អគ្គស្នងការនគរបាលជាតិ សរសេរក្នុងលិខិតរំលែកទុក្ខដូច្នេះថា៖«មរណភាពរបស់អ្នកស្រី សួង សុភាក់ គឺជាការបាត់បង់កូន ភរិយា និងម្តាយជាទីស្រឡាញ់ ប្រកបដោយព្រហ្មវិហារធម៌ ក៏ដូចជាការបាត់បង់មន្រ្តីនគរបាលជាតិដ៏អង់អាចក្លាហាន ដោយបានលះបង់ពេលវេលា កម្លាំងកាយចិត្ត និងសេចក្តីសុខផ្ទាល់ខ្លួន រហូតអវសាននៃជីវិត ដើម្បីបុព្វហេតុសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ដែលពលិកម្មនេះ គឺជាគំរូដ៏ឧត្តុង្គឧត្តម ទទួលបានការគោរពកោតសរសើរ ស្ងប់ស្ងែងពីថ្នាក់ដឹកនាំ និងមន្រ្តីនគរបាលជាតិ ក៏ដូចជាប្រជាពលរដ្ឋខ្មែរទូទាំងប្រទេសផងដែរ»។ 
 

អ្នកស្រី សួង សុខភាក់ ដែលមានឋានន្តរស័ក្តិជាអនុសេនីយ៍ត្រី (ស័ក្តិ១) បានបាត់បង់ជីវិតក្នុងវ័យ២៨ឆ្នាំ ក្នុងឧបទ្ទវហេតុក្រឡាប់រថយន្តចូលក្នុងប្រឡាយ នៅភូមិពពេល ឃុំក្របៅ កាលម៉ោងជាង១២កន្លះ ថ្ងៃទី៥ ខែមិថុនា ឆ្នាំ២០២២ ដែលជាថ្ងៃបោះឆ្នោតឃុំ-សង្កាត់អាណត្តិទី៥។ ប្អូនប្រុសបង្កើតរបស់អ្នកស្រី ដែលជាអ្នកបើកបរ ក៏បាត់បង់ជីវិតក្នុងឧបទ្ទវហេតុនេះដែរ។ ប្អូនប្រុសរបស់អ្នកស្រី បានបើករថយន្តជូនអ្នកស្រី ទៅកាន់ការិយាល័យបោះឆ្នោត ដើម្បីចូលរួមរក្សាសន្តិសុខ៕