មន្រ្តីតុលាការក្រុងហាណូយ បានបញ្ជាក់ពីការកាត់ទោសលោកស្រី Nguy Thi Khanh ទៅកាន់ទីភ្នាក់ងារព័ត៌មាន AFP ប៉ុន្តែមិនបានផ្តល់អ្វីឱ្យលម្អិតនោះទេ។ 

 

«ចំពោះការចូលរួមរបស់លោកស្រីក្នុងសង្គមវៀតណាម និងកិច្ចការរបស់លោកស្រី សាលដីកាដែលសម្រេចនោះ គឺពិតជាឃោរឃៅណាស់»។ អង្គការបរិស្ថានដែលលោកស្រីជាអ្នកបង្កើត Green ID អះអាងបែបនេះទៅកាន់ទីភ្នាក់ងារព័ត៌មាន AFP នៅថ្ងៃទី១៨ ខែមិថុនា។ 

 

លោកស្រី Khanh វ័យ៤៦ឆ្នាំ ត្រូវបានចាប់ខ្លួនក្នុងខែកុម្ភៈ ក្រោមបទចោទគេចវេសការបង់ពន្ធ។ លោកស្រីជាសកម្មជនបរិស្ថានដ៏លេចធ្លោ និងត្រូវបានគេស្គាល់ជាសកលម្នាក់ចំពោះការរៀបចំយុទ្ធនាការដឹកនាំសហគមន៍ជាពិសេសក្មេងៗឱ្យគាំទ្របរិស្ថាន។ រដ្ឋាភិបាលវៀតណាម ហាក់មិនស្វាគមន៍សកម្មភាពបែបនេះឡើយ ស្របពេលប៉ុន្មានឆ្នាំមកនេះ រដ្ឋាភិបាលហាណូយបានចាប់ខ្លួនអ្នកដែលត្រូវបានចាត់ទុកថាប្រឆាំងនឹងរដ្ឋាភិបាលដែលរួមមានអ្នកកាសែតឯករាជ្យ សកម្មជនសិទ្ធិមនុស្ស និងសកម្មជនបរិស្ថានជាដើម។

 

ក្នុងឆ្នាំ២០១៨ សកម្មជនបរិស្ថានរូបនេះក្លាយជាជនជាតិវៀតណាមដំបូងគេដែលទទួលបានពានរង្វាន់ Goldman Environmental Prize បន្ទាប់ពីលោកស្រីបានបញ្ចុះបញ្ចូលរដ្ឋាភិបាលវៀតណាមដោយជោគជ័យក្នុងការកាត់បន្ថយប្រើប្រាស់ធ្យូងថ្មក្នុងផែនការថាមពលជាតិឆ្នាំ​២០៣០។

 

ពាក់ព័ន្ធនឹងបញ្ហាខាងលើ លោក Michael Sutton នាយកប្រតិបត្តិពានរង្វាន់ Goldman Environmental Prize បានផ្ញើលិខិតទៅស្ថានទូតវៀតណាមប្រចាំក្រុងវ៉ាស៊ីនតោនដោយអំពាវនាវឱ្យដោះលែងលោកស្រី Khanh ជាបន្ទាន់។

 

« យើងជឿថា ការចោទប្រកាន់តាមផ្លូវច្បាប់ប្រឆាំងនឹងលោកស្រី (Khanh) ជាផ្នែកមួយនៃកិច្ចខិតខំដើម្បីបំបិទមាត់មេដឹកនាំបរិស្ថាននៅក្នុងវៀតណាម»។ លោក Sutton សរសេរបែបនេះដោយបន្ថែមថា លោកមិនយល់ពីការកាត់ទោសទាំងនេះទេ ពីព្រោះលោកស្រីបានធ្វើគ្រប់យ៉ាងដើម្បីជួយវៀតណាមសម្រេចបានគោលដៅថាមពលរបស់ខ្លួន រួមទាំងធ្វើឱ្យប្រទេសមានមុខមាត់ល្អលើឆាកអន្តរជាតិថែមទៀត។ 

 

កាលពីចុងខែមករា អាជ្ញាធរវៀតណាមក៏បានកាត់ក្តីសកម្មជនបរិស្ថាន២រូបទៀតឱ្យជាប់ពន្ធនាគារពីបទចោទគេចវេសពន្ធដូចគ្នា ស្របពេលអ្នកទាំងនេះប្រឆាំងនឹងគោលនយោបាយធ្យូងថ្មរបស់រដ្ឋាភិបាល៕