ក្រោយហេតុការណ៍ខាងលើនេះ បច្ចុប្បន្នអាជ្ញាធរចុះជួយអន្តរគមន៍ ខណៈអ្នករងរបួសបានធូរស្បើយផងដែរ។ គ្រោះមហន្តរាយខ្យល់កន្ត្រាក់ លាយឡំនឹងភ្លៀងធ្លាក់ នៅថ្ងៃទី៣០ ខែឧសភាបណ្ដាលឱ្យពលរដ្ឋ២នាក់រងរបួសស្រាល ផ្ទះពលរដ្ឋ៣៤ខ្នងប៉ះពាល់ស្រាល របើកដំបូល៣ខ្នងនិងរលំទាំងស្រុងមួយខ្នង ។ នេះជាការអះអាងរបស់ លោក ចែម ភឺនរីម វុទ្ធីអភិបាលស្រុកគងពិសី។
 

ថ្លែងប្រាប់សារព័ត៌មានថ្មីៗ២៥រាជធានី-ខេត្ត តាមទូរស័ព្ទ អភិបាលស្រុកគងពិសីរូបនេះបន្ថែមថា បច្ចុប្បន្នពលរដ្ឋរងគ្រោះទាំងពីរនាក់ខាងលើបានធូរស្បើយហើយ។ អាជ្ញាធរខេត្តរួមនឹងកាកបាទក្រហម ក៏បានចុះទៅទីតាំងដោយផ្ទាល់  ដើម្បី​ពិនិត្យ និងសួរសុខទុក្ខ នារសៀលថ្ងៃទី៣១ខែឧសភានេះ។ ជាមួយគ្នានេះ លោក ចែមភឺនរីម វុទ្ធីអំពាវនាវឱ្យពលរដ្ឋមានការប្រុងប្រយ័ត្ន ចំពោះហេតុការណ៍គ្រោះមហន្តរាយធម្មជាតិនេះផងដែរ។ 

គួរជម្រាបផងដែរថា ចាប់ពីថ្ងៃទី០១ ដល់ថ្ងៃទី០៧ ខែមិថុនា កម្ពុជានឹងទទួលរងឥទ្ធិពលពីជ្រលងសម្ពាធទាប ស្ថិតនៅភាគខាងលើប្រទេស ឡាវ និងប្រទេសវៀតណាម

រួមជាមួយខ្យល់មូសុងនិរតីកម្រិតខ្សោយទៅមធ្យម។ ស្ថានភាពបែបនេះ នឹងធ្វើឱ្យតំបន់មួយចំនួនក្នុងប្រទេសកម្ពុជា មានភ្លៀងធ្លាក់តិចទៅបង្គួររួមនឹងខ្យល់កន្ត្រាក់ផងដែរ៕