ប៉ាគីស្ថានដែលមានពលរដ្ឋប្រមាណ២២០លាននាក់ ស្ថិតក្នុងចំណោមប្រជាជាតិលើពិភពលោក ដែលនាំចូល «តែ» ច្រើនជាងគេ ដោយពលរដ្ឋទាំងមាន ទាំងក្រ ពេញនិយមផឹកយ៉ាងខ្លាំង។ បើតាមលោក Ahsan Iqbal ការផឹកតែកាន់តែតិចពែង នឹងជួយកាត់បន្ថយវិក្កយបត្រនៃការនាំចូលកាន់តែខ្ពស់របស់ប៉ាគីស្ថាន។

 

កាលពីឆ្នាំមុន ប៉ាគីស្ថាន បានចំណាយរហូតដល់ទៅជាង៦០០លានដុល្លារអាម៉េរិកលើការនាំចូលតែ។ «ខ្ញុំសូមអំពាវនាវឲ្យមានការកាត់បន្ថយការផឹកតែពី២ពែងឲ្យមកនៅតែ១ពែង ពីព្រោះយើងនាំចូលតែដែលជាកម្ចី»។ លោក Iqbal បានថ្លែងយ៉ាងដូច្នេះ ហើយត្រូវបានដកស្រង់ដោយបណ្តាញព័ត៌មានប៉ាគីស្ថាន។

 

យោងតាម Aljazeera ពលរដ្ឋប៉ាគីស្ថានម្នាក់ត្រូវបានគេជឿជាក់ថា ផឹកតែជាមធ្យមយ៉ាងហោចណាស់៣ពែងក្នុងមួយថ្ងៃ។ ការនាំចូលតែបានក្លាយជារឿងដ៏ឈឺក្បាលមួយលើការប្រើប្រាស់រូបិយបណ្ណបម្រុងពីធនាគារកណ្តាល។

 

សំណើរបស់លោក Iqbal រងនូវការរិះគន់យ៉ាងខ្លាំងផងដែរ ជាពិសេសនៅលើបណ្តាញសង្គម។ អ្នកបញ្ចេញយោបល់ជាច្រើនបានសម្តែងការហួសចិត្ត ដែលថាការកាត់បន្ថយភេសជ្ជៈកាហ្វេអ៊ីន ជាចំណែកមួយនៃការដោះស្រាយវិបត្តិសេដ្ឋកិច្ចជាតិ។
 

ទុនបម្រុងប្តូរប្រាក់បរទេសរបស់ប៉ាគីស្ថាន បានធ្លាក់ចុះពីប្រមាណ១៦ពាន់លានដុល្លារក្នុងខែកុម្ភៈ មកតិចជាង១០ពាន់លានដុល្លារនាសប្តាហ៍ទីមួយនៃខែមិថុនា។ ករណីនេះបង្កឲ្យមានការកាត់បន្ថយលើការនាំចូលទំនិញមួយចំនួន។

 

រដ្ឋាភិបាលលោក Shehbaz Sharif ដែលបន្តតំណែងពីលោក Imran Khan នៅតែបន្តព្យាយាមដោះស្រាយវិបត្តិ បន្ទាប់ពីទទួលការបោះឆ្នោតផ្តល់ទំនុកចិត្តពីសភា កាលពីអំឡុងខែមេសា មក៕