អន្តរជាតិ
អូស្ត្រាលី នឹងហាមឃាត់ការនាំចូលមាសពីរុស្ស៊ី ហើយផ្ដល់រថពាសដែកឱ្យអ៊ុយក្រែនបន្ថែម នាយករដ្ឋមន្រ្តីអូស្ត្រាលី អាន់ថូនី អាល់បានីស ក្នុងសន្និសីទសារព័ត៌មានជាមួយប្រធានាធិបតីអ៊ុយក្រែននៅទីក្រុងកៀវ។ រូបថត AFP
× រដ្ឋធានីកៀវនៅថ្ងៃទី៣ ខែកក្កដា នាយករដ្ឋមន្ត្រីអូស្ត្រាលី អាន់ថូនី អាល់បានីស បានប្រកាសពីការផ្ដល់ជំនួយយោធាបន្ថែមទៀតឱ្យអ៊ុយក្រែនដើម្បីទប់ទល់សកម្មភាពយោធារុស្ស៊ី។ លើសពីនេះ អូស្ត្រាលីក៏នឹងហាមឃាត់ការនាំចូលមាសពីរុស្ស៊ីដែរ។ លោក អាល់បានីស សន្យានឹងបង្ហាញពិភពលោកឱ្យកាន់តែច្បាស់ពីសាមគ្គីភាពរវាងប្រជាជនអូស្ត្រាលី និងប្រជាជនអ៊ុយក្រែន។
ថ្លែងក្នុងសន្និសីទកាសែតមួយនៅរដ្ឋធានីកៀវជាមួយប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី នាយករដ្ឋមន្ត្រីអូស្ត្រាលី អាន់ថូនី អាល់បានីស បានលើកឡើងថា អូស្ត្រាលីនឹងឈប់នាំចូលមាសពីរុស្ស៊ី ហើយក៏នឹងដាក់ទណ្ឌកម្មព្រមទាំងបម្រាមធ្វើដំណើរទៅលើរដ្ឋមន្ត្រីនិងមន្ត្រីជាន់ខ្ពស់រុស្ស៊ី១៦រូបទៀតដែលជាប់ពាក់ព័ន្ធនឹងសង្គ្រាមរុស្ស៊ី-អ៊ុយក្រែន។ បូកសរុបតួលេខចុងក្រោយ បុគ្គលរុស្ស៊ីដែលត្រូវរងទណ្ឌកម្មអូស្រ្តាលីសរុបមានរហូតដល់៨៤៣នាក់។
ជាមួយគ្នានោះ លោកអាល់បានីសបានប្រកាសថា ក្រុងកង់ប៉េរ៉ានឹងផ្ដល់ជំនួយយោធាចំនួន១០០ លានដុល្លារអូស្ត្រាលីបន្ថែមទៀត (ស្មើនឹង៦៨លានដុល្លារអាម៉េរិក)។ មេដឹកនាំអូស្ត្រាលីរូបនេះក៏បញ្ជាក់ថា អូស្ត្រាលីនឹងផ្ដល់សម្ភារយោធាបន្ថែមទៀតតាម ការស្នើសុំរបស់អ៊ុយក្រែនដែលរួមមានរថពាសដែក១៤គ្រឿង រថយន្តយោធា Bushmaster ២០គ្រឿង និងដ្រូនមួយចំនួន។
«វាជាកិត្តិយសដ៏អស្ចារ្យសម្រាប់ខ្ញុំដែលបានក្លាយជានាយករដ្ឋមន្ត្រីអូស្ត្រាលីដំបូងគេដែលមកបំពេញទស្សនកិច្ចនៅអ៊ុយក្រែន»។ លោក អាល់បានីស ក៏បានលើកឡើងបែបនេះរួចបន្តថា ដំណើរទស្សនកិច្ចរបស់លោកនឹងបង្ហាញយ៉ាងច្បាស់ដល់ពិភពលោកអំពីសាមគ្គីភាពដែលរវាងប្រជាជនអូស្ត្រាលី និងប្រជាជនអ៊ុយក្រែន។
ទន្ទឹមគ្នានេះ ប្រធានាធិបតីអ៊ុយក្រែនលោក ហ្សេលេនស្គី បានថ្លែងថា អូស្ត្រាលីកំពុងផ្តល់ជំនួយដ៏ ច្រើនដល់អ៊ុយក្រែនជាពិសេសការគាំទ្រផ្នែកការពារជាតិ ហើយកងកម្លាំងអ៊ុយក្រែនពិតជា អរគុណយ៉ាងជ្រាលជ្រៅសម្រាប់រថយន្តយោធា Bushmaster ដែលអូស្ត្រាលីបានផ្ដល់ឱ្យពីមុនមក៕
© រក្សាសិទ្ធិដោយ thmeythmey.com