ក្រសួងសាធារណការ និងដឹកជញ្ជូន បានចេញសេចក្ដីជូនដំណឹងស្ដីពី ឯកសារភ្ជាប់តាមខ្លួននៅពេលបើកបរយានយន្ត ជាការឆ្លើយតបនឹងមតិពលរដ្ឋ។ ក្រសួងពន្យល់ថា ដើម្បីងាយស្រួលគ្រប់គ្រងយានយន្ត ក្រសួងបានបញ្ចូល QR Code លើឯកសារបណ្ណបើកបរ បណ្ណសម្គាល់យានជំនិះ វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ(ឆៀក) លិខិតអនុញ្ញាតធ្វើអាជីវកម្មដឹកជញ្ជូន និងឯកសារពាក់ព័ន្ធសំខាន់ៗមួយចំនួនទៀត។ ហេតុដូចនេះ ក្រសួងណែនាំឲ្យអ្នកបើកយានយន្តទាំងអស់ ត្រូវភ្ជាប់ឯកសារសំខាន់ៗទាំង៤ខាងលើ តាមខ្លួន ដើម្បីចូលរួមអនុវត្តច្បាប់ចរាចរណ៍។ 

 

លិខិតដដែល ចេញថ្ងៃទី៥សីហានេះ បានសរសេរបញ្ជាក់យ៉ាងដូច្នេះ៖ «ដូចនេះ ដើម្បីចូលរួមអនុវត្តច្បាប់ស្ដីពីចរាចរណ៍ផ្លូវគោក ក្រសួងសូមធ្វើការណែនាំដល់អ្នកបើកបរយានយន្តធ្វើចរាចរណ៍លើផ្លូវគោក ត្រូវមានឯកសារភ្ជាប់តាមខ្លួនរួមមាន៖ បណ្ណបើកបរយានយន្ត ច្បាប់ដើម, បណ្ណសម្គាល់យានជំនិះ ច្បាប់ថតចម្លងក្នុងករណីមិនមាន QR Code, ឆៀក ប្រើច្បាប់ថតចម្លង និង លិខិតអនុញ្ញាតឱ្យយានយន្តធ្វើអាជីវកម្មដឹកជញ្ជូនជាច្បាប់ថតចម្លង»៕