ជាតិ
កូនកាត់ខ្មែរ-បារាំង ហង្ស ម៉ានីតា ក្លាយជាតំណាងទី៦របស់កម្ពុជាក្នុង Miss Universe រូបពីផេក MUC
× ភ្នំពេញ៖ កញ្ញា ហង្ស ម៉ានីតា កូនខ្មែរកាត់បារាំង ដែលអាចនិយាយបាន៤ភាសា ក្លាយជាម្ចាស់មកុដ Miss Universe Cambodia 2022 ដើម្បីបន្តទៅប្រកួតលើឆាកអន្តរជាតិ។ ម៉ានីតា ក៏ក្លាយជាតំណាងទី៦របស់កម្ពុជាក្នុងកម្មវិធីបវកញ្ញាចក្រវាល (Miss Universe) ផងដែរ។
សម្រាប់ការប្រកួតប្រជែងថ្នាក់ជាតិ Miss Universe Cambodia 2022 កញ្ញា ហង្ស ម៉ានីតា បានយកឈ្នះបេក្ខនារី៤រូបទៀត គឺ កញ្ញា ហេង សុទ្ធនិស្ស័យ កញ្ញា រតនា សុខាវត្តី កញ្ញា ហ៊ុន ហ្គេចឡាង និងកញ្ញា ហេង ប៉ូនីកា។
មិនទាន់មានព័ត៌មានពិស្តារទាក់ទងនឹងការប្រកួត Miss Universe ឡើយ។ បើគិតចាប់តាំងពីការបង្ហាញខ្លួនដំបូងនៅឆ្នាំ២០១៧មក ម៉ានីតា នឹងក្លាយជាតំណាងទី៦របស់កម្ពុជាក្នុងព្រឹត្តិការណ៍អន្តរជាតិនេះ ពោលគឺបន្ទាប់ពី ប៊ី សុធារី, រឿន ណាត, សំណាង អាលីណា, រ៉េត សារីតា និង ងិន ម៉ារឌី។
កញ្ញា ហង្ស ម៉ានីតា មានម្តាយជាជនជាតិខ្មែរ និងឪពុកជាជនជាតិបារាំង ហើយកើត និងធំធាត់នៅលើទឹកដីកម្ពុជា។ នាងមានសមត្ថភាពនិយាយបាន៤ភាសា គឺភាសាខ្មែរ បារាំង អង់គ្លេស និងភាសាអេស្ប៉ាញ។
Miss Universe (បវរកញ្ញាចក្រវាល) គឺជាកម្មវិធីប្រកួតសម្រស់អន្តរជាតិប្រចាំឆ្នាំ ដែលដំណើរការដោយ Miss Universe Organization ដោយមានមូលដ្ឋាននៅសហរដ្ឋអាមេរិក។ កម្មវិធី Miss Universe ជាកម្មវិធីដ៏ពេញនិយមបំផុតលើពិភពលោក ដែលមានអ្នកទស្សនាប្រមាណជាង ៥០០លាននាក់ក្នុងតំបន់ជាង១៩០។
កាលពីឆ្នាំ២០២១ បវរកញ្ញាឥណ្ឌា Harnaaz Sandhu បានក្លាយជាម្ចាស់មកុដ ក្នុងព្រឹត្តិការណ៍ប្រកួតលើកទី៧០ ដែលរៀបចំនៅ Port of Eilat ក្រុង Eilat ប្រទេសអ៊ីស្រាអែល។ បវរកញ្ញាវ័យ២១ឆ្នាំរូបនេះ បានទទួលសំឡេងគាំទ្រច្រើនជាងបវរកញ្ញាប៉ារ៉ាហ្គាយ Nadia Ferreira និងបវរកញ្ញាអាហ្វ្រិកខាងត្បូង Lalela Mswane ដើម្បីបន្តតំណែងពីបវរកញ្ញាម៉ិកស៊ិក Andrea Meza៕
Tag:
សិល្បៈ
បវរកញ្ញាចក្រវាល
សិល្បៈសម័យ
© រក្សាសិទ្ធិដោយ thmeythmey.com