លោក ឃួង ស្រេង អភិបាលរាជធានីភ្នំពេញ បានប្រាប់សារព័ត៌មានថ្មីៗថា ជាគម្រោងទីតាំងនេះ អាចជាកន្លែងមួយសមស្របសម្រាប់ក្រុមការងារស្នើដល់រដ្ឋាភិបាល សុំការសម្រេចលើគម្រោងសាងសងស្ថានីយទឹកស្អាតថ្មីមួយទៀត។ 
 

បើតាមលោក ឃួង ស្រេង គម្រោងនៃការសាងសង់ស្ថានីយទឹកស្អាតថ្មីនេះ អាចនឹងផ្គត់ផ្គង់ទឹកសម្រាប់ពលរដ្ឋរស់នៅក្នុងតំបន់ភាគខាងលិចឆៀងខាងត្បូង រាជធានីភ្នំពេញ។ ជាពិសេសអាចឈានដល់ការផ្គត់ផ្គង់ នៅក្នុងស្រុកអង្គស្នួល ស្រុកកណ្ដាលស្ទឹង និងទីតាំងព្រលានយន្តហោះថ្មី នៃខេត្តកណ្ដាលទៀតផង។ 


 

« ពលរដ្ឋរស់នៅភាគខាងលិច​រាជធានីភ្នំពេញ​ដែលរស់នៅក្នុងសង្កាត់ចំនួនបី រួមសង្កាត់កំបូល សង្កាត់ប្រទះឡាង សង្កាត់បឹងធំ អាចមានទឹកប្រើ ប្រសិនបើមានស្ថានីយថ្មីបានសាងសង​។ នេះគ្រាន់ជាគម្រោងនៅឡើយទេ»។ នេះជាពន្យល់របស់លោក ឃួង ស្រេង។ 
 

អភិបាលរាជធានីភ្នំពេញរូបនេះ បានសន្និដ្ឋានថា គម្រោងស្ថានីយ៍ទឹកស្អាតលើទីតាំងថ្មីនេះ អាចត្រូវការផ្ទៃដីគោគចន្លោះពី៥ ទៅ៧ហិកតា ដើម្បីសាងសង់ និងត្រូវការផ្ទៃទឹក ចន្លោះពី១០ ទៅ២០ហិកតា ដើម្បីបូមទឹកទុក សម្រាប់ចម្រាញ់យកទៅផ្គត់ផ្គង់ដល់ប្រជាពលរដ្ឋ។  
 

ជុំវិញដំណើរការស្នើសុំ​សាងសង់ និងគម្រោងចំណាយនេះ សារព័ត៌មានថ្មីៗ មិនទាន់អាចសុំការឆ្លើយតបពីរដ្ឋាករស្វយ័តក្នុងភ្នំពេញបាននៅឡើយទេ៕