ក្រសួងវប្បធម៌ បានពិនិត្យរឿង“បុព្វេសន្និវាសវគ្គ២” របស់ថៃហើយ ពុំមានចំណុចណាប៉ះពាល់កម្ពុជាទេ

ជាតិ

សិល្បះ

ក្រសួងវប្បធម៌ បានពិនិត្យរឿង“បុព្វេសន្និវាសវគ្គ២” របស់ថៃហើយ ពុំមានចំណុចណាប៉ះពាល់កម្ពុជាទេ

12, Aug 2022 , 5:00 pm

រូបភាព

ដោយ: ប៉ូ សាគុន

ភ្នំពេញ៖ សាធារណជនខ្មែរ មានការមិនពេញចិត្ត នៅពេលឃើញឈុតផ្សព្វផ្សាយខ្លីនៃរឿង “បុព្វេសន្និវាសវគ្គ២” បានបង្ហាញផែនទីពីអតីតកាល រវាងប្រទេសកម្ពុជានិងប្រទេសថៃ។ សាធារណជនខ្មែរមួយចំនួន ចាត់ទុកការបង្ហាញផែនទីនោះ ថៃមានចេតនាចង់បញ្ជាក់ថាទឹកដីនោះ ជាកម្មសិទ្ធរបស់ប្រទេសថៃ។ ទោះជាយ៉ាងណា នាយកដ្ឋានភាពយន្តបានបញ្ជាក់ថា សាច់រឿងពេញនៃរឿង “បុព្វេសន្និវាសវគ្គ២” មិនមានបង្ហាញពីផែនទីនោះឡើយ។

សាធារណជនខ្មែរ បានបង្ហាញការមិនពេញចិត្តរបស់ខ្លួន ជុំវិញការបង្ហាញផែនទីមួយ ក្នុងឈុតផ្សព្វផ្សាយខ្លីនៃរឿង “បុព្វេសន្និវាសវគ្គ២” ដែលផែនទីនោះ បានបង្ហាញថា ទឹកដីមួយចំនួននៃភាគពាយ័ព្យ របស់ប្រទេសកម្ពុជាគឺជារបស់ថៃ។ សាធារណជនខ្មែរ យល់ឃើញថាការបង្ហាញផែនទីបែបនោះ នឹងធ្វើឱ្យមានការយល់ច្រឡំចំពោះសាធារណជនជាតិ និងអន្តរជាតិ ទាំងដែលផែនទីនោះ គឺជាផែនទីកាលពីអតីកាល។

សារព័ត៌មានថ្មីៗ បានទាក់ទងទៅនាយកដ្ឋានភាពយន្តនៃក្រសួងវប្បធម៌ និងវិចិត្រសិល្បៈ ដើម្បីសុំការអត្ថាប្បាយជុំវិញបញ្ហានេះ ប៉ុន្តែមិនមានអ្នកទទួល។

តែយ៉ាងណាលោក ប៉ុក បូរក្ស ប្រធាននាយកដ្ឋានភាពយន្ត បានផ្ដល់បទសម្ភាសដល់សារព័ត៌មានកម្ពុជាថ្មីថា មុនពេលនាយកដ្ឋានភាពយន្តផ្ដល់ទិដ្ឋាការ ឱ្យភាពយន្តណាមួយបញ្ចាំងនៅក្នុងប្រទេសកម្ពុជា នាយកដ្ឋានបានពិនិត្យមើលយ៉ាងល្អិតល្អន់ ពីផលប៉ះពាល់នានានៃរឿងនោះ។ ជាក់ស្ដែងនាយកដ្ឋានរបស់លោក បានពិនិត្យមើលសាច់រឿង “បុព្វេសន្និវាសវគ្គ២" ដែលមានរយៈពេលជិត៣ម៉ោងនោះហើយ គឺពុំឃើញមានឈុតណាមួយក្នុងរឿង បង្ហាញពីផែនទីដូចការបង្ហាញនៅក្នុងឈុតផ្សព្វផ្សាយខ្លីនោះឡើយ។

បើតាមប្រវត្តិសាស្ត្ររវាងប្រទេសកម្ពុជា និងប្រទេសថៃ កាលពីអតីតកាល នៅក្នុងអំឡុងឆ្នាំ១៧៩៥ គឺក្នុងសម័យឧដុង្គ ខេត្តរបស់ប្រទេសកម្ពុជានាភាគពាយ័ព្យចំនួន៣ គឺខេត្តបាត់ដំបង មហានគរ(ជាខេត្តនៅសម័យមហានគរ ដែលបច្ចុប្បន្នមានទីតាំងស្ថិតនៅក្នុងខេត្តសៀមរាប) និងចុងកាល់ ត្រូវបានព្រះរាជាខ្មែរ ព្រះនាមព្រះអង្គអេង កាត់ឱ្យទៅប្រទេសសៀមបណ្ដោះអាសន្ន។ តាមឯកសារប្រវត្តិសាស្ត្រ ព្រះរាជាខ្មែរត្រូវបង្ខំព្រះទ័យកាត់ទឹកដីទាំងនោះឱ្យទៅសៀម ក្រោយពីមានការគម្រាមពីស្ដេចថៃព្រះចៅរាមាទី១ ថាប្រទេសទាំងពីរនឹងក្លាយជាសត្រូវ បើខ្មែរមិនព្រមកាត់ទឹកដីនោះឱ្យទៅសៀម។

ដោយសារតែប្រទេសជាតិកំពុងស្ថិតក្នុងភាពទន់ខ្សោយ ទាំងវិស័យការពារជាតិ ហើយសេដ្ឋកិច្ចក៏ធ្លាក់ចុះខ្លាំងផងនោះ ព្រះមហាក្សត្រខ្មែរ ព្រះនាមព្រះអង្គអេង បានយល់ព្រមកាត់ទឹកដី៣ខេត្តឱ្យទៅសៀម ប៉ុន្តែព្រះអង្គអេង បានបញ្ជាក់ជាមួយស្ដេចសៀម ថាឱ្យតែក្នុងរជ្ជកាលព្រះចៅរាមាទី១ប៉ុណ្ណោះ។ មានន័យថា កាលណាព្រះចៅរាមាទី១ សោយទិវង្គតទៅ ខ្មែរនឹងយកទឹកដីនោះមកវិញ។

វិលមករឿង “បុព្វេសន្និវាសវគ្គ២”វិញ គេនៅពុំទាន់បានដឹងនៅឡើយ ពីចេតនារបស់ផលិតករ ឬផលិតកម្មថៃ ដែលបញ្ចូលផែនទីនោះ ទៅក្នុងវិដេអូផ្សព្វផ្សាយខ្លីថាមានបំណងអ្វី ទាំងដែលសាច់រឿងទាំងមូលពុំមានឈុតមួយណា បានបង្ហាញពីផែនទីនោះសោះ៕