នៅក្នុងលិខិតផ្ញើជូនមេដឹកនាំកូរ៉េខាងជើង លោកគីម ជុងអ៊ុន សម្រាប់ថ្ងៃរំលឹកដល់ការរំដោះប្រទេសកូរ៉េពីជប៉ុន ប្រធានាធីបតីរុស្ស៊ី លោក វ៉ា្លឌីមៀ ពូទីន បានលើកឡើងថា ទំនាក់ទំនងកាន់តែជិតស្និទ្ធនឹងក្លាយជាផល ប្រយោជន៍សម្រាប់ប្រទេសទាំងពីរ ហើយជួយពង្រឹងសន្តិសុខ និងស្ថិរភាពនៃឧបទ្វីបកូរ៉េ ហើយតំបន់អាស៊ីភាគឦសានផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មានកូរ៉េខាងជើង KCNA នៅថ្ងៃទី១៥ ខែសីហា។

 

ជាការឆ្លើយតប លោកគីមក៏បានផ្ញើលិខិតមួយត្រឡប់ទៅលោកពូទីនវិញ ដោយលើកឡើងថា ទំនាក់ទំនងមិត្តភាពរុស្ស៊ី-កូរ៉េខាងជើង ត្រូវបានបង្កើតឡើងកាលពីក្នុងសង្គ្រាមលោកលើកទី២ ជាមួយនឹងជ័យជម្នះលើជប៉ុន និងការកាន់កាប់ឧបទ្វីបកូរ៉េ។ 

 

មេដឹកនាំកូរ៉េខាងជើង បានបន្តថា កិច្ចសហប្រតិបត្តិការយុទ្ធសាស្ត្រ ការគាំទ្រគ្នា និងសាមគ្គីភាពរវាងប្រទេសទាំងពីរបានឈានដល់ កម្រិតថ្មីមួយ ចាប់តាំងពីពេលដែលភាគីទាំងពីរបានប្រឹងប្រែងរួមគ្នា ក្នុងការទប់ស្កាត់ការគំរាម​កំហែង និងការបង្កអរិភាពពីសំណាក់កងកម្លាំងយោធាសត្រូវ។ បើទោះលោកគីម មិនបានសំដៅដល់ប្រទេសណាមួយ ប៉ុន្តែមេដឹកនាំរូបនេះ ទំនងសំដៅដល់អាម៉េរិក និងសម្ព័ន្ធមិត្ត។ 

 

ទន្ទឹមនេះ មេដឹកនាំកូរ៉េខាងជើងរូបនេះ បានព្យាករណ៍ថា កិច្ចសហប្រតិបត្តិការរវាងរុស្ស៊ី និងកូរ៉េខាងជើង នឹងកើនឡើង ដោយផ្អែកលើកិច្ចព្រមព្រៀងដែលបានចុះហត្ថលេខានៅឆ្នាំ២០១៩ នៅពេលដែលលោកបានជួបជាមួយលោកពូទីនដោយផ្ទាល់។

 

កន្លងមក កូរ៉េខាងជើង បានឈរនៅខាងរុស្ស៊ី ហើយកាលពីខែកក្កដា ក្រុងព្យុងយ៉ាង បានទទួលស្គាល់តំបន់ផ្ដាច់ខ្លួននៅអ៊ុយក្រែនចំនួនពីរ។ បន្ថែមពីនេះ មន្ត្រីកូរ៉េខាជើង បានបញ្ជាក់ពីការបញ្ជូនកម្មករកូរ៉េខាងជើងមួយចំនួន​ ទៅតំបន់ទាំងនោះ ដើម្បីជួយក្នុងវិស័យសំណង់ និងការងារផ្សេងៗទៀត៕