ជាតិ
នយោបាយជាតិ
យើង កុំឈ្លោះគ្នាដោយសារបក្ស!
× ប្រជាជនគ្រប់រូប មានសិទ្ធិជ្រើសរើសគណបក្សដែលខ្លួនពេញចិត្ត តែពុំគួរយកគណបក្ស មកធ្វើជាខណ្ឌសីមាបែងចែកការសាមគ្គីក្នុងប្រជាជាតិឯងឡើយ។
មិនដូចសម័យដើមឡើយ នាពេលបច្ចុប្បន្ន កម្ពុជា ប្រកាន់យកលទ្ធិប្រជាធិបតេយ្យ ដែលផ្តល់សិទ្ធិអំណាចជូនប្រជាពលរដ្ឋ ធ្វើជាម្ចាស់វាសនានៃប្រទេសជាតិ។ ដូច្នេះ ប្រជាពលរដ្ឋ ត្រូវធ្វើខ្លួនឲ្យស័ក្តិសមជាប្រជាពលរដ្ឋក្នុងសង្គមប្រជាធិបតេយ្យ ដោយត្រូវមានជំហររឹងប៉ឹង និងអាចយល់ដឹងពីកាតព្វកិច្ចខ្លួន ដែលត្រូវធ្វើ ដោយមិនចេះតែរេចុះរេឡើងតាមតែអ្នកនយោបាយ ឬគណបក្សឡើយ។
ជាពិសេស ឈានដល់រដូវកាលបោះឆ្នោត ដែលគណបក្សនានា កំពុងប្រឈមមុខដាក់គ្នា គឺរឹតតែទាមទារឲ្យប្រជាពលរដ្ឋ រក្សាស្មារតីឲ្យនឹងន និងមិនត្រូវច្រួលច្របល់នោះទេ។ ត្រូវចាំថា យើងជាប្រជាពលរដ្ឋ គឺជាម្ចាស់ប្រទេសជាតិ មិនមែនប្រទេសជាតិទាំងមូល ជាកម្មសិទ្ធិរបស់អ្នកកាន់អំណាច អ្នកប្រឆាំង ឬគណបក្សណាមួយឡើយ។
វា ជារឿងមិនល្អទាល់តែសោះសម្រាប់សង្គមជាតិ បើអរិភាព និងភាពចលាចល កើតឡើង ដោយសារការស្រឡាញ់ឬការស្អប់បក្សនេះ-បក្សនោះ។ ប្រជាពលរដ្ឋ មិនត្រូវបែងចែកគ្នាជាក្រុម ដើម្បីគាំទ្រខាងនេះ ឲ្យបង្ក្រាបខាងនោះ ឬក៏គាំទ្រខាងនោះ ឲ្យបង្ក្រាបខាងនេះឡើយ ពីព្រោះថា បើមានអំពើហិង្សាមែន អ្នកដែលរងគ្រោះពិតប្រាកដ គឺប្រជាពលរដ្ឋ។ បទពិសោធនេះ ធ្លាប់មាននៅកម្ពុជារួចហើយ ជាក់ស្តែងដូចជាការបោះឆ្នោតក្នុងឆ្នាំ២០១៣ ជាដើម។
ប្រជាពលរដ្ឋក្នុងសង្គមប្រជាធិបតេយ្យ មិនត្រូវដើរតាមគន្លងអ្នកនយោបាយរហូតដល់ថ្នាក់ស្លាប់-រស់នោះទេ ហើយមិនត្រូវបែងចែកពណ៌សម្បុរនយោបាយរវាងគ្នានឹងគ្នា និងមិនត្រូវចាត់ទុកខ្មែរគ្នាឯងជាសត្រូវដែរ។
ប្រជាពលរដ្ឋ គប្បីយល់ឲ្យច្បាស់ថា ការទទួលឥទ្ធិពល និងការដើរតាមវិថីអ្នកនយោបាយ ឬគណបក្សរហូតដល់ស្អប់ខ្ពើមប្រជាពលរដ្ឋជាជាតិសាសន៍ខ្លួនឯង គឺជាដើមចម ដែលបណ្តាលឲ្យជាតិទាំងមូល ជួបការបែកបាក់យ៉ាងធ្ងន់ធ្ងរ។ សម្រាប់អ្នកនយោបាយវិញ គួរតែយកផលវិបាកនៃការឈ្លោះគ្នា មកធ្វើជាមេរៀន ដើម្បីប្រែក្លាយប្រទេសជាតិឲ្យមានសាមគ្តីភាព។
ដូនតាខ្មែរ បន្សល់ទុកពាក្យអប់រំមួយឃ្លា ដើម្បីឲ្យកូនចៅជំនាន់ក្រោយទន្ទេញឲ្យចាំជានិច្ច គឺ «សាមគ្គីរស់ បែកបាក់សាមគ្គីស្លាប់»៕
Tag:
ទស្សនៈ
បក្ស
សាមគ្គី
បោះឆ្នោត
© រក្សាសិទ្ធិដោយ thmeythmey.com