De Jong ក្លាយជាខ្សែបម្រើលំដាប់ពិភពលោកប្រចាំតំបន់អឺរ៉ុប អំឡុងនៅជាកូនក្រុមរបស់លោក Erik ten Hag កាលនៅក្លិប Ajax Amsterdam មុនចូលរួម Barca ក្នុងឆ្នាំ ២០១៩។ ក្រោយពេលត្រូវបានតែងតាំងជាអ្នកចាត់ការក្រុមបិសាចក្រហម លោក Ten Hag បានដាក់គោលដៅក្នុងការផ្ទេរកីឡាករ មកទឹកដី Old Trafford ដំបូងគេបំផុត គឺជា Frankie De Jong នេះតែម្តង។ 
 

ក្នុងពេលថ្មីៗនេះទៀតសោតខ្សែបម្រើវ័យ ២៥ឆ្នាំរូបនេះ ត្រូវបានកាសែតជាច្រើនរាយការណ៍ថា ខិតជិតយល់ព្រមកិច្ចព្រមព្រៀងក្នុងការផ្ទេរទៅ Man United ក្នុងតម្លៃខ្លួនប្រមាណ​ ៦៦លានដុល្លារ ជាមួយប្រាក់បូកបន្ថែម Add-ons ២០លានដុល្លារ។
 

កីឡាករសញ្ជាតិហូឡង់រូបនេះ កាលពីខែមីនា បាននិយាយប្រាប់អ្នកកាសែតអំពីអនាគតថា ចង់បន្តស្នាក់នៅកីឡដ្ឋាន Camp Nou ដែលជាក្លិបក្នុងក្តីស្រម៉ៃ ប៉ុន្តែ បញ្ហាហិរញ្ញវត្ថុរបស់ក្លិបអ្នកមានបុណ្យ អាចធ្វើឱ្យរូបគេអាចត្រូវចាកចេញពីក្លិប។ 
 

លោក Laporta ជឿជាក់ថា De Jong រីករាយក្នុងការស្នាក់នៅជាមួយក្លិប ប្រសិនបើរូបគេយល់ព្រមលើកិច្ចព្រមព្រៀងប្រាក់ឈ្នួលថ្មីជាមួយក្លិប។
 

«Frankie De Jong គឺជាកីឡាករ Barca ហើយរូបគេបានប្រែក្លាយជាកីឡាដ៏ល្អម្នាក់ក្នុងពិភពលោក។ យើងដឹងច្បាស់ថាក្លិបត្រូវការគាត់ មិនមែនត្រឹម United ឡើយ។ យើងគ្មានចេតនាក្នុងការលក់គាត់ឡើយ។ កីឡាករដែលខ្ញុំចាប់អារម្មណ៍ចង់ស្នាក់នៅជាមួយយើង ហើយរឿងចំពោះមុខពេលនេះគឺបញ្ហាប្រាក់ឈ្នួលតែប៉ុណ្ណោះ រូបគេគួរទទួលយកសំណើរពីប្រធានក្លិប។»។ លោក Laporta ប្រាប់អ្នកកាសែតបែបនេះ។
 

De Jong បង្ហាញខ្លួនបាន ៤៧ប្រកួតសម្រាប់ Barca សម្រាប់រដូវកាល ២០២១-២២ ហើយរូបគេរកបានគ្រាប់បាល់៤គ្រាប់ និងមានស្ថិតិប៉ះបាល់ឱ្យមិត្តរួមក្រុមបានសម្រេច ៩១.១៨ភាគរយ ល្អជាងកីឡាករខ្សែបម្រើផ្សេងក្នុងក្លិប៕