ខ្សែប្រយុទ្ធវ័យ ៣៧ឆ្នាំ បានស្នើសុំក្លិបចាកចេញ ហើយរូបគេមិនបានចូលរួមហ្វឹកហាត់ជាមួយក្រុម សម្រាប់ត្រៀមបើកររដូវកាលថ្មី នៅប្រទេសថៃនិងអូស្ត្រាលីឡើយ ព្រោះហេតុផលគ្រួសារ។ ចំណែកហេតុផលដ៏ចម្បងនៃការសុំចាកចេញផ្សេងទៀត គឺក្រុមបិសាចក្រហមគ្មានកៅអី UEFA Champions League ខណៈប្រាក់ពលកម្មរបស់ ​Ronaldo ក៏ត្រូវកាត់ ២៥ភាគរយ។
 

និយាយក្នុងសន្និសីទកាសែតនៅថៃ លោក ​Ten Hag អះអាងថាខ្សែប្រយុទ្ធវ័យ ៣៧ឆ្នាំ មិនសម្រាប់លក់ឡើយ ព្រោះស្ថិតក្នុងគម្រោងរបស់លោក។ Ronaldo ចូលរួម Man United ម្តងទៀតរដូវកាល ២០២១-២២ ក្រោយរួមរស់ជាមួយ Real Madrid និង Juventus។
 

អវត្តមាន Ronaldo សម្រាប់ការប្រកួតមិត្តភាពជាមួយក្រុម Man United និងការហ្វឹកហាត់នៅទីលាន Carrington ក្លាយជាមន្ទិលរបស់អ្នកគាំទ្រ ជុំវិញរឿងអនាគតរូបគេ ដ្បិតកាសែតជាច្រើនផ្សាយថា រូបគេត្រូវបានក្លិបធំៗដូចជា Chelsea, Bayern Munich និង Atletico Madrid ចាប់អារម្មណ៍។ ប៉ុន្តែមកដល់ពេលនេះ មិនមានសំណើណាមួយសម្រាប់រូបគេឡើយ។
 

ទោះបែបនេះក្តីមកដល់ថ្ងៃទី២៦ នេះ Ronaldo ត្រូវបានគេរាយការណ៍ថា បានធ្វើដំណើរទៅកាន់ទីក្រុង ​​​Manchester ទំនងដើម្បីជួបពិភាក្សាជាមួយអ្នកចាត់ការថ្មីលោក Ten Hag លើរឿងអនាគតជាមួយក្លិប ខណៈដែលកិច្ចសន្យារបស់គេនៅសល់១​ រដូវកាលទៀតជាមួយជម្រើសបន្តមួយរដូវកាលបន្ថែម។ 
 

ទីផ្សារដោះដូរកីឡាករនឹងបិទនៅ៥ ថ្ងៃបន្ទាប់ ពោលគឺត្រឹមថ្ងៃទី៣១ ខែកក្កដា ខណៈដែលអនាគតម្ចាស់ពាន Ballon d’Or ៥សម័យកំពុងស្ថិតក្នុងភាពមិនច្បាស់លាស់ថា ស្នាក់នៅបន្តជាមួយ Man United ឬចាកចេញស្វែងរកក្លិបថ្មី។ 
 

គួរបញ្ជាក់ថា Man United នឹងត្រូវប្រកួតមិត្តភាពទល់ក្រុម Atletico Madrid នៅប្រទេសន័រវែសនៅថ្ងៃទី៣០ កក្កដា និងជួបក្រុម ​Rayo Vallecano ថ្ងៃទី៣១ កក្កដា មុនត្រៀមប្រកួតបើករដូវកាលថ្មី Premier League នៅថ្ងៃទី៧ ខែសីហា ជួបក្រុម Brighton & Hove Albion៕