គោលនយោបាយស្តីពីការអភិវឌ្ឍឃុំ-សង្កាត់តាមព្រំដែន គឺជាគោលនយោបាយទី៣ ក្នុងចំណោមគោលនយោបាយទាំង៦របស់គណបក្សជនជាតិដើមប្រជាធិបតេយ្យកម្ពុជា សម្រាប់យកទៅអនុវត្តនៅឃុំ-សង្កាត់។ គោលនយោបាយ៥ទៀត រួមមាន ទី១ ថែរក្សាអត្តសញ្ញាណជនជាតិដើមមិនឲ្យបាត់បង់ ទី២ ផ្តល់សេវាសាធារណៈឲ្យទាន់ពេលវេលា និងមិនគិតកម្រៃពីប្រជាពលរដ្ឋ ទី៤ ការពារធនធានធម្មជាតិ មិនអនុញ្ញាត្តឲ្យមានការបំផ្លាញពីជនខិលខូច ព្រមទាំងអនុវត្តច្បាប់ឲ្យស្មើភាពគ្នា ទី៥ បញ្ឈប់ការរើសអើងអ្នកនយោបាយគ្រប់រូបភាព ទី៦ ទប់ស្កាត់ការប្រើប្រាស់គ្រឿងញៀន អំពើហិង្សា និងការពារសុវត្ថិភាពប្រជាពលរដ្ឋ។

 

គណបក្សជនជាតិដើមប្រជាធិបតេយ្យកម្ពុជា ដែលត្រូវបានបង្កើតឡើងតាំងពីអំឡុងឆ្នាំ២០១៧មក មានលោក ប្លាង ស៊ីន ជាប្រធាន។ គណបក្សនេះ បានចូលរួមការបោះឆ្នោតឃុំ-សង្កាត់អាណត្តិទី៤ ក្នុងឆ្នាំ២០១៧ និងការបោះឆ្នោតជាតិនីតិកាលទី៦ ក្នុងឆ្នាំ២០១៨ តែពុំទទួលបានកៅអីឡើយទាំងនៅឃុំ-សង្កាត់ទាំងនៅរដ្ឋសភា។

សម្រាប់ការបោះឆ្នោតឃុំ-សង្កាត់អាណត្តិទី៥ ដែលជាអាណត្តិថ្មី៥ នៅថ្ងៃទី៥ ខែមិថុនា ឆ្នាំ២០២២ គណបក្សជនជាតិដើមប្រជាធិបតេយ្យកម្ពុជា បានដាក់បេក្ខជន២០២នាក់ ឈរជាសមាជិកក្រុមប្រឹក្សាឃុំ-សង្កាត់ នៅតាមឃុំ-សង្កាត់ចំនួន១៩ ក្នុងចំណោមឃុំ-សង្កាត់សរុប១៥៦២នៅទូទាំងប្រទេស។ ក្នុងរយៈពេល១៤ថ្ងៃនេះ គឺពីថ្ងៃទី២១ ខែឧសភា ដល់ថ្ងៃទី៣ ខែមិថុនា គណបក្សនានា កំពុងធ្វើយុទ្ធនាការឃោសនារកសំឡេងគាំទ្រពីប្រជាពលរដ្ឋ៕