អន្តរជាតិ
នយោបាយអន្តរជាតិ
ក្រសួងពាណិជ្ជកម្មថៃ ពិចារណាសំណើដំឡើងថ្លៃមីកញ្ចប់
×
ដោយ៖ ហ៊ួយ ស៊ីវលី
ក្រសួងពាណិជ្ជកម្មថៃ នឹងពិចារណាសំណើដំឡើងថ្លៃមីកញ្ចប់ក្រោយពេលក្រុមហ៊ុនផលិតមីកញ្ចប់ធំជាងគេទាំងប្រាំនៅថៃ ស្នើសុំអនុញ្ញាតលើការដំឡើងថ្លៃមីកញ្ចប់ខណៈថ្លៃដើមផលិតកម្មកើនដែរនោះ។
ក្រុមហ៊ុនផលិតមីកញ្ចប់ធំជាងគេទាំងប្រាំនៅថៃមានដូចជា ក្រុមហ៊ុនមីកញ្ចប់ម៉ាម៉ាជាដើម ដាក់លិខិតរួមគ្នានៅថ្ងៃទី១៦ ខែសីហា ទៅកាន់នាយកដ្ឋានពាណិជ្ជកម្មផ្ទៃក្នុងចំណុះក្រសួងពាណិជ្ជកម្មដើម្បីស្នើសុំដំឡើងតម្លៃមីកញ្ចប់របស់ខ្លួនពី០,១៧ដុល្លារទៅ០,២៣ដុល្លារក្នុងមួយកញ្ចប់។
ទាក់ទងនឹងសំណើនេះ រដ្ឋមន្ត្រីពាណិជ្ជកម្មថៃ លោក Jurin Laksanawisit បញ្ជាឱ្យនាយកដ្ឋានពាណិជ្ជកម្មផ្ទៃក្នុង ពិចារណាលើសំណើរបស់ក្រុមហ៊ុនផលិតមីកញ្ចប់ធំជាងគេទាំងប្រាំ ដើម្បីអនុញ្ញាតឱ្យពួកគេដំឡើងថ្លៃមីខណៈថ្លៃដើមផលិតកម្មមានការកើនឡើង។ នេះបើតាមការចុះផ្សាយរបស់សារពត៌មាន Bangkok Post។
លោកទទួលស្គាល់ថា ថ្លៃដើមផលិតកម្មរបស់ក្រុមហ៊ុនផលិតមីកញ្ចប់ក្នុងស្រុកទាំងនោះកើនឡើងយ៉ាងខ្លាំង រួមទាំងថ្លៃថាមពល អគ្គិសនី តម្លៃឧស្ម័ន ថ្លៃដឹកជញ្ជូន និងវត្ថុធាតុដើមដូចជាស្រូវសាលី និងប្រេងបន្លែជាដើម។ យ៉ាងណាមិញ តាមទស្សនៈរបស់លោក ការដំឡើងថ្លៃមីកញ្ចប់ចំនួន០,០៥៧ ដុល្លារក្នុងមួយកញ្ចប់ពី០,១៧ដុល្លារទៅ០,២៣ដុល្លារ ជាតម្លៃដែលខ្ពស់ពេកហើយ ហើយការកើនឡើងយ៉ាងខ្លាំងបែបនេះនឹងអាចប៉ះពាល់ដល់អ្នកមានចំណូលទាប។
លោកបន្ថែមថា ការត្រូវអនុញ្ញាតឱ្យក្រុមហ៊ុនផលិតមីកញ្ចប់ដំឡើងថ្លៃ ឬយ៉ាងណានោះ គឺត្រូវអាស្រ័យលើការសម្រេចចិត្តរបស់នាយកដ្ឋានពាណិជ្ជកម្មផ្ទៃក្នុង ដែលនឹងសិក្សា និងវិភាគតម្លៃផលិតកម្មរបស់ពួកគេនៅពេលក្រោយ។ លោកក៏ណែនាំនាយកដ្ឋានថា ការកែតម្រូវតម្លៃនេះ ប្រសិនបើត្រូវអនុម័ត គួរតែស្របតាមតម្លៃផលិតកម្មពិតប្រាកដរបស់អ្នកផលិត និងមានផលប៉ះពាល់តិចបំផុតដល់អ្នកប្រើប្រាស់។
ចំណែកអគ្គនាយកនៃនាយកដ្ឋានពាណិជ្ជកម្មផ្ទៃក្នុង លោក Wattanasak Sur-iam និយាយថាអាជ្ញាធរយល់ច្បាស់ពីការលំបាករបស់អ្នកផលិត ហើយនាយកដ្ឋានរបស់លោកពិភាក្សាជាង២០ដងហើយអំពីការកើនឡើងតម្លៃជាមួយក្រុមហ៊ុនផលិត។ លោកក៏សង្កត់ធ្ងន់ថា នាយកដ្ឋានត្រៀមខ្លួនជាស្រេចក្នុងការពិចារណាលើសំណើរបស់ក្រុមហ៊ុនផលិតមីកញ្ចប់ទាំងនោះ ប៉ុន្តែការអនុម័តអាចប្រែប្រួលអាស្រ័យលើការចំណាយរបស់ក្រុមហ៊ុនផលិតនីមួយៗ។
សូមបញ្ជាក់ថា ក្រុមហ៊ុនផលិតមីកញ្ចប់នីមួយៗទាំងប្រាំព្យាយាមដំឡើងតម្លៃរបស់ខ្លួនចាប់តាំងពីពាក់កណ្តាលឆ្នាំមុន បន្ទាប់ពីតម្លៃនៃវត្ថុធាតុដើមសំខាន់ៗដែលប្រើសម្រាប់ការផលិតកើនឡើង៕
© រក្សាសិទ្ធិដោយ thmeythmey.com