ពានរង្វាន់លំដាប់ពិភពលោក FIFA WORLD CUP មកដល់កម្ពុជា ជាលក្ខណៈដំណើរគោចរ “FIFA WORLD CUP Trophy Tour” ដែលទទួលបានការអនុញ្ញាតពីប្រមុខរដ្ឋាភិបាល។ ក្រៅពីនេះ ក៏មានការបើកឲ្យមានការទស្សនា និងថតរូបជាមួយពានរង្វាន់បាល់ទាត់ពិភពលោកបាន នៅពហុកីឡដ្ឋាន មរតកតេជោ។ ដំណើរគោចរពាន FIFA World Cup មានការសម្របសម្រួលរៀបចំដោយគណៈកម្មធិការជាតិអូឡាំពិកកម្ពុជា និងក្រុមហ៊ុនភេសជ្ជៈកូកា កូឡា ។
 

សម្ដេច ហ៊ុន សែន ទទួលដំណើរគោចរ ពាន FIFA World Cup នេះ ស្របពេលដែលដំណើរឆ្ពោះទៅ World Cup នៅកាតា រកឃើញក្រុម៣២ ហើយ ក្រោយកូស្តារីកា បានយកឈ្នះនូវែលសេឡង់ ដោយលទ្ធផល១-០ នៅថ្ងៃទី១៥ មិថុនា។ ១គ្រាប់របស់កូស្តារីកា រកបានដោយកីឡាករ J.Campbell នៅនាទីទី៣។


 

ដំណើរជុំវិញពិភពលោកនៃព្រឹត្តការណ៍ “FIFA WORLD CUP Trophy Tour” មានចំនួន ៥១ ប្រទេសដែលត្រូវបានដាក់តាំង ស្របពេលការប្រកួតជម្រុះ ក្រុមទាំង៣២ ផងដែរ។ ពានរង្វាន់នេះផងដែរ នឹងត្រូវដាក់តាំង ក្នុងកម្មវិធី Coca-Cola Arena នាក្នុងទីក្រុង ឌូបៃ ដោយមានអតីតតារាឆ្នើម របស់ក្រុមបាល់ទាត់ អធិរាជសរៀលម៉ាឌី្រត (Real Madrid)​ ២រូប ចូលរួមមាន Iker Casillas (អ្នកចាំទី) និងខ្សែបម្រើ Kaka។ នេះជាសេចក្តីបញ្ជាក់របស់ FIFA។
 

គួរបញ្ជាក់ផងដែរថា ព្រឹត្តិការណ៍ដំណើរគោចរជុំវិញពិភពលោកនៃពានរង្វាន់បាល់ទាត់ពិភពលោក “FIFA WORLD CUP Trophy Tour” ចេញទីក្រុង ឌូបៃ ​កាលពីថ្ងៃទី១២ ឧសភា រហូតដល់ខែធ្នូ ឆ្នាំ២០២២។ ពានរង្វាន់បាលទាត់ពិភពលោក ស្រោបមាសសុទ្ធទម្ងន់ ១៨ ការ៉ាត់ ស្មើ៦គីឡូក្រាម៕