មេដឹកនាំបក្សប្រឆាំងថៃ Pheu Thai លោក Cholnan Srikaew និងសមាជិកក្រុមប្រឆាំងក្នុងសភានៅថ្ងៃទី១៥ ខែមិថុនា បានបញ្ជូនសេចក្តីស្នើទៅកាន់ប្រធានសភាថៃដើម្បីស្វែងរកការបោះឆ្នោតដកទំនុកចិត្តពីនាយករដ្ឋមន្រ្តីថៃ ប្រាយុទ្ធ ចន្ទអូចា និងសមាជិកគណៈរដ្ឋមន្រ្តីជាន់ខ្ពស់ថៃ ១០រូបទៀត។ បក្សប្រឆាំងថៃបានចោទរដ្ឋាភិបាលលោក ប្រាយុទ្ធ ពីបញ្ហាជាច្រើនដូចជាអំពើពុករលួយ ការគ្រប់គ្រងសេដ្ឋកិច្ចមិនបានល្អ និងធ្វើឱ្យខូចដល់លទ្ធិប្រជាធិបតេយ្យតាមរយៈក្តោបក្តាប់អំណាចជាច្រើនឆ្នាំ។ 

 

« លោក (លោកប្រាយុទ្ធ) ជាមេដឹកនាំដែលមានគុណវិបត្តិ ចូលចិត្តកាន់កាប់អំណាច មិនគោរពនីតិរដ្ឋ ខ្វះសីលធម៌ និងបរាជ័យគ្រប់គ្រងកិច្ចការរដ្ឋ»។ លោក Cholnan Srikaew បញ្ជាក់ទៅកាន់សភាថៃបែបនេះ។ 

 

យ៉ាងណាមិញ អ្នកនាំពាក្យរដ្ឋាភិបាលថៃ Thanakorn Wangboonkongchana អះអាងថា រដ្ឋាភិបាលលោកគ្មានអ្វីនឹងខ្លាចចំពោះសំណើដកទំនុកចិត្តនោះទេ។​ បន្ថែមពីនេះ នាយករដ្ឋមន្រ្តីថៃត្រៀមរួចរាល់ហើយដើម្បីពន្យល់ និងឆ្លើយរាល់បញ្ហា ពីព្រោះរដ្ឋាភិបាលជឿជាក់ណាស់ថា បានដឹកនាំប្រទេសដោយស្មោះត្រង់​ និងគ្មានអំពើពុករលួយ។ នេះបើតាមទីភ្នាក់ងារព័ត៌មាន Reuters។

 

នេះជាលើកទីបួនហើយតាំងពីការបោះឆ្នោតឆ្នាំ ២០១៩ ដែលបក្យប្រឆាំងព្យាយាមបោះឆ្នោតទម្លាក់លោក ប្រាយុទ្ធ ។ សំណើឱ្យមានការបោះឆ្នោតដកទំនុកចិត្តលើកនេះធ្វើឡើង ខណៈជម្លោះកំពុងកើតមានក្នុងចំណោមសម្ព័ន្ធភាពចម្រុះដឹកនាំរដ្ឋាភិបាល និងការធ្លាក់ចុះប្រជាប្រិយភាពរបស់នាយករដ្ឋមន្រ្តី។

 

ពាក់ព័ន្ធនឹងរឿងនេះ បើតាមអ្នកជំនាញ សំឡេងរបស់បក្សប្រឆាំងនៅសភា ទំនងជាមិនអាចផ្តួលបក្សកាន់អំណាចបានទេ ហើយលោក ប្រាយុទ្ធ នឹងអាចគេចផុតពីការទម្លាក់ចេញពីតំណែងម្តងទៀត៕