាំ២០២១ បានកើនឡើងទ្វេដងបើធៀបនឹងឆ្នាំ១៩៩៣ ដល់ឆ្នាំ២០០២។
ពាក់ព័ន្ធនឹងរបាយការណ៍ថ្មីនេះ អគ្គលេខាធិការរបស់ UN លោក អាន់តូនីញ៉ូ ហ្គូតេរ៉េស ក៏បានអំពាវនាវឱ្យបញ្ឈប់ការប្រើប្រាស់ឥន្ធនៈហ្វូស៊ីល និងផ្លាស់ប្តូរទៅរកការប្រើប្រាស់ប្រភពថាមពលកកើតឡើងវិញ មុនពេលពិភពលោក ត្រូវបានបំផ្លាញ៕
Tag:
បម្រែបម្រួលអាកាសធាតុ
© រក្សាសិទ្ធិដោយ thmeythmey.com