ជាតិ
នយោបាយជាតិ
លោក ជា មុនី សុំភ្ជាប់សាច់ឈាមជាមួយភ្លើងទៀន លោក ជា មុនី និយាយនៅមុខរូបសំណាកលោក ជា វិជ្ជា ជាបង កាលពីថ្ងៃទី២២ ខែមករា ឆ្នាំ២០២២ ដែលជាថ្ងៃរម្លឹកខួប១៨ឆ្នាំនៃការបាញ់សម្លាប់លោក ជា វិជ្ជា។ រូបពីវីដេអូលើបណ្តាញសង្គម
× លោក ជា មុនី ប្អូនប្រុសរបស់លោក ជា វិជ្ជា មេសហជីពដ៏ល្បីល្បាញ ដែលត្រូវបានគេបាញ់សម្លាប់ កាលពី១៨ឆ្នាំមុន បានសរសេរលិខិតជូនទៅលោក ទាវ វណ្ណុល ប្រធានគណបក្សភ្លើងទៀន ដើម្បីសុំចូលរួមជីវភាពនយោបាយជាមួយគណបក្សនេះដែរ។ លិខិតរបស់លោក ចុះកាលបរិច្ឆេទ នៅថ្ងៃទី៣០ ខែឧសភា ឆ្នាំ២០២២។
លោក ជា មុនី អតីតប្រធានសហព័ន្ធសហជីពសេរីកម្មករកម្ពុជា (FTUWKC) បានសរសេរក្នុងលិខិតថា៖«កម្មវិធីនយោបាយរបស់គណបក្សភ្លើងទៀន បានយកចិត្តទុកដាក់គិតគូរដល់ផលប្រយោជន៍ប្រទេសជាតិ និងប្រជាពលរដ្ឋ ប្រកាន់ខ្ជាប់នូវលទ្ធិប្រជាធិបតេយ្យ គោរពសិទ្ធិមនុស្សយ៉ាងពិតប្រាកដ ដែលធ្វើឲ្យរូបខ្ញុំ មានជំនឿទុកចិត្តដ៏កក់ក្តៅបំផុត»។
គេ មិនទាន់ដឹងថា លោក ជា មុនី នឹងទទួលបានតំណែងអ្វីក្នុងគណបក្សភ្លើងទៀនឡើយ។ សារព័ត៌មានថ្មីៗ ព្យាយាមទាក់ទងទៅសួរលោក ថាច់ សេដ្ឋា អនុប្រធាន និងជាអ្នកនាំពាក្យគណបក្សភ្លើងទៀន តែលោក ពុំទទួលការហៅចូល។
ក្នុងថ្ងៃតែមួយនេះ លោក ទូច សើ ប្រធានបច្ចុប្បន្ននៃសហព័ន្ធសហជីពសេរីកម្មករកម្ពុជា បានចេញលិខិតអំពាវនាវដល់កម្មករកម្មការិនី ឲ្យចូលរួមបោះឆ្នោតឃុំ-សង្កាត់អាណត្តិទី៥ នៅថ្ងៃទី៥ ខែមិថុនា ឆ្នាំ២០២២។ មេសហជីពរូបនេះ រំលេចក្នុងលិខិតអំពាវនាវរបស់ខ្លួនថា៖«សន្លឹកឆ្នោតសម្ងាត់របស់បងប្អូន ដែលបោះឆ្នោតជ្រើសរើសត្រូវ គឺជាជោគវាសនារបស់ប្រទេសជាតិ និងជាជោគវាសនារបស់បងប្អូនផ្ទាល់ជាម្ចាស់ឆ្នោត»។
គណបក្សភ្លើងទៀន ស្ថិតក្នុងចំណោមគណបក្សទាំង១៧ ដែលចូលរួមប្រកួតប្រជែងក្នុងការបោះឆ្នោតឃុំ-សង្កាត់អាណត្តិទី៥។ គណបក្សភ្លើងទៀន បានដាក់បេក្ខជនឈរជាសមាជិកក្រុមប្រឹក្សាឃុំ-សង្កាត់នៅតាមឃុំ-សង្កាត់ចំនួន១៦២៣ ក្នុងចំណោមឃុំ-សង្កាត់សរុប១៦៥២នៅទូទាំងប្រទេស៕
Tag:
ជា មុនី
គណបក្សភ្លើងទៀន
© រក្សាសិទ្ធិដោយ thmeythmey.com