ជាតិ
កោះតៃវ៉ាន់ស្វាគមន៍ការលក់អាវុធរបស់អាមេរិកជាលើកទី៤មកឱ្យខ្លួនក្រោមអាណត្តិលោក Biden
លោក Joe Biden ក្នុងពេលជួបប្រជុំតាមអនឡាញមួយនៅក្នុងអគារការិយាល័យប្រតិបត្តិ Eisenhower ក្នុងរដ្ឋធានីវ៉ាស៊ីនតោន
×![]()
ដោយ: VOA
ទីក្រុងតៃប៉ិ - កោះតៃវ៉ាន់កាលពីថ្ងៃព្រហស្បតិ៍ បានស្វាគមន៍ការយល់ព្រមរបស់អាមេរិកក្នុងការលក់ឧបករណ៍កងទ័ពជើងទឹកដែលមានតម្លៃប្រមាណ១២០លានដុល្លារឱ្យខ្លួនដែលសម្ពន្ធមិត្តទាំង២នេះនិយាយថា ជាការជំរុញឱ្យដែនកោះមួយនេះ «ត្រៀមលក្ខណៈប្រយុទ្ធរួចជាស្រេច» ក៏ដូចជាការផ្តល់សមត្ថភាពឱ្យខ្លួនធ្វើការជាមួយកងទ័ពអាមេរិកផងដែរ។ នេះបើតាមសេចក្តីរាយ ការណ៍របស់ទីភ្នាក់ងារព័ត៌មាន AFP។
តៃវ៉ាន់ដែលគ្រប់គ្រងតាមបែបប្រជាធិបតេយ្យនោះបានទទួលរងការគំរាមកំហែងពីការចូលឈ្លានជាប្រចាំពីប្រទេសផ្តាច់ការចិនដីគោកដែលចាត់ទុកដែនកោះមួយនេះថាជាផ្នែកមួយនៃបូរណភាពទឹកដីរបស់ខ្លួន ហើយនឹងត្រូវយកមកស្ថិតក្រោមការគ្រប់គ្រងរបស់ខ្លួនវិញនៅថ្ងៃណាមួយ បើទោះជាត្រូវប្រើកម្លាំងទ័ពជាចាំបាច់ក៏ដោយ។
នៅក្រោមច្បាប់ដែលអនុម័តដោយសភាអាមេរិក សហរដ្ឋអាមេរិកត្រូវលក់គ្រឿងសព្វាវុធឱ្យកោះតៃវ៉ាន់ដើម្បីធានាថា តៃវ៉ាន់អាចការពារខ្លួនឯងប្រឆាំងនឹងរដ្ឋាភិបាលក្រុងប៉េកាំងដែលមានកងទ័ពធំជាងខ្លួនដ៏លើសលប់។
ទន្ទឹមគ្នានោះដែរ ប្រធានាធិបតីអាមេរិកលោក Joe Biden បានស្ថិតក្រោមសម្ពាធរបស់គណបក្សទាំងពីរ ឱ្យបង្កើនទំនាក់ទំនងដ៏ជ្រាលជ្រៅជាមួយកោះតៃវ៉ាន់ខណៈដែលរដ្ឋាភិបាលក្រុងវ៉ាស៊ីនតោនកំពុងប្រជែងយកឥទ្ធិពលនៅក្នុងតំបន់អាស៊ីប៉ាស៊ីហ្វិកដើម្បីទប់ទល់ជាមួយចិននោះ។
រដ្ឋាភិបាលក្រុងវ៉ាស៊ីនតោនបានប្រកាសនៅថ្ងៃពុធថា ខ្លួនបានយល់ព្រមលក់គ្រឿងបន្លាស់និងឧបករណ៍ជួសជុលនាវានិងប្រព័ន្ធនាវាក៏ដូចជាការផ្តល់ជំនួយបច្ចេកទេស ភស្តុភាដែលឧបករណ៍ទាំងនោះ នឹងជួយកោះតៃវ៉ាន់ក្នុងការបង្កើនសមត្ថភាពការងារជាមួយសហរដ្ឋអាមេរិកនិងសម្ពន្ធមិត្តដទៃទៀតផងដែរ។
ទីភ្នាក់ងារសហប្រតិបត្តិការសន្តិសុខនៃក្រសួងការពារជាតិសហរដ្ឋអាមេរិកបានបញ្ជាក់នៅក្នុងសេចក្តីថ្លែងការណ៍ថា «ការលក់ឧបករណ៍យោធាទំាងនេះនឹងចូលរួមលើកកម្ពស់ដល់នាវាចម្បាំងរបស់កោះតៃវ៉ាន់និងបង្កើនសមត្ថភាពដល់តៃវ៉ាន់ក្នុងការឆ្លើយតបទៅនឹងការគំរាមកំហែងនាពេលបច្ចុប្បន្ននិងអនាគត»។
នេះជាការលក់អាវុធលើកទី៤របស់សហរដ្ឋអាមេរិកទៅឱ្យកោះតៃវ៉ាន់ក្រោមប្រធានាធិបតីអាមេរិកលោក Biden ហើយនឹងជាលើកទី៣ផងដែរសម្រាប់ឆ្នាំនេះ។
កោះតៃវ៉ាន់និយាយកាលពីថ្ងៃព្រហស្បតិ៍ថា ការលក់នេះនឹងចូលជាធរមានក្នុងរយៈពេល១ខែ៕
© រក្សាសិទ្ធិដោយ thmeythmey.com
