កម្ពុជា កន្លងមក បានចូលរួមជាមួយបណ្តាប្រទេសផ្សេងទៀតនៅក្នុងមហាសន្និបាតអង្គការសហប្រជាជាតិបោះឆ្នោតគាំទ្រលើសេចក្តីសម្រេចថ្កោលទោសរុស្ស៊ី ទាក់ទិននឹងសង្រ្គាមនៅអ៊ុយក្រែន រួមទាំងជំរុញឱ្យដកទ័ពចេញភ្លាមៗ និងដោយគ្មានលក្ខខណ្ឌ។ ទាក់ទិននឹងបញ្ហានេះ ស្ថានទូតរុស្ស៊ីប្រចាំនៅទីក្រុងភ្នំពេញ បានលើកឡើងថា រុស្ស៊ីគោរពការសម្រេចចិត្តរបស់កម្ពុជា ក្នុងនាមជារដ្ឋអធិបតេយ្យ។ 

 

«...រុស្ស៊ីគោរពគោលនយោបាយការបរទេសឯករាជ្យរបស់កម្ពុជា»។ លោក Rafael Iangareev មន្រ្តីព័ត៌មាននៅស្ថានទូតរុស្ស៊ីប្រចាំនៅភ្នំពេញ ឆ្លើយបែបនេះទៅនឹងសំណួរអ្នកសារព័ត៌មានថ្មីៗ ដែលបានសួរពីការយល់ឃើញរបស់រុស្ស៊ី ជុំវិញជំហររបស់កម្ពុជាក្នុងសន្និសីទសារព័ត៌មានពីស្ថានការណ៍អ៊ុយក្រែនលើកទី៤ នៅថ្ងៃទី១៥ ខែមិថុនា។ 

 

ដោយចាត់ទុកជាមិត្តជិតស្និទ្ធ និងមានរយៈពេលយូរ មន្រ្តីស្ថានទូតរុស្ស៊ីរូបនេះ បានបន្ថែមថា រុស្ស៊ី យល់ពីការសម្រេចចិត្តរបស់កម្ពុជា ដែលប្រហែលជាមានការឆ្លើយតបផ្សេងៗគ្នាលើបញ្ហានៅអ៊ុយក្រែន។ បើតាមលោក Iangareev រុស្ស៊ីមិនអាចមិនខ្វល់ពីអ្វីពីស្ថានការណ៍នៅតំបន់ដុនបាស ដែលរដ្ឋាភិបាលក្រុងមូស្គូ បានអះអាងថា មានការសម្លាប់ប្រជាជនខ្លួនបានទេ។ 

 

ក្នុងសន្និសីទសារព័ត៌មានដែលធ្វើឡើងតាមប្រព័ន្ធវីដេអូនេះ មន្រ្តីព័ត៌មានដដែល បានបន្តថា រុស្ស៊ីនឹងព្យាយាមឱ្យពីលទ្ធភាព ដើម្បីពន្យល់កម្ពុជាឱ្យបានយល់ពីប្រតិបត្តិការយោធារបស់ខ្លួន និងស្ថានការណ៍នៅអ៊ុយក្រែន។ 

 

មកទល់ពេលនេះ រុស្ស៊ី បានឈ្លានពានអ៊ុយក្រែនជាងរយៈពេល ១០០ថ្ងៃហើយ ដោយផ្តោតលើការរំដោះតំបន់ដុនបាស។ សង្រ្គាមមួយនេះ បានធ្វើឱ្យប្រជាជនស៊ីវិលនៅអ៊ុយក្រែនប្រមាណជាង ៤ពាន់នាក់បាត់បង់ជីវិត និងជាង ៥ពាន់នាក់របួស។ នេះបើតាមទិន្នន័យរបស់ការិយាល័យស្នងការជាន់ខ្ពស់របស់អង្គការសហប្រជាជាតិ គិតត្រឹមថ្ងៃទី១៤ ខែមិថុនា។ 

 

មិនតែប៉ុណ្ណោះ ជម្លោះមួយនេះ បានធ្វើឱ្យតម្លៃប្រភពថាមពលហក់ឡើងខ្ពស់ ដែលជំរុញឱ្យតម្លៃអាហារ និងទំនិញផ្សេងៗ កើនតាមនោះដែរ៕