ជាតិ
ស.ស.យ.ក.៖ ការបោះឆ្នោតឃុំសង្កាត់មានបញ្ហាបន្តិចបន្តួច តែបានប្រព្រឹត្តទៅដោយសេរី និងយុត្តិធម៌
× ស.ស.យ.ក. បានបញ្ជូនសមាជិករបស់ខ្លួនជិត៤ម៉ឺននាក់ ឱ្យធ្វើជាអ្នកសង្កេតការណ៍នៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥នេះ។ អ្នកសង្កេតការណ៍ទាំងនេះបានតាមដានដំណើរការបោះឆ្នោត ចាប់តាំងពីដំណាក់កាលចុះឈ្មោះបោះឆ្នោត អំឡុងពេលឃោសនា ថ្ងៃបោះឆ្នោត និងពេលរាប់សន្លឹកឆ្នោត។
សហភាពសហព័ន្ធយុវជនកម្ពុជា (ស.ស.យ.ក.) វាយតម្លៃជារួមថា ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥កន្លងទៅថ្មីៗនេះ បានប្រព្រឹត្តទៅក្នុងបរិយាកាសល្អប្រសើរ និងតាមនីតិវិធីច្បាប់។ ទោះបីជាសមាគមយុវជនដ៏ធំនេះ កត់សម្គាល់អំពីភាពមិនប្រក្រតីបន្តិចបន្តួចខ្លះក្ដី ស្ថាប័ននេះអះអាង ការបោះឆ្នោតមានតំណើរការ ដោយសេរី យុត្តិធម៌ មិនលម្អៀង។ ការវាយតម្លៃនេះ ត្រូវបានធ្វើឡើងតាមរយៈសេចក្តីថ្លែងការណ៍របស់ខ្លួន ដែលត្រូវបានចេញផ្សាយនៅថ្ងៃចុងសប្តាហ៍នេះ។
បញ្ហាខ្លះដែលត្រូវបានរកឃើញដោយ ស.ស.យ.ក. មានទាក់ទងនឹងការសកម្មភាពឃោសនាខុសច្បាប់, មន្ត្រីគណៈកម្មការការិយាល័យបោះឆ្នោត និងភ្នាក់ងារនយោបាយខ្លះ មិនយល់ពីសិទ្ធិ ភារកិច្ចរបស់អ្នកសង្កេតការណ៍, ភ្នាក់ងារគណបក្សនយោបាយ និងតួអង្គពាក់ព័ន្ធមួយចំនួន មិនបានយល់ច្បាស់ពីនីតិវិធី នៃដំណើរការរាប់សន្លឹកឆ្នោត។
ទោះយ៉ាងនេះក្ដី ស.ស.យ.ក. សរសេរនៅក្នុងសេចក្ដីថ្លែងការណ៍ថា រាល់ភាពមិនប្រក្រតីទាំងអស់ ត្រូវបានដោះស្រាយតាមយន្តការច្បាប់ របស់គណៈកម្មាធិការជាតិរៀបចំការបោះឆ្នោត។
ស.ស.យ.ក. សរសេរយ៉ាងដូច្នេះថា៖«កិច្ចដំណើរការនៃការបោះឆ្នោត ជ្រើសរើសក្រុមប្រឹក្សាឃុំសង្កាត់ អាណត្តិទី៥ នាពេលកន្លងទៅនេះ បានប្រព្រឹត្តទៅក្នុងបរិយាកាសល្អប្រសើរ គ្មានការបង្ខិតបង្ខំ គ្មានការគំរាមកំហែង និងគ្មានហិង្សា។ ភាពមិនប្រក្រតី និងបណ្ដឹងតវ៉ាមួយចំនួន មិនបានបណ្ដាលឱ្យប៉ះពាល់ដល់ដំណើរការ និងលទ្ធផលបោះឆ្នោតនោះទេ។»។
នៅក្នុងសេចក្តីថ្លែងការណ៍ដដែល ស.ស.យ.ក. ក៏បានកោតសរសើរ គណៈកម្មាធិការជាតិរៀបចំការបោះឆ្នោត និងសមាជិកអ្នកសង្កេតការណ៍របស់ខ្លួន ដែលខិតខំបំពេញការងារដោយស្មារតីទទួលខុសត្រូវ។
នៅក្នុងដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ កាលពីថ្ងៃទី៥ ខែមិថុនាឆ្នាំ២០២២ កន្លងទៅនេះ មានពលរដ្ឋជិត៧លាន ៤សែននាក់ ក្នុងចំណោមអ្នកមានសិទ្ធិបោះឆ្នោតជាង ៩លាន ២សែននាក់ បានទៅចូលរួមបោះឆ្នោត។ មានគណបក្សនយោបាយចំនួន១៧ ដែលបានចូលរួមប្រកួតប្រជែង នៅក្នុងការបោះឆ្នោតជ្រើសរើសឃុំសង្កាត់ទូទាំងប្រទេសដែលមាន ១ ៦៥២ ឃុំសង្កាត់៕
Tag:
បោះឆ្នោត
ស.ស.យ.ក.
ឃុំ-សង្កាត់
© រក្សាសិទ្ធិដោយ thmeythmey.com